കോളേജ് ഹോസ്റ്റലില് പരാതിക്കാരനായ വിദ്യാര്ത്ഥിയെ കെട്ടിയിട്ട് ഉപദ്രവിക്കുന്ന ദൃശ്യങ്ങളാണ് പുറത്ത് വന്നിരിക്കുന്നത്. കയ്യും കാലും കെട്ടിയിട്ടായിരുന്നു മര്ദനം.
കോട്ടയം: കോട്ടയം സര്ക്കാര് നഴ്സിങ് കോളേജിലെ റാഗിങ്ങില് ഞെട്ടിക്കുന്ന ദൃശ്യങ്ങള് പുറത്ത്. കോളേജ് ഹോസ്റ്റലില് പരാതിക്കാരനായ വിദ്യാര്ത്ഥിയെ കെട്ടിയിട്ട് ഉപദ്രവിക്കുന്ന ദൃശ്യങ്ങളാണ് പുറത്ത് വന്നിരിക്കുന്നത്. കോമ്പസ് ഉപയോഗിച്ച് ശരീരത്തില് കുത്തുന്നതും മുറിവില് ലോഷന് ഒഴിക്കുന്നതും സ്വകാര്യഭാഗത്ത് പരുക്കേല്പ്പിക്കുന്നതും ദൃശ്യങ്ങളിലുണ്ട്. കയ്യും കാലും കെട്ടിയിട്ടായിരുന്നു മര്ദനം.
ഒന്നാംവര്ഷ വിദ്യാര്ത്ഥികളെയാണ് മൂന്നാം വര്ഷ വിദ്യാര്ത്ഥികള് ക്രൂരമായി റാഗ് ചെയ്തത്. സംഭവത്തില് അഞ്ച് വിദ്യാര്ത്ഥികളുടെ അറസ്റ്റ് പൊലീസ് ഇന്നലെ രേഖപ്പെടുത്തിയിരുന്നു. കോട്ടയം മൂന്നിലവ് സ്വദേശി സാമുവല്, വയനാട് നടവയല് സ്വദേശി ജീവ, മലപ്പുറം മഞ്ചേരി സ്വദേശി റിജില് ജിത്ത്, മലപ്പുറം വണ്ടൂര് സ്വദേശി രാഹുല് രാജ്, കോട്ടയം കോരുത്തോട് സ്വദേശി വിവേക് എന്പി എന്നിവരെയാണ് അറസ്റ്റ് ചെയ്തത്. അഞ്ച് പേരെയും സസ്പെന്റ് ചെയ്തിട്ടുണ്ട്. ആന്റി റാഗിങ് നിയമപ്രകാരം അന്വേഷണം നടത്തിയ ശേഷമാണ് കോളേജ് പ്രിന്സിപ്പാള് നടപടി എടുത്തത്.
അതേസമയം, കോളേജ് ഹോസ്റ്റലിലെ കൂടുതല് വിദ്യാര്ത്ഥികളില് നിന്നും അധ്യാപകരില് നിന്നും വിവരങ്ങള് തേടാനാണ് അന്വേഷണ സംഘത്തിന്റെ തീരുമാനം. സംഭവത്തില് സമഗ്ര അന്വേഷണം നടത്താനായി മെഡിക്കല് വിദ്യാഭ്യാസ വകുപ്പും പ്രത്യേക സംഘത്തെ നിയോഗിച്ചിട്ടുണ്ട്. അതിവേഗത്തില് റിപ്പോര്ട്ട് സര്പ്പിക്കാനാണ് മെഡിക്കല് വിദ്യാഭ്യാസ ഡയറക്ടറുടെ നിര്ദേശം.
ഒന്നാംവര്ഷ വിദ്യാര്ത്ഥകളെ മൂന്നാം വര്ഷ വിദ്യാര്ത്ഥികള് മൂന്ന് മാസത്തോളം റാഗ് ചെയ്തെന്നാണ് പരാതി. വിദ്യാര്ത്ഥികളുടെ സ്വകാര്യ ഭാഗങ്ങളില് ഡംബല് തൂക്കിയിട്ട് ഉപദ്രവിച്ചുവെന്നും കോമ്പസ് അടക്കമുള്ള ഉപകരണങ്ങള് കൊണ്ട് മുറിവേല്പ്പിച്ചുവെന്നും പരാതിയില് പറയുന്നു.
