മോസ്കോ: റഷ്യൻ കരിങ്കടൽ തീരത്ത് പൂർണ്ണമായും ഇന്ത്യൻ ജീവനക്കാരുള്ള ലിബീരിയൻ പതാക വഹിച്ച എണ്ണക്കപ്പലിന് ഉക്രൈൻ ഡ്രോൺ ആക്രമണത്തെ തുടർന്ന് തീപിടിച്ചു. തീയുടെ കാഠിന്യം കാരണം അഗ്നിശമന സേനയ്ക്ക് ഇതുവരെ തീ അണയ്ക്കാൻ സാധിച്ചിട്ടില്ലെന്നും എന്നാൽ കപ്പലിലുണ്ടായിരുന്ന 23 ജീവനക്കാരെയും രക്ഷപ്പെടുത്തിയതായും റഷ്യൻ ഗതാഗത മന്ത്രാലയം അറിയിച്ചു.
നാവിക ഡ്രോണുകൾ" ഉപയോഗിച്ചാണ് കപ്പൽ ആക്രമിക്കപ്പെട്ടതെന്നും കരിങ്കടലിലെ വെള്ളത്തിൽ ക്രൂഡ് ഓയിൽ തുറസ്സായി കത്തുകയാണെന്നും മന്ത്രാലയം വ്യക്തമാക്കി. തീയുടെ തീവ്രത കുറഞ്ഞതിന് ശേഷം അഗ്നിശമന സേനാംഗങ്ങൾ വീണ്ടും തീ അണയ്ക്കാൻ ശ്രമിക്കുമെന്നും മന്ത്രാലയം കൂട്ടിച്ചേർത്തു. ഏകദേശം 5 ലക്ഷത്തോളം ആളുകൾ വസിക്കുന്ന പ്രശസ്തമായ റിസോർട്ട് നഗരമായ സോച്ചിക്ക് സമീപമാണ് ഈ സംഭവം നടന്നത്. കടലിൽ വലിയ രീതിയിൽ തീജ്വാലകൾ ഉയർന്നുവരുന്നതിന്റെയും സോച്ചി നഗരത്തിന് സമീപം ആകാശത്തേക്ക് കറുത്ത പുക ഉയരുന്നതിന്റെയും ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്.
റൊമാനിയൻ തീരത്ത് മറ്റൊരു കപ്പലിന് തീപിടിച്ച് മുങ്ങുകയും, ഒരാൾ കൊല്ലപ്പെടുകയും ഒരാളെ കാണാതാവുകയും ചെയ്ത സംഭവത്തിന് തൊട്ടുപിറ്റേന്നാണ് ഈ ആക്രമണം ഉണ്ടാകുന്നത്. ഒരു ഇന്ത്യൻ ജീവനക്കാരന് പരിക്കേറ്റ ഈ ഡ്രോൺ ആക്രമണം നടത്തിയത് റഷ്യയാണെന്ന് ഉക്രൈൻ ആരോപിച്ചിരുന്നു. യുദ്ധം ആരംഭിച്ചതുമുതൽ ഇരുരാജ്യങ്ങളും കരിങ്കടലിലെ കപ്പലുകളെ ലക്ഷ്യമിടുന്നുണ്ട്. യൂറോപ്യൻ യൂണിയൻ അംഗമായ റൊമാനിയൻ തീരത്ത് ഉക്രേനിയൻ ധാന്യങ്ങളുമായി പോയ കപ്പലുകൾക്ക് നേരെ റഷ്യ കഴിഞ്ഞ ദിവസങ്ങളിൽ ആക്രമണം നടത്തിയിരുന്നു.
അതേസമയം, ഉക്രൈനിയൻ നഗരങ്ങൾക്കും ഗ്രാമങ്ങൾക്കും നേരെ മോസ്കോ നടത്തുന്ന രാത്രികാല ആക്രമണങ്ങൾക്കുള്ള ഉചിതമായ മറുപടിയാണ് റഷ്യൻ എണ്ണ അടിസ്ഥാന സൗകര്യങ്ങൾക്ക് നേരെയുള്ള തങ്ങളുടെ ആക്രമണമെന്നാണ് ഉക്രൈന്റെ വാദം. വരും ആഴ്ചകളിൽ ആക്രമണം ശക്തമാക്കുമെന്ന് ഇരുപക്ഷവും വ്യക്തമാക്കിയിട്ടുണ്ട്.
റഷ്യ കീവിലെ പ്രധാന പാലങ്ങൾ തകർക്കുകയും പകൽ സമയങ്ങളിൽ ഡ്രോൺ ആക്രമണങ്ങൾ നടത്തുകയും ചെയ്യുന്നുണ്ട്. മുൻപ് തെക്കൻ റഷ്യയിലെ എണ്ണ കേന്ദ്രങ്ങൾക്ക് നേരെ ഉക്രൈൻ നടത്തിയ ആക്രമണങ്ങൾ എണ്ണപ്പാടകൾ രൂപപ്പെടുന്നതിനും, ബീച്ചുകൾ അടച്ചിടുന്നതിനും, ആകാശത്ത് നിന്ന് വിഷമയമായ കറുത്ത മഴ പെയ്യുന്നതിനും കാരണമായിരുന്നു.
