കൊല്ലം: റാപ്പര് വേടനെതിരായ വിദ്വേഷ പരാമര്ശത്തില് ആര്എസ്എസ് മുഖമാസികയായ കേസരിയുടെ മുഖ്യപത്രാധിപര് എന് ആര് മധുവിന്റെ അറസ്റ്റ് രേഖപ്പെടുത്തി. കൊല്ലം കിഴക്കേ കല്ലട പൊലീസ് സ്റ്റേഷനില് ഹാജരായ എന്ആര് മധുവിനെ മൊഴി രേഖപ്പടുത്തിയ ശേഷം ആള് ജാമ്യത്തില് വിട്ടയച്ചു. സിപിഐഎം കിഴക്കേ കല്ലട ലോക്കല് സെക്രട്ടറി വേലായുധന്റെ പരാതിയിലാണ് എന് ആര് മധുവിനെതിരെ കേസെടുത്തത്.
വേടന്റെ പാട്ടുകള് ജാതി ഭീകരവാദം പ്രചരിപ്പിക്കുന്നുവെന്നായിരുന്നു ഡോ. എന് ആര് മധു പറഞ്ഞത്. വേടന്റെ പിന്നില് രാജ്യത്തിന്റെ വിഘടനവാദികളാണെന്നും വളര്ന്നു വരുന്ന തലമുറയുടെ മനസിലേക്ക് വിഷം കുത്തിവെക്കുന്ന കലാഭാസമായി അരങ്ങ് വാഴുകയാണെന്നും മധു പറഞ്ഞിരുന്നു.
വേടന് പിന്നില് ശക്തമായ സ്പോണ്സര് ശക്തികള് ഉണ്ട്. അത് സൂക്ഷ്മമായി പഠിച്ചാല് രാജ്യത്തിന്റെ വിഘടനം സ്വപ്നം കണ്ട് കഴിയുന്ന തമോമയ ശക്തികള് അയാളുടെ പിന്നിലുണ്ടെന്ന് കൃത്യമാണ്. അത്തരം കലാഭാസങ്ങളെ നാലമ്പലങ്ങളില് കടന്ന് വരുന്നത്.ചെറുത്ത് തോല്പ്പിക്കണം. വേടന്റെ പാട്ടിന് ആള് കൂടാന് പാട്ട് വെയ്ക്കുന്നവര് അമ്പല പറമ്പില് ക്യാബറയും വെയ്ക്കുമെന്നും അദ്ദേഹം പറഞ്ഞിരുന്നു. ഇതിനെതിരെ എടുത്ത പരാതിയിലാണ് മധുവിനെതിരെ കേസെടുത്തത്.
