തൃശൂർ: സിപിഎം മുതിർന്ന നേതാവും മുൻ ജില്ലാ സെക്രട്ടറിയും സംസ്ഥാന സെക്രട്ടേറിയറ്റ് അംഗവുമായിരുന്ന ബേബി ജോൺ അന്തരിച്ചു. ദീർഘനാളായി അസുഖബാധിതനായി ചികിത്സയിലായിരുന്നു. തൃശൂർ ജില്ലയിലെ സിപിഎമ്മിന്റെ വളർച്ചയിൽ നിർണായക പങ്കുവഹിച്ച നേതാക്കളിലൊരാളായിരുന്നു അദ്ദേഹം. 1960കളിൽ തന്നെ പാർട്ടി പ്രവർത്തനരംഗത്ത് സജീവമായ ബേബി ജോൺ, തൃശൂർ ജില്ലയിലെ പടിഞ്ഞാറൻ മേഖലയിൽ പാർട്ടിക്ക് ശക്തമായ അടിത്തറയുണ്ടാക്കുന്നതിൽ പ്രധാന പങ്കുവഹിച്ചു.
സിഐടിയുവിലും സജീവമായിരുന്ന ബേബി ജോൺ തൃശൂർ ജില്ലാ സെക്രട്ടറിയായും പ്രവർത്തിച്ചിട്ടുണ്ട്. 2006ലാണ് ജില്ലാ സെക്രട്ടറിയുടെ ചുമതല ഏറ്റെടുത്തത്. പിന്നീട് സംസ്ഥാന സെക്രട്ടേറിയറ്റ് അംഗമായും പ്രവർത്തിച്ചു. പ്രഗത്ഭനായ വാഗ്മി എന്ന നിലയിലും ബേബി ജോൺ ശ്രദ്ധേയനായിരുന്നു. പാർട്ടിയുടെ സൈദ്ധാന്തിക നിലപാടുകളും ജനകീയ വിഷയങ്ങളും സാധാരണ പ്രവർത്തകർക്ക് എളുപ്പത്തിൽ മനസിലാകുന്ന തരത്തിൽ ലളിതമായി അവതരിപ്പിക്കാനുള്ള അദ്ദേഹത്തിന്റെ കഴിവ് ഏറെ പ്രശംസിക്കപ്പെട്ടിരുന്നു. മികച്ച പ്രാസംഗികൻ എന്ന നിലയിൽ പാർട്ടി വേദികളിലും പൊതുസമൂഹത്തിലും അദ്ദേഹം ശ്രദ്ധനേടി.
അദ്ധ്യാപകനായാണ് ഔദ്യോഗിക ജീവിതം ആരംഭിച്ചത്. അദ്ധ്യാപക ജോലിയിൽനിന്ന് വിരമിച്ച ശേഷം മുഴുവൻ സമയവും പാർട്ടി പ്രവർത്തകനായി. തുടർന്ന് സംഘടനാ പ്രവർത്തനത്തിലും തൊഴിലാളി സംഘടനാ രംഗത്തും സജീവമായി.
