കാബൂൾ: അഫ്ഗാനിസ്ഥാനിൽ പൗരാവകാശങ്ങൾക്ക് മേലുള്ള തങ്ങളുടെ കടുത്ത നിയന്ത്രണങ്ങൾ തുടർന്നുകൊണ്ട്, താലിബാൻ ഭരണകൂടം കോർണിയ മാറ്റിവെക്കൽ ശസ്ത്രക്രിയകൾ നിരോധിച്ചു. കാഴ്ച തിരികെ നൽകുന്ന ഇത്തരം ചികിത്സാ രീതികൾ ഇസ്ലാമിക നിയമങ്ങൾക്കെതിരാണെന്ന് ചൂണ്ടിക്കാട്ടിയാണ് ആശുപത്രികളോട് ഈ ശസ്ത്രക്രിയകൾ പൂർണ്ണമായും നിർത്തിവെക്കാൻ ഉത്തരവിട്ടിരിക്കുന്നത്.
ബോംബ് സ്ഫോടനങ്ങളിലും അപകടങ്ങളിലും കാഴ്ച നഷ്ടപ്പെട്ട നൂറുകണക്കിന് ചെറുപ്പക്കാർ ഉൾപ്പെടെയുള്ള രോഗികളെ ഈ തീരുമാനം കടുത്ത ദുരിതത്തിലാക്കും. യുഎസ് ആസ്ഥാനമായി പ്രവർത്തിക്കുന്ന ചാരിറ്റബിൾ സംഘടനയായ 'അസോസിയേഷൻ ഓഫ് ഫിസിഷ്യൻസ് ഓഫ് പാകിസ്ഥാനി ഡിസന്റ് ഓഫ് നോർത്ത് അമേരിക്ക'യുടെ പിന്തുണയോടെ കാബൂളിലെയും ജലാലബാദിലെയും ഡോക്ടർമാർക്ക് നേത്രശസ്ത്രക്രിയയിൽ പരിശീലനം നൽകിയിരുന്നു. ഇതുവരെ 150-ലധികം ശസ്ത്രക്രിയകൾ സംഘടന വഴി നടത്തിയിരുന്നു.
നിലവിൽ സ്ഫോടനങ്ങളിലും അപകടങ്ങളിലും ജോലിസ്ഥലത്തെ പരിക്കുകളിലും കാഴ്ച നഷ്ടപ്പെട്ട നിരവധി ചെറുപ്പക്കാരാണ് ശസ്ത്രക്രിയയ്ക്കായി കാത്തിരിപ്പ് പട്ടികയിലുള്ളത്. 2021-ൽ അധികാരത്തിൽ തിരിച്ചെത്തിയ ശേഷം താലിബാൻ ഏർപ്പെടുത്തുന്ന കടുത്ത നിരോധനങ്ങളുടെ പട്ടികയിലെ ഏറ്റവും പുതിയ നടപടിയാണിത്. ചൂതാട്ടമാണെന്ന ആശങ്ക ഉന്നയിച്ച് ചെസ്സ് കളിക്കുന്നത് നിരോധിച്ചതും, അധാർമ്മിക പ്രവർത്തനങ്ങൾ തടയാൻ വിവിധ പ്രവിശ്യകളിൽ ഇന്റർനെറ്റ് സേവനങ്ങൾ പരിമിതപ്പെടുത്തിയതും ഇതിൽ ഉൾപ്പെടുന്നു.
സർവ്വകലാശാലാ പാഠ്യപദ്ധതിയിൽ നിന്ന് സ്ത്രീകൾ എഴുതിയ 140 പുസ്തകങ്ങൾ താലിബാൻ നീക്കം ചെയ്യുകയും, മനുഷ്യാവകാശ പഠനവും സ്ത്രീ പഠനവും ഉൾപ്പെടെയുള്ള 18 വിഷയങ്ങളുടെ പഠനം നിർത്തലാക്കുകയും ചെയ്തു. പെൺകുട്ടികൾക്ക് ആറാം ക്ലാസിന് ശേഷമുള്ള വിദ്യാഭ്യാസം നിരോധിച്ചിരിക്കുകയാണ്, കൂടാതെ പ്രൊഫഷണൽ മിഡ്‌വൈഫറി പരിശീലന പരിപാടികളും താലിബാൻ അവസാനിപ്പിച്ചു.
