ഒറിഗൺ: അമേരിക്കയിൽ സ്‌കൂളിലുണ്ടായ വെടിവയ്‌പ്പിൽ മൂന്ന് കുട്ടികളടക്കം നാലുപേർ മരിച്ചു. വടക്കുപടിഞ്ഞാറൻ സംസ്ഥാനമായ ഒറിഗണിലാണ് സംഭവം. എലിമെന്ററി സ്‌കൂളിലെ 5,8, 11 വയസുകളുള്ള മൂന്ന് കുട്ടികൾക്കും ഒരു അദ്ധ്യാപകനുമാണ് സംഭവത്തിൽ ജീവൻ നഷ്‌ടമായത്.
അക്രമി ഒരു 16കാരനാണെന്നാണ് വിവരം. ഇയാളെ എതിരിടാനെത്തിയ ഒരാൾ വെടിവച്ചുകൊന്നതായാണ് സ്ഥിരീകരണം ലഭിച്ചിരിക്കുന്നത്. പ്രാദേശിക സമയം വ്യാഴാഴ്‌ച വൈകിട്ട് 5.30ന് (ഇന്ത്യൻ സമയം ഇന്ന്‌ പുലർച്ചെ 6 മണി) ആണ് സംഭവം. സിൽവർ റെയിൽ എലിമെന്ററി സ്‌കൂളിൽ ഷോട്‌ഗണുമായി എത്തിയ ഒരാൾ കാറിനുനേരെ വെടിയുതിർക്കുന്നു എന്ന സന്ദേശം ലഭിച്ചിട്ടാണ് പൊലീസ് സ്ഥലത്തെത്തിയത്. സംഭവത്തിൽ രണ്ടുപേർക്ക് ഗുരുതര പരിക്കേറ്റിട്ടുണ്ട്. ഏഴ് വയസുള്ള കുട്ടിയ്‌ക്കും 54 വയസുള്ള അദ്ധ്യാപകനുമാണ് പരിക്കേറ്റത്. ഇവരെ അടുത്തുള്ള സെന്റ് ചാൾസ് മെഡിക്കൽ സെന്ററിൽ പ്രവേശിപ്പിച്ചു.
സ്ഥലത്തെത്തിയ പൊലീസ് ഉടൻ കുട്ടികളെയും മറ്റ് ജീവനക്കാരെയും സ്‌‌കൂളിൽനിന്നും ഒഴിപ്പിച്ച് അടുത്തുള്ള പള്ളിയിലേക്ക് മാറ്റി. ഇതിനിടെ മറ്റൊരാൾ 16കാരനെ വെടിവച്ചിടുകയായിരുന്നു. കഴിഞ്ഞവർഷം ഇത്തരത്തിൽ അമേരിക്കയിൽ സ്‌കൂളുകളിൽ നടന്നത് 235 വെടിവയ്പ്പ് സംഭവങ്ങളാണ്. ഈ വർഷം ഇതുവരെ 149 സംഭവങ്ങൾ റിപ്പോർട്ട് ചെയ്യപ്പെട്ടു.
