ഡല്ഹി: മോദി സര്ക്കാരിന്റെ മൂന്നാം ഊഴത്തിലെ നിര്ണായകമായ കേന്ദ്രമന്ത്രിസഭ പുനസംഘടന അടുത്തയാഴ്ച നടന്നേക്കുമെന്ന് സൂചന. ഇതുമായി ബന്ധപ്പെട്ട രാഷ്ട്രീയ നീക്കങ്ങള് തലസ്ഥാനത്ത് സജീവമായിക്കഴിഞ്ഞു. ആഭ്യന്തര മന്ത്രി അമിത് ഷാ കഴിഞ്ഞ ദിവസം രാഷ്ട്രപതി ദ്രൗപദി മുര്മുവിനെ സന്ദര്ശിച്ചിരുന്നു. ഈ കൂടിക്കാഴ്ച മന്ത്രിസഭാ പുനസംഘടനയുടെ മുന്നോടിയായാണെന്നാണ് രാഷ്ട്രീയ കേന്ദ്രങ്ങളില് നിന്നുള്ള വിലയിരുത്തല്. ധനമന്ത്രി നിര്മല സീതാരാമന് ഉള്പ്പെടെയുള്ള മുതിര്ന്ന നേതാക്കളെ മന്ത്രിസഭയില് നിന്ന് മാറ്റിയേക്കുമെന്ന സൂചനകളാണ് ഇപ്പോള് പുറത്തുവരുന്നത്. വരാനിരിക്കുന്ന സംസ്ഥാന നിയമസഭാ തിരഞ്ഞെടുപ്പുകളും പാര്ട്ടിയുടെ രാഷ്ട്രീയ സമവാക്യങ്ങളും മുന്നിര്ത്തി വന് അഴിച്ചുപണിക്കാണ് ബിജെപി ഒരുങ്ങുന്നത്.
ശക്തികാന്ത ദാസ് മന്ത്രിസഭയിലേക്ക്?
ഭരണരംഗത്തും സാമ്പത്തിക മേഖലയിലും വലിയ മാറ്റങ്ങള് ലക്ഷ്യമിട്ടുകൊണ്ടുള്ള നീക്കങ്ങളാണ് അണിയറയില് നടക്കുന്നത്. പ്രധാനമന്ത്രിയുടെ പ്രിന്സിപ്പല് സെക്രട്ടറിയും മുന് ആര്ബിഐ ഗവര്ണറുമായ ശക്തികാന്ത ദാസിനെ മന്ത്രിസഭയില് ഉള്പ്പെടുത്താന് ആലോചനയുള്ളതായാണ് റിപ്പോര്ട്ട്. സാമ്പത്തിക വിദഗ്ധനായ അദ്ദേഹത്തിന് നിര്ണായകമായ വകുപ്പ് നല്കിയേക്കുമെന്നാണ് വിവരം.
പുറത്തേക്കും അകത്തേക്കും ഒഴുകുന്ന പ്രമുഖര്
നിലവിലെ പ്രമുഖ മന്ത്രിമാരായ ധര്മ്മേന്ദ്ര പ്രധാന്, ഹര്ദീപ് സിംഗ് പുരി എന്നിവര്ക്ക് മന്ത്രിസ്ഥാനം നഷ്ടമായേക്കുമെന്ന അഭ്യൂഹങ്ങള് ശക്തമാണ്. ഇവരെ പാര്ട്ടി സംഘടന ചുമതലകളിലേക്ക് മാറ്റിയേക്കും. മുന് കേന്ദ്രമന്ത്രി അനുരാഗ് ഠാക്കൂര് വീണ്ടും മന്ത്രിസഭയിലേക്ക് തിരിച്ചെത്തുമെന്നാണ് ലഭിക്കുന്ന വിവരങ്ങള്. സജീവമായ പാര്ട്ടി പ്രവര്ത്തനവും യുവനേതൃത്വമെന്ന നിലയിലുള്ള പ്രതിച്ഛായയുമാണ് അദ്ദേഹത്തിന് അനുകൂലമാകുന്നത്.