പ്രതിപക്ഷ നേതാവ് വി.ഡി.സതീശന്റെ ഔദ്യോഗിക വസതിയില് കെപിസിസി മിന്നല് പരിശോധന നടത്തിയെന്ന വാര്ത്തകളെ തള്ളി വി.ഡി.സതീശന്. തനിക്ക് എതിരെ ഒന്നും പറയാനില്ലാത്തതിനാല് കുല്സിത പ്രവര്ത്തനം നടത്തുന്നുവെന്ന് അദ്ദേഹം ആരോപിച്ചു. ചിലര് പിന്നില് നിന്ന് വലിക്കുകയാണ്. ടി.യു.രാധാകൃഷ്ണന് ഒരു പരിപാടിക്ക് ക്ഷണിക്കാന് വന്നതാണ്. ഒരു പണിയുമില്ലാത്തവരാണ് ഗ്രൂപ്പുമായി നടക്കുന്നത്. തനിക്ക് വേറെ ഒരുപാട് പണിയുണ്ട്. നിയമസഭയില് ഒറ്റക്കെട്ടായി പ്രവര്ത്തിക്കുന്നു. പ്രതിപക്ഷ പ്രവര്ത്തനത്തിന് ഒരു തെറ്റും പറയാനില്ല. ടീം വര്ക്കാണ് നടക്കുന്നതെന്നും സതീശന് വ്യക്തമാക്കി.
ഇന്നലെ രാത്രിയാണ് പ്രതിപക്ഷ നേതാവിന്റെ ഔദ്യോഗിക വസതിയായ കന്ോണ്മെന്റ് ഹൗസില് ഗ്രൂപ്പ് യോഗം നടക്കുന്നെന്ന സംശയത്തില് കെപിസിസി പ്രസിഡന്റ് കെ.സുധാകരന് ആളെ അയച്ചത്. രാത്രി പത്തോടെ കെപിസിസി സംഘം കന്റോണ്മെന്റില് എത്തിയപ്പോള് അവിടെ പ്രതിപക്ഷ നേതാവ് വി.ഡി.സതീശന്റെ സാന്നിധ്യത്തില് പത്തിലേറെ പ്രമുഖ നേതാക്കള് ഉണ്ടായിരുന്നു. നടന്നതു ഗ്രൂപ്പ് യോഗമല്ലെന്നും ‘വെറുതെ ഒന്ന് ഇരുന്നതാണെ’ന്നുമാണു യോഗത്തിലുണ്ടായിരുന്ന നേതാക്കളുടെ വിശദീകരണം. എന്നാല് ഗ്രൂപ്പ് യോഗത്തിനെതിരേ ഹൈക്കമാന്ഡിനു പരാതി നല്കാന് ഒരുങ്ങുകയാണു കെപിസിസി നേതൃത്വം.
കന്റോണ്മെന്റ് ഹൗസില് നേതാക്കള് തമ്പടിച്ചിട്ടുണ്ടെന്നറിഞ്ഞ് ഇന്നലെ രാത്രി പത്തോടെയാണു കെ.സുധാകരന് പരിശോധിക്കാന് ആളെ വിട്ടത്. സംഘടനാ ചുമതലയുള്ള കെപിസിസി ജനറല് സെക്രട്ടറി ടി.യു.രാധാകൃഷ്ണന്, കെപിസിസി പ്രസിഡന്റിന്റെ സെക്രട്ടറി വിപിന്മോഹന് എന്നിവരായിരുന്നു സംഘത്തില്. അകത്തുണ്ടായിരുന്ന നേതാക്കളില് മിക്കവരും ഇവര് എത്തിയതോടെ പല വാതിലുകള് വഴി പുറത്തിറങ്ങി. ചുരുക്കം ചിലര് മുന്വാതിലിലൂടെയും.
ഡിസിസി പ്രസിഡന്റ് പാലോട് രവി, നെയ്യാറ്റിന്കര സനല്, വര്ക്കല കഹാര്, എം.എം.വാഹിദ്, വി.എസ്.ശിവകുമാര്, കെ.എസ്.ശബരീനാഥ് തുടങ്ങിയ തിരുവനന്തപുരം ജില്ലയിലെ നേതാക്കളും കെപിസിസി ജനറല് സെക്രട്ടറി കെ.പി.ശ്രീകുമാര്, യൂജിന് തോമസ് തുടങ്ങിയവരുമാണ് പ്രതിപക്ഷ നേതാവിന്റെ ഔദ്യോഗിക വസതിയില് ഉണ്ടായിരുന്നത്. ചേര്ന്നതു ഗ്രൂപ്പ് യോഗമല്ലെന്നും പ്രതിപക്ഷ നേതാവിന്റെ സൗകര്യമനുസരിച്ച് അദ്ദേഹത്തെ കാണാന് എത്തിയതായിരുന്നുവെന്നും നേതാക്കള് പറയുന്നു. ഇന്നലെ നിയമസഭയുണ്ടായിരുന്നതിനാല് രാഷ്ട്രീയകാര്യങ്ങള്ക്കു പകല് പ്രതിപക്ഷ നേതാവിനെ കിട്ടിയിരുന്നില്ല. പ്രതിപക്ഷ നേതാവിനെ പ്രധാന നേതാക്കള് കാണുന്നതിനു ഗ്രൂപ്പ് യോഗത്തിന്റെ പരിവേഷം നല്കേണ്ടതില്ലെന്നും ഇവര് പറയുന്നു.
ബാലരാമപുരത്ത് ക്ഷേത്രത്തിന് നേരെ സ്ഫോടക വസ്തു എറിഞ്ഞു
തിരുവനന്തപുരം:ഓട്ടോറിക്ഷയിലെത്തിയ അക്രമികളെ തിരഞ്ഞ് പൊലീസ്തിരുവനന്തപുരം ബാലരാമപുരത്തെ കാട്…
