നിയമസഭയിലെ സന്ദര്ശക തിരക്ക് ഒഴിവാക്കാന് അടുത്ത സമ്മേളനം മുതല് പ്രായോഗികമായ നിയന്ത്രണങ്ങള് കൊണ്ടുവരുമെന്ന് സ്പീക്കര് വ്യക്തമാക്കി. സഭയിലെ വലിയ തിരക്ക് കാരണം വോട്ടിങ്ങിന് കൃത്യസമയത്ത് എത്തിച്ചേരാന് കഴിഞ്ഞില്ലെന്ന മന്ത്രി ഷിബു ബേബി ജോണിന്റെ പരാതിയെത്തുടര്ന്നാണ് അടിയന്തിര നടപടിക്ക് സ്പീക്കര് നിര്ദ്ദേശം നല്കിയത്. സഭയുടെ ഇടനാഴികളില് ഉണ്ടാകുന്ന അനാവശ്യ തിരക്ക് കാരണം ജനപ്രതിനിധികളുടെയും മന്ത്രിമാരുടെയും ഔദ്യോഗിക നിര്വ്വഹണത്തിന് തടസ്സം നേരിടുന്നു എന്ന വിലയിരുത്തലിന്റെ അടിസ്ഥാനത്തിലാണ് അടുത്ത തവണ മുതല് സന്ദര്ശകര്ക്ക് നിയന്ത്രണം ഏര്പ്പെടുത്താന് തീരുമാനിച്ചത്.
ഓളം വെട്ടി നടക്കരുത്
നേരത്തെ നിയമസഭയില് എം എല് എമാര്ക്കടക്കം പല വിധ മുന്നറിയിപ്പുകള് സ്പീക്കര് തിരുവഞ്ചൂര് രാധാകൃഷ്ണന് നല്കിയതും വാര്ത്തയായിരുന്നു. ഗൗരവതരമായ ചര്ച്ചകള് നടക്കുമ്പോള് ഉല്ലാസയാത്ര നടത്തുന്നതുപോലെ സഭയുടെ നടുവിലൂടെ ഓളംവെട്ടി പോകരുതെന്ന് സ്പീക്കര് സാമാജികര്ക്ക് മുന്നറിയിപ്പ് നല്കിയിരുന്നു. പലപ്രാവശ്യം ഇക്കാര്യം പറഞ്ഞതാണെന്നും ഇനി പറയാന് ഇട വരുത്തരുതെന്നും അദ്ദേഹം വ്യക്തമാക്കിയിരുന്നു. ‘സഭ ഗൗരവകരമായി മുമ്പോട്ട് പോകുമ്പോള്, സഭയ്ക്കകത്ത് ഉല്ലാസയാത്ര നടത്തുന്നതുപോലെ, സഭയുടെ നടവിലൂടെ ഓളംവെട്ടി പോകുന്നത് ദയവായി ഒഴിവാക്കണം. പല പ്രാവശ്യം പറഞ്ഞതാണ്. ഇനി പറയാന് ഇടയാക്കരുത്’ – എന്നായിരുന്നു തിരുവഞ്ചൂരിന്റെ അന്നത്തെ മുന്നറിയിപ്പ്.