തിരുവനന്തപുരം: കോവളത്ത് വിദേശിയെ തടഞ്ഞ സംഭവത്തില് മുഖ്യമന്ത്രി പിണറായി വിജയന് റിപ്പോര്ട്ട് തേടി. സംഭവത്തെക്കുറിച്ച് എത്രെയും വേഗം അന്വേഷിച്ച് റിപ്പോര്ട്ട് നല്കാന് അദ്ദേഹം ഉദ്യോഗസ്ഥര്ക്ക് നിര്ദേശം നല്കി. അതേസമയം, സംഭവത്തില് മന്ത്രി മുഹമ്മദ് റിയാസും ഇടപെട്ടു. മദ്യവുമായി വന്ന സ്വീഡിഷ് പൗരനെ പോലീസ് തടഞ്ഞ സംഭവം ദൗര്ഭാഗ്യകരമെന്ന് മുഹമ്മദ് റിയാസ് പറഞ്ഞു. സര്ക്കാര് നയത്തിന് വിരുദ്ധമായ കാര്യമാണ് നടന്നത്. ബന്ധപ്പെട്ട വകുപ്പ് അന്വേഷിച്ച് നടപടി സ്വീകരിക്കും. ടൂറിസ്റ്റുകളോടുള്ള പോലീസിന്റെ സമീപനത്തില് മാറ്റം വരണം. ഇത്തരം സംഭവങ്ങള് ടൂറിസം മേഖലയ്ക്ക് തന്നെ തിരിച്ചടിയുണ്ടാകും. വിഷയം മുഖ്യമന്ത്രിയുടെ ശ്രദ്ധയില്പ്പെടുത്തിയിട്ടുണ്ടെന്നും മന്ത്രി പറഞ്ഞു. തിരുവനന്തപുരം കോവളത്താണ് സംഭവം നടന്നത്. ബിവറേജില്നിന്ന് മദ്യവുമായി എത്തിയ സ്വീഡിഷ് പൗരനായ സ്റ്റീവിനെയാണ് പോലീസ് തടഞ്ഞത്. ബില്ലില്ലാത്തതിനാല് മദ്യം കൊണ്ടുപോകാനാകില്ലെന്ന് ചൂണ്ടിക്കാട്ടിയാണ് ഇയാളെ പോലീസ് തടഞ്ഞത്. ഇതോടെ സ്റ്റീവ് മദ്യം ഒഴുക്കിക്കളഞ്ഞു. പിന്നീട് ബിവറേജില് പോയി ബില്ലും വാങ്ങി പോലീസ് സ്റ്റേഷനില് ഹാജരാക്കി.
