എഡ്ജ്ബാസ്റ്റൺ: ഇംഗ്ലണ്ടിനെതിരായ ആദ്യ ഏകദിനത്തിൽ ടോസ് നഷ്ടപ്പെട്ട് ബൗളിംഗിനിറങ്ങിയ ഇന്ത്യക്ക് മികച്ച തുടക്കം. ഇന്ത്യൻ ബൗളർമാരുടെ ആക്രമണത്തിന് മുന്നിൽ തകർന്നടിഞ്ഞ ആതിഥേയർ 16 ഓവർ പിന്നിടുമ്പോൾ 100 കടക്കുന്നതിന് മുമ്പ് തന്നെ 5 വിക്കറ്റുകൾ നഷ്ടമായി.
തകർപ്പൻ പ്രകടനവുമായി ഗുർനൂർ ബ്രാർ, പ്രസിദ്ധ് കൃഷ്ണ എന്നിവർ രണ്ട് വിക്കറ്റ് വീതവും ജസ്പ്രീത് ബുംറ ഒരു വിക്കറ്റും വീഴ്ത്തിയാണ് ഇംഗ്ലീഷ് ബാറ്റിംഗ് നിരയുടെ നട്ടെല്ലൊടിച്ചത്. ഇംഗ്ലീഷ് ഓപ്പണർ ബെൻ ഡക്കറ്റിനെയും (43) അപകടകാരിയായ ജേക്കബ് ബെഥേലിനെയും (14) പുറത്താക്കി ഗുർനൂർ ബ്രാറാണ് ഇന്ത്യക്ക് ആദ്യ ബ്രേക്ക് ത്രൂ സമ്മാനിച്ചത്. തൊട്ടുപിന്നാലെ ക്യാപ്ടൻ ഹാരി ബ്രൂക്കിനെ (1) മടക്കി ബുംറയും കനത്ത പ്രഹരമേൽപ്പിച്ചു.
പിന്നാലെയെത്തിയ ജോസ് ബട്ലറെയും (5) സാം കറനെയും (0) അനായാസം കൂടാരം കയറ്റി പ്രസിദ്ധ് കൃഷ്ണ കൂടി കളം നിറഞ്ഞതോടെ ഇംഗ്ലണ്ട് പൂർണമായും പ്രതിരോധത്തിലായി. മത്സരത്തിന്റെ ആദ്യ ഘട്ടത്തിൽ തന്നെ മുൻനിര വിക്കറ്റുകൾ വീഴ്ത്താനായതോടെ കളി ഇപ്പോൾ പൂർണമായും ഇന്ത്യയ്ക്ക് അനുകൂലമാണ്.
