തൊടുപുഴ: അമ്മയുടെ സുഹൃത്ത് ക്രൂരമായി മര്ദ്ദിച്ച ഏഴ് വയസ്സുകാരന്റെ നില അതീവഗുരുതരമായി തുടരുന്നു. ആന്തരിക രക്തസ്രാവം നിയന്ത്രിക്കാനാവുന്നില്ല. കുട്ടിയുടെ ശ്വാസകോശത്തിനും ഹൃദയത്തിനും വന്കുടലിനും തകരാറ് സംഭവിച്ചിട്ടുണ്ട്. മര്ദ്ദനത്തില് തലയോട് പൊട്ടിയ കുട്ടിയുടെ ജീവന് വെന്റിലേറ്ററിന്റെ സഹായത്തോടെയാണ് നിലനിര്ത്തുന്നത്. കുട്ടിയുടെ അടുത്ത 12 മണിക്കൂര് നിര്ണ്ണായകമാണ്. കഴിഞ്ഞ ദിവസം കുട്ടിയുടെ തലയ്ക്ക് ശസ്ത്രക്രിയ നടത്തിയെങ്കിലും ആരോഗ്യനിലയില് പുരോഗതിയുണ്ടായില്ല.
അറസ്റ്റിലായ പ്രതി അരുണ് ആനന്ദിനെ ഇന്ന് തൊടുപുഴ മജിസ്ട്രേറ്റ് കോടതിയില് ഹാജരാക്കും. കുട്ടികള്ക്കെതിരേയുള്ള പീഡനവുമായി ബന്ധപ്പെട്ട അനേകം കുറ്റങ്ങള്ക്ക് പുറമെ വധശ്രമം ഉള്പ്പെടെയുള്ള കുറ്റങ്ങളാണ് ഇയാള്ക്കെതിരെ ചുമത്തിയിരിക്കുന്നത്.
വ്യാഴാഴ്ച പുലര്ച്ചെയാണ് തലയോട്ടി പൊട്ടിയ നിലയില് കുഞ്ഞിനെ അമ്മയും സുഹൃത്തായ അരുണ് ആനന്ദും ചേര്ന്ന് കോലഞ്ചേരിയിലെ സ്വകാര്യ ആശുപത്രിയില് കൊണ്ടുവരുന്നത്. രക്തത്തില് കുളിച്ച കുഞ്ഞിന്റെ തലച്ചോറ് പുറത്തു വന്ന നിലയിലായിരുന്നു. എന്താണ് സംഭവിച്ചതെന്ന് ഡോക്ടര്മാര് ചോദിച്ചപ്പോള് കുട്ടിയുടെ അമ്മ ആദ്യം സോഫയില് നിന്ന് വീണ് തല പൊട്ടിയെന്നാണ് പറഞ്ഞത്. എന്നാല്, കുട്ടിയെ പരിശോധിച്ച ഡോക്ടര്മാര്ക്ക് സംശയം തോന്നി. ബലമുള്ള എന്തോ വസ്തു വച്ച് തലയിലടിച്ച പോലെയായിരുന്നു കുട്ടിയുടെ പരിക്കുകള്.
ഡോക്ടര്മാര് കുഞ്ഞിന് അടിയന്തരശസ്ത്രക്രിയ നടത്തി. തുടര്ന്ന് പൊലീസിനെ വിവരമറിയിച്ചു. പൊലീസെത്തി കുട്ടിയുടെ അമ്മയുടെ സുഹൃത്തായ അരുണ് ആനന്ദിനോട് വിശദാംശങ്ങള് ചോദിച്ചു. എന്നാല് ചോദ്യം ചെയ്യലിനോട് സഹകരിക്കാനോ പൊലീസ് നിര്ദേശിച്ചതു പോലെ ആംബുലന്സില് കയറാനോ ഇയാള് തയ്യാറായില്ല. അരുണ് മദ്യലഹരിയിലായിരുന്നു എന്നാണ് പൊലീസ് നല്കുന്ന വിവരം.
എട്ട് മാസമായി അരുണ് ആനന്ദിനൊപ്പം താമസിക്കുകയായിരുന്നു ഈ യുവതിയും രണ്ട് കുട്ടികളും. കുട്ടികളുടെ അച്ഛന് ഒരു വര്ഷം മുമ്പ് മരിച്ചിരുന്നു. ഇതിന് ശേഷമാണ് അരുണിനൊപ്പം യുവതി തൊടുപുഴയില് വന്ന് താമസമാക്കിയത്. ഏഴ് വയസ്സുകാരനെ ഒരു മാസം മുമ്പ് മാത്രമാണ് സ്കൂളില് ചേര്ത്തത്.
തന്നെയും കുട്ടികളെയും ഇയാള് ക്രൂരമായി മര്ദ്ദിക്കാറുണ്ടെന്നാണ് യുവതി മൊഴി നല്കിയത്. ആദ്യം ഉണ്ടായ കാര്യങ്ങള് പൊലീസിനോട് പറയാതിരുന്നത് അരുണ് ആനന്ദിനെ ഭയന്നാണ്. ഇയാള് മാരകമായി ഉപദ്രവിക്കാറുണ്ടെന്നും തുറന്ന് പറയാന് ഭയമായിരുന്നെന്നും യുവതി പറയുന്നു. ഇവരുടെ മുഖത്തും കണ്ണിലും അടി കൊണ്ട് നീര് വന്ന് വീര്ത്ത പാടുകളുണ്ട്. അന്ന് രാത്രി യുവതിയും അരുണും പുറത്ത് പോയി വന്നപ്പോള് ഇളയ കുഞ്ഞ് സോഫയില് മൂത്രമൊഴിച്ചത് കണ്ടു. അരുണ് മദ്യപിച്ച നിലയിലായിരുന്നു. മൂത്ത കുട്ടിയോട് എന്താണ് സംഭവിച്ചതെന്ന് ചോദിച്ചു. ഉത്തരം കിട്ടാതായതോടെ കുഞ്ഞിനെ ക്രൂരമായി മര്ദ്ദിക്കുകയായിരുന്നു.
