ലഹരിയോട് നോ പറയും
കൊച്ചി: ലഹരിവേട്ടയായ ‘ഓപ്പറേഷന് തൂഫാന്’ തമിഴ്നാട് മുഖ്യമന്ത്രി ജോസഫ് വിജയ് പരിപൂര്ണ പിന്തുണ വാഗ്ദാനം ചെയ്തതായി ആഭ്യന്തരമന്ത്രി രമേശ് ചെന്നിത്തല. രാവിലെ 11. 30ന് ചെന്നൈയിലെത്തി ചെന്നിത്തല വിജയ്യുമായി കൂടിക്കാഴ്ച നടത്തിയിരുന്നു. ഇതിനുപിന്നാലെയാണ് വാര്ത്താസമ്മേളനത്തില് പിന്തുണയെക്കുറിച്ച് ആഭ്യന്തരമന്ത്രി അറിയിച്ചത്. ചര്ച്ച അരമണിക്കൂര് നീണ്ടെന്നും ഓപ്പറേഷന് തൂഫാനില് തമിഴ്നാട് സഹകരിക്കുമെന്നും മന്ത്രി വ്യക്തമാക്കി.
കേരള – തമിഴ്നാട് അതിര്ത്തിയില് പരിശോധന കടുപ്പിക്കും. ഇരുസംസ്ഥാനങ്ങളിലെയും പൊലീസ് സംവിധാനങ്ങള് ലഹരി മാഫിയയെ തകര്ക്കാന് കൈകോര്ക്കും. കേരളത്തില് ഓപ്പറേഷന് തൂഫാന്റെ ബ്രാന്ഡ് അംബാസഡറായ മോഹന്ലാലിനൊപ്പം കൊച്ചിയില് സംഘടിപ്പിക്കുന്ന പരിപാടിയില് പങ്കെടുക്കാന് വിജയ്യെ ക്ഷണിച്ചിട്ടുണ്ട്. പരിപാടിയില് പങ്കെടുക്കാനുള്ള താത്പര്യം വിജയ് അറിയിച്ചതായും ചെന്നിത്തല പറഞ്ഞു. മോഹന്ലാലും വിജയ്യും ഒന്നിച്ചഭിനയിച്ച ‘ജില്ല’ എന്ന തമിഴ് സൂപ്പര്ഹിറ്റ് ചിത്രത്തിന്റെ പേരും ആഭ്യന്തരമന്ത്രി പരാമര്ശിച്ചു. കഴിഞ്ഞയാഴ്ച കര്ണാടക മുഖ്യമന്ത്രി ഡി.കെ ശിവകുമാറിനെയും ബംഗളുരുവിലെത്തി ചെന്നിത്തല കണ്ടിരുന്നു.
ആഭ്യന്തര വകുപ്പിന്റെ ലഹരിവേട്ടയായ ‘ഓപ്പറേഷന് തൂഫാന്’ ദക്ഷിണേന്ത്യന് സംസ്ഥാനങ്ങളുമായി ചേര്ന്ന് ശക്തിപ്രാപിക്കുകയാണ്. തമിഴ്നാട്, കര്ണാടകം, ആന്ധ്രാപ്രദേശ്, തെലങ്കാന, പുതുച്ചേരി സംസ്ഥാനങ്ങളിലെ പൊലീസും കേന്ദ്ര ഏജന്സികളുമായും ചേര്ന്നുള്ള ഓപ്പറേഷനാണ് ഇനി നടക്കുകയെന്നാണ് ആഭ്യന്തരമന്ത്രി അറിയിച്ചിരിക്കുന്നത്. അഞ്ച് സംസ്ഥാനങ്ങളിലെ പൊലീസ് ഉന്നതരെ തിരുവനന്തപുരത്തേക്ക് ക്ഷണിച്ചുവരുത്തി ഏകോപനവും പങ്കാളിത്തവും ഉറപ്പാക്കിയിരുന്നു. ‘ഓപ്പറേഷന് തൂഫാന്’ മറ്റ് സംസ്ഥാനങ്ങളിലും ചലനമുണ്ടാക്കിയെന്ന് പ്രശംസിച്ച അന്യസംസ്ഥാന പൊലീസ് ഉന്നതര്, തൂഫാന് എല്ലാ പിന്തുണയും വാഗ്ദാനം ചെയ്തിട്ടുണ്ട്.
