തിരുവനന്തപുരം: പിഎസ്‌സി പരീക്ഷാ ക്രമക്കേടിൽ അന്വേഷണം മുൻ ചെയർമാൻ എം.കെ. സക്കീറിലേക്കും വ്യാപിപ്പിച്ച് പ്രത്യേക അന്വേഷണസംഘം. സക്കീറിന്റെ കാലത്ത് നടന്ന രണ്ട് പരീക്ഷകളിലാണ് ക്രമക്കേട് നടന്നതായി പരാതി ഉയർന്നിരിക്കുന്നത്. ഫിഷറീസ് എക്സ്റ്റൻഷൻ ഓഫീസർ, ഖാദി ബോർഡ് ഇൻസ്പെക്ടർ പരീക്ഷകളുമായി ബന്ധപ്പെട്ടാണ് അന്വേഷണം. ഇതിന്റെ ഭാഗമായി എം.കെ. സക്കീറിന് അന്വേഷണസംഘം നോട്ടീസ് നൽകും. ഉടൻ ചോദ്യം ചെയ്യുമെന്നാണ് വിവരം. കഴിഞ്ഞ നിയമസഭാ തെരഞ്ഞെടുപ്പിൽ പൊന്നാനിയിലെ എൽഡിഎഫ് സ്ഥാനാർഥിയായിരുന്നു എം.കെ. സക്കീർ.
നിലവിലെ പിഎസ്‌സി ചെയർമാൻ എം.ആർ. ബൈജുവിനെ നേരത്തെ തന്നെ കേസിൽ പ്രതി ചേർത്തിരുന്നു. ഫിഷറീസ് എക്സ്റ്റൻഷൻ ഓഫീസർ നിയമനത്തിലെ ക്രമക്കേടുമായി ബന്ധപ്പെട്ട കേസിൽ പിഎസ്‌സി അംഗങ്ങളെയും പ്രതികളാക്കിയിട്ടുണ്ട്. ഇഷ്ടക്കാർക്ക് നിയമനം നൽകി പ്രതികൾ അന്യായ നേട്ടമുണ്ടാക്കിയെന്നാണ് അന്വേഷണസംഘത്തിന്റെ കണ്ടെത്തൽ. അധികാരദുർവിനിയോഗം നടത്തി യോഗ്യതയില്ലാത്തവർക്ക് നിയമനം നൽകിയെന്നും ഇതിലൂടെ പിഎസ്‌സിയുടെ വിശ്വാസ്യതയ്ക്ക് കോട്ടം വരുത്തിയെന്നും എഫ്‌ഐആറിൽ വ്യക്തമാക്കുന്നു.
എം.ആർ. ബൈജുവിനെയും പിഎസ്‌സി അംഗങ്ങളെയും പ്രത്യേക അന്വേഷണസംഘം കഴിഞ്ഞ ദിവസം ചോദ്യം ചെയ്തിരുന്നു. ഇവരുടെ മൊഴികളിൽ വൈരുദ്ധ്യങ്ങളുണ്ടെന്നാണ് വിവരം. ആസൂത്രണബോർഡ് പരീക്ഷയിൽ പിഎസ്‌സിക്ക് വീഴ്ച സംഭവിച്ചിട്ടില്ലെന്നും ഉദ്യോഗസ്ഥരുടെ ഭാഗത്തുണ്ടായ സാങ്കേതിക പിഴവാണ് പ്രശ്നങ്ങൾക്ക് കാരണമെന്നുമായിരുന്നു ചെയർമാന്റെ വിശദീകരണം. ചോദ്യപ്പേപ്പർ തയ്യാറാക്കുന്നയാളെ തീരുമാനിക്കുന്നതും അഭിമുഖത്തിനുള്ള അംഗങ്ങളെ നിർദേശിക്കുന്നതും തന്റെ അധികാരപരിധിയിലാണെന്നും അഭിമുഖത്തിന്റെ മാർക്ക് 40-ൽ നിന്ന് 25 ആക്കിയതും ചട്ടപ്രകാരമാണെന്നും അദ്ദേഹം മൊഴി നൽകിയിരുന്നു.
അന്വേഷണത്തിലെ മെല്ലെപ്പോക്കിനെതിരെ ഹൈക്കോടതി നേരത്തെ രൂക്ഷവിമർശനം ഉന്നയിച്ചിരുന്നു. കേസിലെ പ്രധാന പ്രതികളെ അറസ്റ്റ് ചെയ്യാത്തതും ചോദ്യം ചെയ്യാത്തതും ചൂണ്ടിക്കാട്ടിയ കോടതി, എന്ത് അന്വേഷണമാണ് നടക്കുന്നതെന്നും ചോദിച്ചിരുന്നു. പ്രതികളെ ചോദ്യം ചെയ്യുന്നതിനും അറസ്റ്റ് ചെയ്യുന്നതിനും കോടതി നടപടികൾ തടസ്സമല്ലെന്നും ഹൈക്കോടതി വ്യക്തമാക്കിയിരുന്നു. ഇതിന് പിന്നാലെയാണ് അന്വേഷണം വേഗത്തിലാക്കാൻ പ്രത്യേക അന്വേഷണസംഘം നടപടികൾ ശക്തമാക്കിയത്.
അതിനിടെ, കേസിൽ ഒളിവിലായിരുന്ന പിഎസ്‌സി അഡീഷണൽ സെക്രട്ടറി ആർ. ഹരിയെ കഴിഞ്ഞ ദിവസം എസ്‌ഐടി അറസ്റ്റ് ചെയ്തിരുന്നു. എറണാകുളത്തെ ബന്ധുവീട്ടിൽ നിന്നാണ് ക്രൈംബ്രാഞ്ച് സംഘം ഇയാളെ പിടികൂടിയത്. കേസിലെ മറ്റൊരു പ്രതിയായ പി. സതീഷിനെ നേരത്തെ കോഴിക്കോട് നിന്ന് അറസ്റ്റ് ചെയ്തിരുന്നു. പരീക്ഷാ ക്രമക്കേട് കേസിലെ ആദ്യ അറസ്റ്റായിരുന്നു ഇത്. അന്വേഷണം കൂടുതൽ ഉദ്യോഗസ്ഥരിലേക്കും വ്യാപിക്കുന്നതിന്റെ സൂചനയായാണ് മുൻ ചെയർമാനെ ചോദ്യം ചെയ്യാനുള്ള നീക്കം.
