പത്തനംതിട്ട : കിഴക്കന് മേഖലയില് ശക്തമായ മഴയും മലവെള്ളപ്പാച്ചിലും ഉണ്ടായ സാഹചര്യത്തില് കൂടുതല് ജാഗ്രത പാലിക്കണമെന്ന് ജില്ലാ ദുരന്തനിവാരണ സമിതി അറിയിച്ചു.കേന്ദ്ര കാലാവസ്ഥ വകുപ്പിന്റെ പ്രവചന പ്രകാരം ശനി, ഞായര്- ദിവസങ്ങളില് അതിശക്തമായ മഴയ്ക്ക് സാധ്യതയുണ്ട്. 15 ന് ശക്തമായ മഴയ്ക്ക് സാധ്യതയുള്ളതിനാല് മഞ്ഞ മുന്നറിയിപ്പും പുറപ്പെടുവിച്ചു.ജില്ലയിലെ പ്രളയത്തിന്റെ പശ്ചാത്തലത്തില് ജനങ്ങള്ക്ക് പ്രത്യേക നിര്ദേശം പുറപ്പെടുവിച്ചു. ശക്തമായ മഴ തുടര്ച്ചയായി പെയ്യുന്ന സാഹചര്യത്തില് പ്രാദേശികമായ ചെറിയ വെള്ളപ്പൊക്കം മണ്ണിടിച്ചില്, ഉരുള്പൊട്ടല് തുടങ്ങിയവയ്ക്ക് സാധ്യത കൂടും. കഴിഞ്ഞ ദിവസങ്ങളില് വലിയ അളവില് മഴ ലഭിച്ച പ്രദേശങ്ങളില് മഴ തുടരുന്നു. അതിനാല് താഴ്ന്നപ്രദേശങ്ങള്, നദീതീരങ്ങള്, ഉരുള്പൊട്ടല്, മണ്ണിടിച്ചില് സാധ്യതയുള്ള മലയോര പ്രദേശങ്ങള് തുടങ്ങിയ ഇടങ്ങളിലുള്ളവര് അതീവ ജാഗ്രത പാലിക്കണം. ദുരിതാശ്വാസ ക്യാമ്പുകളിലേക്ക് മാറേണ്ട ഘട്ടങ്ങളില് പൂര്ണമായും കോവിഡ് മാനദണ്ഡങ്ങള് പാലിക്കണം. നദികള് മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീന്പിടിക്കാനോ മറ്റ് ആവശ്യങ്ങള്ക്കോ ഇറങ്ങാനോ പാടില്ല. കാറ്റില് മരങ്ങള് കടപുഴകി വീണും പോസ്റ്റുകള് തകര്ന്നു വീണും ഉണ്ടാകാനിടയുള്ള അപകടങ്ങളെയും ശ്രദ്ധിക്കണം. അണക്കെട്ടുകളുടെ താഴെ താമസിക്കുന്നവര് അണക്കെട്ടുകളില് നിന്ന് വെള്ളം പുറത്തേക്ക് ഒഴുക്കി വിടാനുള്ള സാധ്യത കണ്ട്ത തയ്യാറെടുപ്പ് നടത്തി അധികൃതരുടെ നിര്ദേശങ്ങള്ക്ക് അനുസരിച്ച് ആവശ്യമെങ്കില് മാറിത്താമസിക്കണം. മലയോര മേഖലയിലേക്കുള്ള സഞ്ചാരം പൂര്ണമായി ഒഴിവാക്കണമെന്നും അധികൃതര് അറിയിച്ചു.
