ചെന്നൈ: ‘അർണബ്’ അതിതീവ്ര ചുഴലിക്കാറ്റായി മാറി. അർണബ് ചുഴലിക്കാറ്റ് ആന്ധ്രാപ്രദേശ് തീരത്തേക്ക് അടുക്കുന്നതിനിടയിൽ, ശക്തമായ മഴ, ശക്തമായ കാറ്റ്, വെള്ളപ്പൊക്ക സാധ്യത എന്നിവ നേരിടാൻ ആന്ധ്രാപ്രദേശ്, ഒഡീഷ, പശ്ചിമ ബംഗാൾ സംസ്ഥാനങ്ങളിലുടനീളം അധികൃതർ മുൻകരുതൽ നടപടികൾ ശക്തമാക്കി. അടുത്ത മണിക്കൂകളിൽ അനകാപ്പള്ളി, ശ്രീകാകുളം, വിശാഖപട്ടണം, വിസിയനഗരം എന്നീ ജില്ലകളിൽ മിതമായ മഴയ്ക്കും മണിക്കൂറിൽ 70 കിലോമീറ്റർ വരെ വേഗതയിലുള്ള കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് (ഐഎംഡി ) മുന്നറിയിപ്പ് നൽകുന്നു.
കേരളത്തിനു പ്രത്യേക മുന്നറിയിപ്പ് ഇല്ലെങ്കിലും കനത്ത മഴക്ക് സാധ്യതയുണ്ട്. നിലവിൽ മുന്നറിയിപ്പിനെ തുടര്‍ന്ന് ഇന്നും നാളെയുമായി 53 ട്രെയിനുകൾ റദ്ദാക്കി. ചുഴലിക്കാറ്റ് മണിക്കൂറിൽ 13 കിലോമീറ്റർ വേഗതയിൽ പടിഞ്ഞാറ്-വടക്കുപടിഞ്ഞാറൻ ദിശയിലാണ് സഞ്ചരിക്കുന്നത്. ഇതിന്റെ കേന്ദ്രം നിലവിൽ വിശാഖപട്ടണത്തിന് കിഴക്ക്-തെക്കുകിഴക്കായി 350 കിലോമീറ്റർ അകലെയാണ്. ചൊവ്വാഴ്ചയോടെ അതിതീവ്ര ചുഴലിക്കാറ്റായും ശക്തി പ്രാപിക്കും. തുടർന്ന് ബുധനാഴ്ച ഉച്ചയ്ക്ക് മുമ്പ് ബാപട്‌ലയ്ക്കും വിശാഖപട്ടണത്തിനും ഇടയിൽ ആന്ധ്രാപ്രദേശ്-യാനം തീരം കടക്കുമെന്നാണ് പ്രതീക്ഷിക്കുന്നത്.
2026-ൽ ബംഗാൾ ഉൾക്കടലിൽ രൂപംകൊള്ളുന്ന ആദ്യത്തെ ചുഴലിക്കാറ്റായ ഇത്, ബുധനാഴ്ച ഉച്ചയ്ക്ക് മുമ്പ് ബാപട്‌ലയ്ക്കും വിശാഖപട്ടണത്തിനും ഇടയിൽ കരതൊടുന്നതിന് മുമ്പ് 'അതിതീവ്ര ചുഴലിക്കാറ്റായി' മാറുമെന്ന് പ്രവചിക്കപ്പെടുന്നു. ഈ സമയത്ത് മണിക്കൂറിൽ 115-125 കിലോമീറ്റർ വേഗതയിലും പരമാവധി 140 കിലോമീറ്റർ വേഗതയിലുമുള്ള ശക്തമായ കാറ്റ് വീശിയടിച്ചേക്കാം.
ആന്ധ്രാപ്രദേശിൽ 10 ജില്ലകളിലെ സ്കൂളുകൾ അടച്ചിടാൻ ഉത്തരവിട്ടു. ഒക്ടോബർ 27, 28 തീയതികളിൽ വിജയ്വാഡയിൽ നടത്താനിരുന്ന ഫോറിൻ മെഡിക്കൽ ഗ്രാജുവേറ്റ്സ് ഇന്റേൺഷിപ്പ് അലോട്ട്‌മെന്റ് കൗൺസിലിംഗ് ആന്ധ്രാപ്രദേശ് മെഡിക്കൽ കൗൺസിൽ മാറ്റിവെച്ചു.
ഒഡീഷയിൽ ചുഴലിക്കാറ്റ് ഷെൽട്ടറുകൾ സജ്ജമാക്കുകയും ദുരിതാശ്വാസ പ്രവർത്തനങ്ങൾക്കായി 19 കോടി രൂപ അനുവദിക്കുകയും അപകടസാധ്യതയുള്ള പ്രദേശങ്ങളിൽ നിന്ന് ആളുകളെ ഒഴിപ്പിക്കാൻ പദ്ധതിയിടുകയും ചെയ്തു. മത്സ്യബന്ധനവും ഫെറി സർവീസുകളും നിർത്തിവെച്ചു, ബാധിത റൂട്ടുകളിലെ ട്രെയിൻ സർവീസുകൾ റദ്ദാക്കി. ഒഡീഷയിൽ പ്രസവത്തോടടുത്ത ഘട്ടത്തിലുള്ള 3,000 ഓളം സ്ത്രീകളെ മുൻകരുതലായി ആശുപത്രികളിലേക്കോ സുരക്ഷിതമായ സ്ഥലങ്ങളിലേക്കോ മാറ്റും.
പശ്ചിമ ബംഗാളിൽ തെക്കൻ ജില്ലകളെ കേന്ദ്രീകരിച്ച് മഴയ്ക്കും ശക്തമായ കാറ്റിനും സാധ്യതയുണ്ട്. ചുഴലിക്കാറ്റ് ഉള്ളിലേക്ക് നീങ്ങിയ ശേഷവും ഇതിന്റെ ആഘാതം തുടരുമെന്ന് പ്രതീക്ഷിക്കുന്നു.
