കേരളത്തെ പിടിച്ചുലച്ച പെരിയ ഇരട്ടക്കൊല കേസില് കുറ്റക്കാരെന്ന് കണ്ടെത്തിയ പ്രതികള്ക്ക് പ്രത്യേക സിബിഐ കോടതി ഇന്ന് ശിക്ഷ വിധിക്കും. ഒന്നാംപ്രതിയും കൊലപാതകത്തിന്റെ മുഖ്യ ആസൂത്രകനുമായ സിപിഐഎം പെരിയ ലോക്കല് കമ്മിറ്റി മുന് അംഗം എ പീതാംബരനടക്കം 14 പ്രതികളെയാണ് പ്രത്യേക സിബിഐ കോടതി കുറ്റക്കാരായി കണ്ടെത്തിയത്.
ഉദുമ മുന് എംഎല്എ കെവി കുഞ്ഞിരാമനും കുറ്റക്കാരനാണെന്ന് സിബിഐ കോടതി വിധിച്ചിരുന്നു. കേസിലെ പ്രതികളെ പോലീസ് കസ്റ്റഡിയില് നിന്നും മോചിപ്പിച്ച കുറ്റമാണ് കെ വി കുഞ്ഞിരാമന് ഉള്പ്പെടുന്ന 14, 20, 21, 22 പ്രതികള്ക്കെതിരെ തെളിഞ്ഞത്. പത്ത് പ്രതികളെ കോടതി വെറുതെ വിട്ടിരുന്നു. ഒന്ന് മുതല് എട്ട് വരെ പ്രതികള്ക്കെതിരെ കൊലപാതകം, ഗൂഡാലോചന, തെളിവ് നശിപ്പിക്കല്, നിയമവിരുദ്ധമായി സംഘം ചേരല്, കലാപം സൃഷ്ടിക്കല്, മാരക ആയുധങ്ങള് ഉപയോഗിച്ച് ഉപദ്രവം, തടഞ്ഞു നിര്ത്തല് തുടങ്ങിയ വകുപ്പുകള് നിലനില്ക്കുമെന്ന് കോടതി കണ്ടെത്തിയിട്ടുണ്ട്.
പത്ത്, പതിനഞ്ച് പ്രതികള്ക്കെതിരെ ഗൂഢാലോചന തെളിഞ്ഞതിനാല് പ്രധാന പ്രതികള്ക്കുള്ള ശിക്ഷ അവരും അനുഭവിക്കേണ്ടിവരും. പീതാംബരന് (മുന് പെരിയ എല്സി അംഗം), സജി സി. ജോര്ജ് (സജി), കെ.എം. സുരേഷ്, കെ. അനില് കുമാര് (അബു), ജിജിന്, ആര്. ശ്രീരാഗ് (കുട്ടു), എ. അശ്വിന് (അപ്പു), സുബീഷ് (മണി), എ. മുരളി, രഞ്ജിത്ത് (അപ്പു), കെ. മണികണ്ഠന് (ഉദുമ മുന് ഏരിയ സെക്രട്ടറി, കാഞ്ഞങാട് ബ്ലോക്ക് പഞ്ചായത്ത് പ്രസിഡന്റ്), .എ. സുരേന്ദ്രന് (വിഷ്ണു സുര), കെ.വി. കുഞ്ഞിരാമന് (ഉദുമ കുഞ്ഞിരാമന്)(മുന് എംഎല്എ, സിപിഎം ജില്ലാ സെക്രട്ടേറിയറ്റ് അംഗം), രാഘവന് വെളുത്തോളി (രാഘവന് നായര്) (മുന് പാക്കം ലോക്കല് സെക്രട്ടറി), കെ. വി. ഭാസ്കരന് എന്നിവരുള്പ്പടെയുള്ളവരെയാണ് കുറ്റക്കാരെന്ന് കണ്ടെത്തിയത്.
പ്രദീപ് (കുട്ടന്), ബി. മണികണ്ഠന് (ആലക്കോട് മണി), എന്. ബാലകൃഷ്ണന് (മുന് പെരിയ ലോക്കല് സെക്രട്ടറി), എ. മധു (ശാസ്ത മധു-അഞ്ചാംപ്രതി ജിജിന്റെ പിതാവ്), റെജി വര്ഗീസ്, എ. ഹരിപ്രസാദ്, പി. രാജേഷ്(രാജു) വി. ഗോപകുമാര് (ഗോപന് വെളുത്തോളി), പി.വി. സന്ദീപ് (സന്ദീപ് വെളുത്തോളി) എന്നിവരാണ് കുറ്റവിമുക്തര്.
