‘മുഖ്യമന്ത്രി ഏകപക്ഷീയമായി തീരുമാനമെടുക്കുന്നു’; മന്ത്രിസഭയ്‌ക്കുള്ളിലെ ഭിന്നത പരിഹരിക്കാൻ തിരക്കിട്ട നീക്കം

തിരുവനന്തപുരം: ഗുരുവായൂർ ദേവസ്വം നിയമനവുമായി ബന്ധപ്പെട്ട് മന്ത്രിസഭയ്‌ക്കുള്ളിലുള്ള ഭിന്നത പരിഹരിക്കാൻ തിരക്കിട്ട സമവായത്തിന് നീക്കം. മതിയായ കൂടിയാലോചനകളില്ലാതെ ഏകപക്ഷീയമായാണ് അംഗങ്ങളുടെ പട്ടിക തയ്യാറാക്കിയതെന്ന ഒരു വിഭാഗം മന്ത്രിമാരുടെ അതൃപ്‌തിയാണ് തർക്കത്തിന് വഴിവച്ചത്.

മുഖ്യമന്ത്രി ഏകപക്ഷീയമായി തീരുമാനം എടുക്കുന്നു എന്നാണ് മന്ത്രിമാരുടെ പരാതി. എന്നാല്‍, ദേവസ്വം മന്ത്രിയുടെ ഓഫീസിൽ നിന്നാണ് പട്ടിക തയാറാക്കിയതെന്നാണ് മുഖ്യമന്ത്രിയുടെ ഓഫീസ് പറയുന്നത്. വി ഡി സതീശനെ പിന്തുണച്ചാണ് ദേവസ്വം മന്ത്രി കെ മുരളീധരൻ പ്രതികരിച്ചത്. തന്നോട് ആലോചിച്ചാണ് തീരുമാനം എടുത്തതെന്ന് ദേവസ്വം മന്ത്രി വിശദീകരിച്ചു.

ജനറൽ വിഭാഗത്തിൽ രണ്ടും, ജീവനക്കാരുടെ പ്രതിനിധിയായി ഒരാളുടെയും ഒഴിവാണ്‌ നിലവിലുള്ളത്‌. ഇതിൽ കോൺഗ്രസ്‌ നേതാക്കളായ സി വി ബാലചന്ദ്രൻ, ശിവൻ പാലിയത്ത്‌ എന്നിവരെ ജനറൽ വിഭാഗത്തിലും പി അഭിലാഷിനെ ജീവനക്കാരുടെ പ്രതിനിധിയായുമാണ്‌ മുഖ്യമന്ത്രി പട്ടിക തയ്യാറാക്കിയതെന്നാണ്‌ വിവരം.

എൽഡിഎഫ്‌ സർക്കാരിന്റെ കാലത്ത്‌ നിയമിതനായ എ വി ഗോപിനാഥാണ്‌ ഗുരുവായൂർ ദേവസ്വം ബോർഡിന്‍റെ നിലവിലെ ചെയർമാൻ. ചെയർമാന്‌ ഒരു വർഷത്തിലേറെ കാലാവധി ബാക്കിയുണ്ട്‌. രുവായൂർ ദേവസ്വം ബോർഡ്‌ നിയമപ്രകാരം മന്ത്രിസഭയിലെ ഹിന്ദു അംഗങ്ങളാണ്‌ ദേവസ്വം ബോർഡ്‌ അംഗങ്ങളെ നിശ്‌ചയിക്കേണ്ടത്‌. മുഖ്യമന്ത്രിയടക്കം ഒമ്പത്‌ ഹിന്ദുക്കളാണ്‌ മന്ത്രിസഭയിലുള്ളത്‌. ഇതുസംബന്ധിച്ച ഫയലിൽ ആകെ ഒപ്പിട്ടത്‌ പട്ടികവിഭാഗ ക്ഷേമ മന്ത്രി കെ എ തുളസി മാത്രമാണ്‌.

Leave a Reply

Your email address will not be published. Required fields are marked *