ദേശീയ സൈക്കിള് പോളോ സബ് ജൂനിയര് ചാമ്പ്യന്ഷിപ്പില് പങ്കെടുക്കാന് മഹാരാഷ്ട്രയിലെ നാഗ്പൂരില് എത്തിയ കേരള ടീം അംഗം നിദ ഫാത്തിമയുടെ മരണവുമായി ബന്ധപ്പെട്ട് വിശദമായ അന്വേഷണം നടത്തണമെന്ന് ആവശ്യപ്പെട്ട് മന്ത്രി വി ശിവന്കുട്ടി മഹാരാഷ്ട്ര മുഖ്യമന്ത്രി ഏക്നാഥ് ഷിന്ഡെയ്ക്ക് കത്തയച്ചു. കുട്ടിക്ക് മെച്ചപ്പെട്ട വൈദ്യസഹായം ലഭിച്ചില്ല എന്ന ആരോപണവും അന്വേഷണ പരിധിയില് ഉള്പ്പെടുത്തണമെന്ന് മന്ത്രി കത്തില് ആവശ്യപ്പെട്ടിട്ടുണ്ട്. അന്വേഷണവുമായി ബന്ധപ്പെട്ട് എല്ലാ സഹകരണവും കേരള സര്ക്കാരിന്റെ ഭാഗത്തുനിന്ന് ഉണ്ടാകുമെന്നും മന്ത്രി വി ശിവന്കുട്ടി കത്തില് അറിയിച്ചു.ഇതിനിടെ നാഗ്പൂരില് ദേശീയ സൈക്കിള് പോളോ ചാമ്പ്യന്ഷിപ്പിനെത്തിയ മലയാളി വിദ്യാര്ഥിനി മരിച്ച സംഭവത്തില് കേന്ദ്രസര്ക്കാര് ഇടപെടുന്നു. വിശദമായ അന്വേഷണം നടത്തുമെന്ന് കേന്ദ്ര കായിക മന്ത്രി അനുരാഗ് ഠാക്കൂര് ഉറപ്പ് നല്കി. വിഷയം കേരളത്തില് നിന്നുള്ള എംപിമാര് ലോക്സഭയില് ഉന്നയിച്ചു. കുട്ടിയുടെ മൃതദേഹം പോസ്റ്റ്മോര്ട്ടത്തിന് ശേഷം ബന്ധുക്കള്ക്ക് വിട്ട് നല്കും.സൈക്കിള് പോളോ ചാമ്പ്യന്ഷിപ്പിനെത്തിയ കേരളാ സംഘത്തിന് താമസ ഭക്ഷണ സൗകര്യങ്ങള് നിഷേധിച്ചതും ഛര്ദ്ദിയെ തുടര്ന്ന് അതിലൊരു കുട്ടി മരണപ്പെട്ടതും സഭ നിര്ത്തി വച്ച് ചര്ച്ച ചെയ്യണമെന്ന് എഎം ആരിഫ് എംപിയും ബെന്നി ബെഹനാന് എംപിയുമാണ് ലോക്സഭയില് ആവശ്യപ്പെട്ടത്. അടിയന്തര പ്രമേയത്തിന് അനുമതി നിഷേധിച്ചതിന് പിന്നാലെ എംഎം ആരിഫ് എംപി കേന്ദ്ര കായിക മന്ത്രി അനുരാഗ് ഠാക്കൂറുമായി കൂടിക്കാഴ്ച നടത്തി. സഹായധനം അടക്കമുള്ള കാര്യങ്ങളില് ഉറപ്പ് കിട്ടിയതായി അദ്ദേഹം പറഞ്ഞു. ദേശീയ സൈക്കിള് പോളോ ചാമ്പ്യന്ഷിപ്പില് പങ്കെടുക്കാന് നാഗ്പൂരിലെത്തിയ നിദ ഇന്നലെയാണ് മരിച്ചത്.
