പാലായിലെ തോല്വിക്ക് കാരണം പക്വതയില്ലാത്ത നേതൃത്വം എന്ന് ആരോപിച്ച് പിജെ ജോസഫ്. പാര്ട്ടി ഭരണഘടന ലംഘിച്ചതും പരാജയകാരണം. വര്ക്കിങ് ചെയര്മാനായി തന്നെ അംഗീകരിച്ചില്ല. പാര്ട്ടി ചിഹ്നത്തില് മത്സരിക്കാതിരുന്നതും പരാജയകാരണം
തെരഞ്ഞെടുപ്പ് കമ്മീഷണര് ചിഹ്നം കിട്ടാത്തത് കാരണം പിജെ ജോസഫിന്റെ കത്ത് കിട്ടാത്തതാണ് എന്ന് അറിയിച്ചു. ഭരണഘടന പ്രകാരം ചെയര്മാന് ഞാനാണ്. ചെയര്മാന് കത്ത് നല്കിയാല് ചിഹ്നം അനുവദിക്കാം എന്ന് അറിയിച്ചതാണ്. യുഡിഎഫില് അത് അറിയിച്ചിരുന്നു. എന്നാല് ജോസ് കെ മാണി ചെയര്മാന് ആയാണ് കത്ത് നല്കിയത്. പിന്നാലെ ചിഹ്നമില്ലാതെ മത്സരിക്കാനും തീരുമാനിച്ചു – പിജെ ജോസഫ് പറഞ്ഞു.
പ്രചാരണത്തിനിടയ്ക്ക് പിജെ ജോസഫിനെ കൂക്കിവിളിച്ചതും പാര്ട്ടി മുഖപത്രത്തില് ജോസഫിന് എതിരെ ലേഖനം എഴുതിയതും പരാജയത്തിന് കാരണമായെന്നാണ് ജോസഫ് വിലയിരുത്തുന്നത്. തന്നെ അപഹസിച്ചിട്ടും താന് പ്രകോപിതനായില്ലെന്ന് അദ്ദേഹം പറഞ്ഞു. വ്യത്യസ്ത അഭിപ്രായങ്ങള് ഉണ്ടായിരുന്നെങ്കിലും ആത്മാര്ഥമായി പ്രചാരണത്തിന് ഇറങ്ങിയിരുന്നെന്നും പിജെ ജോസഫ് പറഞ്ഞു.
പിജെ ജോസഫ് വഞ്ചിച്ചതാണ് പാലായിലെ തോല്വിക്ക് കാരണമെന്നാണ് ജോസ് കെ മാണി പക്ഷത്തിന്റെ വിമര്ശനം. തോല്വി ദൈവ നിശ്ചയമെന്നായിരുന്നു ജോസ് ടോം മാധ്യമങ്ങളോട് പ്രതികരിച്ചത്. അപ്രതീക്ഷിതമായിരുന്നു തോല്വിയെന്നും അദ്ദേഹം പറഞ്ഞു.
പാലാ ഉപതെരഞ്ഞെടുപ്പ് ഫലം ഇന്ന് രാവിലെയാണ് പ്രഖ്യാപിച്ചത്. യുഡിഎഫ് സ്വതന്ത്രനായി മത്സരിച്ച ജോസ് ടോമിനെ തകര്ത്ത് ഇടതു സ്ഥാനാര്ത്ഥി മാണി സി കാപ്പന് ആണ് വിജയിച്ചത്. 2943 വോട്ടുകള്ക്കാണ് ജയം. കഴിഞ്ഞ മൂന്ന് നിയമസഭാ തെരഞ്ഞെടുപ്പുകളില് കെ എം മാണിയോട് മത്സരിച്ചു തോറ്റ സ്ഥാനാര്ഥിയാണ് മാണി സി കാപ്പന്.
പാലാ നിയോജക മണ്ഡലം രൂപീകരിച്ചതിന് ശേഷം കെഎം മാണിയല്ലാതെ മണ്ഡലത്തെ പ്രതിനിധീകരിക്കുന്ന ആദ്യത്തെ വ്യക്തിയാണ് മാണി സി കാപ്പന് എന്ന പ്രത്യേകതയുമുണ്ട്.
