ന്യൂഡെല്ഹി: രാജ്യത്തെ പുതുമുഖങ്ങള്ക്ക് സന്തോഷ വാര്ത്ത. രാജ്യത്തെ മുന്നിര ഇന്ത്യന് ഐടി കമ്പനികള് 2023 ജൂലൈ-ഡിസംബര് കാലയളവില് രാജ്യത്തുടനീളമുള്ള ഐടി, ഐടി ഇതര മേഖലകളില് ഏകദേശം 50,000 പുതുമുഖങ്ങളെ നിയമിക്കാന് തയ്യാറെടുക്കുന്നതായി ടീം ലീസ് (TeamLease) എഡ്ടെക് പ്ലാറ്റ്ഫോമിന്റെ ഏറ്റവും പുതിയ സര്വേ.ഐടി വ്യവസായത്തിനുള്ളില് ഡിജിറ്റല് പരിവര്ത്തന സംരംഭങ്ങള് അതിവേഗം സ്വീകരിക്കുന്നതോടെ, ക്ലൗഡ് കമ്പ്യൂട്ടിംഗ്, ആര്ട്ടിഫിഷ്യല് ഇന്റലിജന്സ് (AI), സൈബര് സുരക്ഷ, മറ്റ് നൂതന സാങ്കേതികവിദ്യകള് എന്നിവയില് പുതിയ ബിസിനസ് അവസരങ്ങള് സൃഷ്ടിക്കപ്പെടുകയാണെന്ന് സര്വേയില് പറയുന്നു. ഇന്നത്തെ ഏതൊരു കമ്പനിയും അതിന്റെ മൊത്തത്തിലുള്ള ബിസിനസ് തന്ത്രത്തില് എഐ ഉള്പ്പെടുത്താതിരിക്കുന്നത് വളരെ നിരുത്തരവാദപരമായിരിക്കുമെന്നും നിലവില്, പുതിയ കാലത്തെ ജീവനക്കാരില് തൊഴിലുടമകള് ഈ സവിശേഷതകളെല്ലാം അന്വേഷിക്കുകയാണെന്നും ടീം ലീസ് എഡ്ടെക്സ്ഥാപകനും സിഇഒയുമായ ശന്തനു റൂജ് പറഞ്ഞു. ഇന്ത്യയിലുടനീളമുള്ള 18 വ്യവസായങ്ങളില് 737 ചെറുകിട, ഇടത്തരം, വന്കിട കമ്പനികള്ക്കിടയില് നടത്തിയ സര്വേയില് 2023 ജൂലൈ-ഡിസംബര് കാലയളവില് പുതിയ റിക്രൂട്ട്മെന്റ് നടത്താനുള്ള കമ്പനികളുടെ ഉദ്ദേശ്യം 73 ശതമാനമാണെന്ന് വ്യക്തമാക്കുന്നു. അതില് സ്റ്റാര്ട്ടപ്പുകളും ഉള്പ്പെടുന്നു. ഈ വര്ഷം ജനുവരി മുതല് ജൂണ് വരെയുള്ള കാലയളവില്, പുതുമുഖ പ്രതിഭകളുടെ ആവശ്യം 62 ശതമാനത്തില് നിന്ന് മൂന്ന് ശതമാനം വര്ധിച്ചു. 2023 ജൂലൈ-ഡിസംബര് മാസങ്ങളില് പുതുമുഖങ്ങളെ നിയമിക്കാന് ഉദ്ദേശിക്കുന്ന മികച്ച മൂന്ന് വ്യവസായങ്ങള് ഇ-കൊമേഴ്സ്, ടെക് സ്റ്റാര്ട്ടപ്പുകള് (59 ശതമാനം), ടെലികോം (53 ശതമാനം), എന്ജിനീയറിംഗ്, ഇന്ഫ്രാസ്ട്രക്ചര് (50 ശതമാനം) എന്നിവയാണ്.റിപ്പോര്ട്ടുകള് പ്രകാരം, പുതുമുഖങ്ങള്ക്ക് എന്ജിനീയര് (DevOps), ചാര്ട്ടേഡ് അക്കൗണ്ടന്റ്, അനലിറ്റിക്സ് (SEO), ഡിസൈനര് (UX) തുടങ്ങിയ ജോലികള് കണ്ടെത്താനാകും. ബിസിനസ് അനലിറ്റിക്സ്, ബ്ലോക്ക്ചെയിന്, ക്ലൗഡ് കംപ്യൂട്ടിംഗ്, ഡാറ്റ എന്ക്രിപ്ഷന്, സപ്ലൈ ചെയിന് മാനേജ്മെന്റ്, മെഷീന് ലേണിംഗ്, ഡാറ്റ അനാലിസിസ്, സെര്ച്ച് എഞ്ചിന് ഒപ്റ്റിമൈസേഷന് (SEO) എന്നിവ തൊഴിലുടമകള് പുതുമുഖങ്ങളില് നിന്ന് പ്രതീക്ഷിക്കുന്ന പ്രധാനപ്പെട്ട കഴിവുകളില് ചിലതാണെന്ന് റിപ്പോര്ട്ട് പറയുന്നു.ഐടി മേഖലയ്ക്ക് പുറമേ, അടുത്ത ആറ് മാസത്തിനുള്ളില്, നിര്മാണം, ഇ-കൊമേഴ്സ്, ടെലികോം, ഫാര്മസ്യൂട്ടിക്കല്സ് തുടങ്ങി നിരവധി മേഖലകളില് വിവിധ ജോലികളിലേക്കുള്ള റിക്രൂട്ട്മെന്റില് വര്ധനവ് കാണാം. ഇന്ത്യയിലുടനീളം ഇലക്ട്രോണിക് നിര്മാണ പ്ലാന്റുകള് സ്ഥാപിക്കുന്നതിനായി നിരവധി വിദേശ കമ്പനികള് 1,200 മില്യണ് ഡോളറിന്റെ ഗണ്യമായ നിക്ഷേപം നടത്തുന്നുണ്ടെന്ന് ടീംലീസ് പ്ലാറ്റ്ഫോം പറഞ്ഞു. ഈ സംരംഭം വിവിധ മേഖലകളില് 20,000 തൊഴിലവസരങ്ങള് സൃഷ്ടിക്കുമെന്ന് പ്രതീക്ഷിക്കുന്നു. ഇതുകൂടാതെ, 5ജി ബൂം ഇന്ത്യയിലെ ടെലികോം വിപണിയിലെ വന്കിട കമ്ബനികളില് പുതുതായി വരുന്ന 1000-ത്തിലധികം തൊഴിലവസരങ്ങള് സൃഷ്ടിക്കുമെന്ന് കരുതുന്നു.
