ഡല്ഹി: രാജ്യത്ത് ഭക്ഷ്യവസ്തുക്കള് വിളമ്ബുന്നതിനും സൂക്ഷിക്കുന്നതിനും പത്ര കടലാസുകള് ഉപയോഗിക്കുന്നത് ഉടന് അവസാനിപ്പിക്കണമെന്ന് ഫുഡ് സേഫ്റ്റി ആന്ഡ് സ്റ്റാന്ഡേര്ഡ് അതോറിറ്റി ഓഫ് ഇന്ത്യ (എഫ്എസ്എസ്എഐ) യുടെ നിര്ദേശം.ഭക്ഷണ സാധനങ്ങള് പൊതിയുന്നതിന് പത്രങ്ങള് ഉപയോഗിക്കുന്നതുമായി ബന്ധപ്പെട്ടുള്ള ആരോഗ്യകരമായ അപകടങ്ങളെക്കുറിച്ച് ആശങ്ക പ്രകടിപ്പിച്ച് എഫ്എസ്എസ്എഐ ബുധനാഴ്ചയാണ് ഈ നിര്ദ്ദേശം പുറപ്പെടുവിച്ചത്.നിലവില് തുടര്ന്നുവരുന്ന രീതി ആരോഗ്യത്തിന് അപകടമാണെന്നും, അപകടങ്ങളെക്കുറിച്ച് ഉപഭോക്താക്കളെയും ഭക്ഷണ വില്പ്പനക്കാരെയും മറ്റ് പങ്കാളികളെയും അറിയിക്കാനാണ് പുതിയ നീക്കമെന്ന് എഫ്എസ്എസ്എഐയുടെ സിഇഒ, ജി. കമല വര്ധന റാവു പറഞ്ഞു.പത്രങ്ങളില് ഉപയോഗിക്കുന്ന മഷിയില് ആരോഗ്യത്തിന് ദോഷമുണ്ടാക്കുന്ന വിവിധ ബയോ ആക്റ്റീവ് വസ്തുക്കള് അടങ്ങിയിരിക്കുന്നു, ഇത് ഭക്ഷണത്തെ മലിനമാക്കുകയും കഴിക്കുമ്ബോള് ആരോഗ്യപ്രശ്നങ്ങളിലേക്ക് നയിക്കുമെന്നും അദ്ദേഹം ചൂണ്ടികാട്ടി.പ്രിന്റിംഗ് മഷികളില് ലെഡ്, ഹെവി മെറ്റലുകള് എന്നിവയുള്പ്പെടെയുള്ള രാസവസ്തുക്കള് അടങ്ങിയിട്ടുണ്ടെന്നും അത് ഭക്ഷണത്തിലേക്ക് കടക്കുകയും കാലക്രമേണ ഗുരുതരമായ ആരോഗ്യപ്രശ്നങ്ങള് സൃഷ്ടിക്കുമെന്നും അദ്ദേഹം പറഞ്ഞു. പത്രങ്ങളില് ബാക്ടീരിയ, വൈറസുകള് അല്ലെങ്കില് മറ്റ് രോഗകാരികള് എന്നിവയാല് മലിനമാകാന് സാധ്യതയുണ്ടെന്നും ഇത് പലരോഗങ്ങള്ക്കും കാരണമാകുമെന്നും എഫ്എസ്എസ്എഐ കൂട്ടിച്ചേര്ത്തു.മാത്രമല്ല ഭക്ഷ്യവസ്തുക്കള് പൊതിയുന്നതിനോ സൂക്ഷിക്കുന്നതിനോ പത്രങ്ങള് ഉപയോഗിക്കുന്നത് നിരോധിക്കുന്നതിനും പൊതുജനങ്ങള്ക്കിടയില് ഇതിനെക്കുറിച്ചുള്ള അവബോധം വളര്ത്തുന്നതിനും സംസ്ഥാനങ്ങളിലെ ഭക്ഷ്യമേഖല അധികാരികളുമായി ചേര്ന്ന് പ്രവര്ത്തിക്കുന്നുണ്ടെന്നും എഫ്എസ്എസ്എഐ വ്യക്തമാക്കി.
