കൊച്ചി : എറണാകുളത്ത് സിനഗോഗിന് തീയിട്ട കേസിലെ പ്രതി എബിൻ പോളിന് ഗുണ്ടാസംഘമായ ലോറൻസ് ബിഷ്ണോയ് ഗ്യാങ്ങുമായി ബന്ധമുണ്ടെന്ന് സംശയം. ടെലഗ്രാമിന്റെ ബിഷ്ണോയ് അനുകൂല ഗ്രൂപ്പുകളിൽ എബിൻപോൾ സജീവമായി ഇടപെട്ടിരുന്നതായി അന്വേഷണ സംഘത്തിന് വിവരം ലഭിച്ചതായി റിപ്പോർട്ടുണ്ട്. അക്രമം നടത്താൻ എബിന് നിർദ്ദേശം ലഭിച്ച ടെലഗ്രാം ഗ്രൂപ്പ് കേന്ദ്രീകരിച്ചാണ് അന്വേഷണം.
കൂടാതെ എബിന്റെ ഫോൺ സെർച്ച് ഹിസ്റ്ററിയിൽ ലോറൻസ് ബിഷ്ണോയിയെ കുറിച്ച് തെരഞ്ഞതായും കണ്ടെത്തിയിട്ടുണ്ട്. ടെലഗ്രാ ംഗ്രൂപ്പിലെ ബോസ് എന്ന ഐ.ഡിയിൽ നിന്നുള്ള നിർദ്ദേശത്തെ തുടർന്നാണ് സിനഗോഗിന് തീയിട്ടതെന്നാണ് എബിൻ പോൾ പൊലീസിനോട് വെളിപ്പെടുത്തിയിരുന്നത്. ഈ ബോസ് ബ്ഷ്ണോയ് സംഘത്തിലെ ആരെങ്കിലുമാണോ എന്നത് കണ്ടെത്താനുള്ള ശ്രമത്തിലാണ് അന്വേഷണ സംഘം.
അതേസമയം എബിൻ പോളിനെ അഞ്ച് ദിവസത്തെ പൊലീസ് കസ്റ്റഡിക്ക് ശേഷം കോടതിയിൽ ഹാജരാക്കി എറണാകുളം സബ് ജയിലിൽ റിമാൻഡ് ചെയ്തു. ഇയാളുടെ ജാമ്യാപേക്ഷ അവധി കഴിഞ്ഞ് കോടതി പരിഗണിക്കുമെങ്കിലും കൂടുതൽ ചോദ്യം ചെയ്യലിനും തെളിവെടുപ്പിനും വേണ്ടി വീണ്ടും കസ്റ്റഡിയിൽ ആവശ്യപ്പെടാനാണ് പൊലീസിന്റെ നീക്കം. ഇയാൾക്കെതിരെ യു.എ.പി.എ ചുമത്താൻ കൂടുതൽ തെളിവുകൾ ശേഖരിക്കാനുള്ള ശ്രമത്തിലാണ് അന്വേഷണ സംഘം. പ്രതിയുടെ ലാപ്ടോപ്പ്, മൊബൈൽ ഫോൺ എന്നിവയിൽ നിന്ന് ലഭിച്ച ഡിജിറ്റൽ വിവരങ്ങളുടെ അടിസ്ഥാനത്തിൽ യു.എ.പി.എ ചുമത്തുന്നത് സംബന്ധിച്ച് നിയമോപദേശം തേടും.
