തിരുവനന്തപുരം: കശുവണ്ടി ഇറക്കുമതി അഴിമതിക്കേസില്, ഐഎന്ടിയുസി സംസ്ഥാന പ്രസിഡന്റ് ആര് ചന്ദ്രശേഖരനെ പ്രോസിക്യൂട്ട് ചെയ്യാന് സര്ക്കാര് അനുമതി. ഇന്ന് ഹൈക്കോടതിയില് തീരുമാനം അറിയിക്കും. കോര്പ്പറേഷന് മുന് എംഡി രതീഷിനേയും പ്രോസിക്യൂട്ട് ചെയ്യാന് വിഡി സതീശന് സര്ക്കാര് അനുമതി നല്കിയിട്ടുണ്ട്.
പിണറായി സര്ക്കാര് മൂന്ന് തവണ അനുമതി നിഷേധിച്ചതിലാണ് ഇപ്പോള് വിഡി സതീശന് സര്ക്കാര് അനുമതി നല്കിയിരിക്കുന്നത്. നടപടി ക്രമങ്ങളിലെ പ്രശ്നങ്ങള് മാത്രമാണ് സിബിഐ കണ്ടെത്തിയതെന്നും അതിനാലാണ് ആര് ചന്ദ്രശേഖരനെ അടക്കം പ്രോസിക്യൂട്ട് ചെയ്യാന് അനുമതി നിഷേധിച്ചതെന്നുമാണ് എല്ഡിഎഫ് സര്ക്കാര് വിശദീകരിച്ചിരുന്നത്.
മനോജ് കടകംപള്ളി നല്കിയ ഹര്ജിയിന്മേല് കോടതി ഇടപെടലുണ്ടായതിന് പിന്നാലെയാണ് ഇപ്പോള് സര്ക്കാര് അനുമതി നല്കിയിരിക്കുന്നത്. ഈ കേസില് ഹൈക്കോടതി നിര്ദേശം പാലിക്കുമെന്നതാണ് നിലപാടെന്ന് മുഖ്യമന്ത്രി വി ഡി സതീശന് വിശദീകരിച്ചിരുന്നു. 2006 മുതല് 2015 വരെയുള്ള കാലയളവിലാണ് അസംസ്കൃത കശുവണ്ടി ഇറക്കുമതി ചെയ്തതുമായി ബന്ധപ്പെട്ട് കോടികളുടെ അഴിമതിയെന്ന് ആരോപണമുയര്ന്നത്.