ഐച്ചി-നഗോയ: 2026-ലെ ഏഷ്യൻ ഗെയിംസിൽ ഇന്ത്യയുടെ ആദ്യ വ്യക്തിഗത സ്വർണ മെഡൽ നീരു ദണ്ഡ സ്വന്തമാക്കി. ഏഷ്യൻ ഗെയിംസ് ചരിത്രത്തിൽ വനിതകളുടെ ട്രാപ്പ് ഇനത്തിൽ സ്വർണ മെഡൽ നേടുന്ന ആദ്യ ഇന്ത്യൻ താരമാണ് നീരു.
വനിതകളുടെ ട്രാപ്പ് വ്യക്തിഗത ഇനത്തിൽ മത്സരത്തിന്റെ ചരിത്രത്തിൽ ഇന്ത്യയുടെ എക്കാലത്തെയും ആദ്യ പോഡിയം ഫിനിഷ് ഉറപ്പിച്ചതോടൊപ്പം നീരു തകർപ്പൻ പ്രകടനത്തിലൂടെ ഒരു ഏഷ്യൻ റെക്കോർഡും സ്ഥാപിച്ചു. നേരത്തെ ഇന്ത്യൻ വനിതാ ടീമിനെ വെള്ളി മെഡലിലേക്ക് നയിച്ചതിന് ശേഷമാണ് വ്യക്തിഗത ഫൈനലിലും താരം തകർപ്പൻ പ്രകടനം കാഴ്ചവച്ചത്.
ഫൈനൽ മത്സരത്തിൽ 30 ഷോട്ടുകളിൽ രണ്ടെണ്ണം മാത്രം നഷ്ടപ്പെടുത്തി നീരു അസാധാരണ പ്രകടനമാണ് പുറത്തെടുത്തത്. അവസാന സ്കോറായ 28/30 ഒരു ഏഷ്യൻ റെക്കോർഡാണ്. ചൈനയുടെ സൺ യുങ്ഗോങ് വെള്ളി മെഡലും, കുവൈറ്റിന്റെ ഹജാർ അബ്ദുൽമാലിക് വെങ്കല മെഡലും സ്വന്തമാക്കി. ക്വാളിഫിക്കേഷൻ മത്സരത്തിൽ ഖത്തറിന്റെ റേ ബാസിലിനൊപ്പം 118 ഹിറ്റുകളോടെ സംയുക്തമായി ഒന്നാം സ്ഥാനത്തെത്തിയ 26 കാരിയായ ഇന്ത്യൻ താരം തുടക്കം മുതൽ തന്നെ മത്സരത്തിൽ ആധിപത്യം പുലർത്തിയിരുന്നു.
ഈ വർഷത്തിന്റെ തുടക്കത്തിൽ, ഐ.എസ്.എസ്.എഫ് ലോകകപ്പിൽ വ്യക്തിഗത ട്രാപ്പ് ഇനത്തിൽ സ്വർണം നേടുന്ന ആദ്യ ഇന്ത്യൻ വനിതയെന്ന ചരിത്രവും അവർ സൃഷ്ടിച്ചിരുന്നു. കഴിഞ്ഞ വർഷം ഏഷ്യൻ ചാമ്പ്യൻഷിപ്പിലും വ്യക്തിഗത, വനിതാ ട്രാപ്പ് ഇനങ്ങളിൽ അവർ സ്വർണം നേടിയിരുന്നു.
