കല്പ്പറ്റ : വയനാട് ഉരുള്പൊട്ടല് ദുരന്ത ബാധിതരുടെ പുനരധിവാസത്തിന്, കേന്ദ്രം അനുവദിച്ച വായ്പ എങ്ങനെ വിനിയോഗിക്കണമെന്ന് ചര്ച്ച ചെയ്യാന് വിവിധ വകുപ്പ് സെക്രട്ടറിമാരുടെ യോഗം വിളിക്കും. എത്രയും പെട്ടെന്ന് തുക വിനിയോഗിക്കാന് വഴി ആലോചിക്കും. ദുരന്തനിവാരണ വകുപ്പിന്റെ നേതൃത്വത്തിലാണ് പദ്ധതി തയ്യാറാക്കുന്നത്. മുഖ്യമന്ത്രിയുടെ ഓഫീസ് മുന്കയ്യെടുത്താണ് തുടര് നടപടി ചര്ച്ച ചെയ്യുന്നത്. പദ്ധതി തുടങ്ങി വെച്ച ശേഷം കേന്ദ്രത്തോട് കൂടുതല് സമയം തേടും.
529 കോടിയുടെ വായ്പ ഗ്രാന്റിന് തുല്യം, 50 വര്ഷത്തിന് ശേഷമുള്ള തിരിച്ചടവില് പിണറായി ഇപ്പോള് ബേജാറാവേണ്ട: സുരേന്ദ്രന്
വയനാട് ഉരുള് പൊട്ടല് ദുരന്ത ബാധിതരുടെ പുനരധിവാസത്തിനെന്ന പേരിലാണ് 529.50 കോടിയുടെ വായ്പ കേന്ദ്രം അനുവദിച്ചത്. മാര്ച്ച് 31 നകം ഉപയോഗിക്കണമെന്ന് വ്യവസ്ഥയോടെയാണ് മൂലധനിക്ഷേപ പദ്ധതികള്ക്കുള്ള പ്രത്യേക സഹായ പദ്ധതിയില് വായ്പ അനുവദിച്ചത്. ദുരന്ത ബാധിതരെ പുനരധിവസിപ്പിക്കുന്ന രണ്ടു ടൗണ്ഷിപ്പുകളിലെ പൊതുകെട്ടിടങ്ങള്, 110 കെവി സബ് സ്റ്റേഷന്, റോഡുകള്, പാലം, വെള്ളാര്മല, മുണ്ടക്കൈ സ്കൂളുകളുടെ പുനര്നിര്മാണം,വൈത്തിരി താലൂക്ക് ആശുപത്രിയില് കിടത്തി ചികിത്സാ സൗകര്യമുള്ള കെട്ടിടം തുടങ്ങിയ 16 പദ്ധതികള്ക്കാണ് വായ്പ അനുവദിച്ചത്. മൂലധന നിക്ഷേപ പദ്ധതികളിലെ വായ്പ 50 വര്ഷം കൊണ്ട് തിരിച്ചടയ്ക്കണം.
