ന്യൂഡൽഹി:ഗുണ്ടാതലവനും ലോറൻസ് ബിഷ്‌ണോയ് ഗാംഗിലെ സജീവ അംഗവുമായ ഹരിചന്ദ് ജാട്ട് എന്ന 'ഹരി ബോക്സർ' കാലിഫോർണിയയിൽ വച്ച് യുഎസ് അധികൃതരുടെ കസ്റ്റഡിയിലായി. ഡൽഹി പോലീസ് സ്‌പെഷ്യൽ സെല്ലിൽ നിന്നും ഹരിയാന സ്‌പെഷ്യൽ ടാസ്‌ക് ഫോഴ്‌സിൽ നിന്നുമുള്ള വിവരങ്ങളുടെ അടിസ്ഥാനത്തിൽ ഇന്നലെ രാത്രിയാണ് ഇയാളെ കസ്റ്റഡിയിലെടുത്തത്.
മുംബൈയിൽ ബോളിവുഡ് സംവിധായകൻ രോഹിത് ഷെട്ടിയുടെ വസതിക്ക് നേരെ വെടിവെയ്പ്പ് ഉണ്ടായ സംഭവം മുതൽ ഇന്ത്യൻ സുരക്ഷാ-രഹസ്യാന്വേഷണ ഏജൻസികൾ ബോക്‌സറുടെ നീക്കങ്ങൾ സൂക്ഷ്മമായി നിരീക്ഷിച്ചു വരികയായിരുന്നു. ഗുണ്ടാസംഘ തലവനെ ഇന്ത്യയിലേക്ക് തിരികെ കൊണ്ടുവരുന്നതിനായി സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) വഴി ആവശ്യമായ നിയമനടപടികൾ ആരംഭിക്കുമെന്നാണ് അധികൃതർ പ്രതീക്ഷിക്കുന്നത്.
ബോളിവുഡ് സൂപ്പർസ്റ്റാർ സൽമാൻ ഖാനുമായുള്ള ബന്ധത്തിന്റെ പേരിൽ രോഹിത് ഷെട്ടി, തുഷാർ കപൂർ, രൺവീർ സിംഗ് തുടങ്ങിയ പ്രമുഖരെ ബോക്സർ ഭീഷണിപ്പെടുത്തിയിരുന്നു. കാനഡയിലുള്ള നടനും സ്റ്റാൻഡ്-അപ്പ് കോമേഡിയനുമായ കപിൽ ശർമ്മയുടെ കഫേയ്ക്ക് നേരെ നടന്ന വെടിവെയ്പ്പിന് പിന്നിലും ഇയാളായിരുന്നു. ഈ വർഷം ജനുവരിയിൽ ഷെട്ടിയുടെ ജൂഹുവിലുള്ള വസതിക്ക് മുന്നിൽ നടന്ന വെടിവെയ്പ്പിന്റെ ഉത്തരവാദിത്തം സോഷ്യൽ മീഡിയ പോസ്റ്റുകളിലൂടെ ബോക്സർ ഏറ്റെടുത്തിരുന്നു.
കഴിഞ്ഞ മാസം നടൻ ടൈഗർ ഷ്രോഫിനെ ലക്ഷ്യമിട്ടു നടന്ന വെടിവെയ്പ്പുമായി ബന്ധപ്പെട്ട് ആയുധങ്ങൾ എത്തിച്ചു നൽകിയ ശൃംഖലയിലും ബോക്‌സറിന് പങ്കുള്ളതായി റിപ്പോർട്ടുകളുണ്ടായിരുന്നു. രാജസ്ഥാൻ സ്വദേശിയായ ബോക്സർ വിദേശത്തിരുന്നുകൊണ്ട് ലോറൻസ് ബിഷ്‌ണോയ് സംഘത്തിന്റെ പണം തട്ടൽ ശൃംഖല നിയന്ത്രിക്കുന്നതിൽ പ്രധാന പങ്കുവഹിച്ചിരുന്നു. 2022-ലാണ് ബോക്സർ യുഎസിലേക്ക് കടന്നത്.
ജയ്പൂരിലെ താമസം പഠനകാലത്ത് ബോക്‌സിംഗ് അഭ്യസിച്ചതിൽ നിന്നാണ് ഇയാൾക്ക് 'ബോക്സർ' എന്ന വിളിപ്പേര് ലഭിച്ചത്. ആദ്യകാലങ്ങളിൽ ചെറിയ വഴക്കുകളിൽ ഏർപ്പെട്ടിരുന്ന ഇയാൾ പിന്നീട് കവർച്ച, വധശ്രമം തുടങ്ങിയ ഗുരുതരമായ കുറ്റകൃത്യങ്ങളിലേക്ക് തിരിഞ്ഞു. ജയ്പൂർ, അൽവാർ, സികാർ, ധോൽപൂർ, കറൗളി തുടങ്ങിയ ഇന്ത്യയിലെ നിരവധി സ്ഥലങ്ങളിലായി 10-ലധികം കേസുകളാണ് ഇയാൾക്കെതിരെ രജിസ്റ്റർ ചെയ്തിട്ടുള്ളത്.
