ന്യൂഡല്‍ഹി: ഇന്ത്യന്‍ ജീവനക്കാരായ 11 പേര്‍ ഉണ്ടായിരുന്ന നിക്കരാഗ്വ പതാകയേന്തിയ ടാങ്കറിന് നേരെ ഡ്രോണ്‍ ആക്രമണം. സംഭവത്തില്‍ രണ്ട് ഇന്ത്യന്‍ നാവികരെ കാണാതായതായിട്ടാണ് വിവരം. ഒമാന്റെ തീരത്തുള്ള സോഹര്‍ ആങ്കറേജില്‍ വെച്ചായിരുന്നു ആക്രമണമെന്ന ഷിപ്പിംഗ് മന്ത്രി സര്‍ബാനന്ദ സോനോവാള്‍ ഞായറാഴ്ച അറിയിച്ചു.
എം.ടി. പെട്രോ ഡോളഫിന്‍ എന്ന കപ്പലിലുണ്ടായിരുന്ന ഒന്‍പത് ഇന്ത്യന്‍ ജീവനക്കാരെ രക്ഷപ്പെടുത്തിയിട്ടുണ്ടെന്നും അവര്‍ സുരക്ഷിതര്‍ ആണെന്നും കാണാതായ രണ്ട് നാവികരെ കണ്ടെത്താന്‍ തിരച്ചില്‍ തുടരുകയാണെന്നും സോനോവാള്‍ വ്യക്തമാക്കി. പ്രാദേശിക കോസ്റ്റ് ഗാര്‍ഡ് തിരച്ചില്‍ നടത്തുന്നുണ്ടെന്നും രക്ഷാപ്രവര്‍ത്തനത്തെ പിന്തുണയ്ക്കുന്നതിനായി ഇന്ത്യന്‍ അധികാരികള്‍ ബന്ധപ്പെട്ടവരുമായി ഏകോപനം നടത്തുന്നുണ്ടെന്നും മന്ത്രി പറഞ്ഞു. ഒമാനിലെ ഇന്ത്യന്‍ എംബസി സ്ഥിതിഗതികള്‍ സൂക്ഷ്മമായി നിരീക്ഷിച്ചുവരികയാണ്.
ലോകത്തിലെ എണ്ണ, വാതക വിതരണത്തിന്റെ ഗണ്യമായ പങ്ക് കടന്നുപോകുന്ന പ്രധാന ചരക്കുപാതയായ ഹോര്‍മുസ് കടലിടുക്കിലും പരിസര പ്രദേശങ്ങളിലും വാണിജ്യ കപ്പലുകള്‍ക്ക് നേരെ ആക്രമണങ്ങളും ആക്രമണശ്രമങ്ങളും വര്‍ദ്ധിച്ചുവരുന്ന പശ്ചാത്തലത്തിലാണ് ഈ സംഭവം. സെപ്റ്റംബര്‍ 28 നും ഒക്ടോബര്‍ 5 നും ഇടയില്‍ ഹോര്‍മുസ് കടലിടുക്കിന് ചുറ്റും എണ്ണ, എല്‍.എന്‍.ജി, എല്‍.പി.ജി ടാങ്കറുകള്‍ ഉള്‍പ്പെടെ കുറഞ്ഞത് 13 സംഭവങ്ങള്‍ ഉണ്ടായിട്ടുള്ളതായി രേഖപ്പെടുത്തിയിട്ടുണ്ട്. ഫെബ്രുവരി 28 ന് യുഎസും ഇറാനും തമ്മിലുള്ള യുദ്ധം ആരംഭിച്ചതിനുശേഷം സമുദ്ര സുരക്ഷാ സ്രോതസ്സുകള്‍ രേഖപ്പെടുത്തിയ ഏറ്റവും ഉയര്‍ന്ന പ്രതിവാര കണക്കാണിത്.
ആക്രമണങ്ങള്‍, ആക്രമണശ്രമങ്ങള്‍, ഡ്രോണുകള്‍ പറക്കല്‍, നിരീക്ഷണം, വി.എച്ച്.എഫ് റേഡിയോ വഴി കപ്പലുകളുമായി ബന്ധപ്പെടല്‍ എന്നിവ ഈ സംഭവങ്ങളില്‍ ഉള്‍പ്പെടുന്നു. ഇതില്‍ ചില പ്രവര്‍ത്തനങ്ങള്‍ക്ക് പിന്നില്‍ ഇറാന്‍ റെവല്യൂഷണറി ഗാര്‍ഡുകളാണെന്ന് ആരോപിക്കപ്പെടുന്നു. തുടര്‍ച്ചയായ ഇത്തരം സംഭവങ്ങള്‍ ഈ മേഖലയിലൂടെയുള്ള ഊര്‍ജ്ജ കയറ്റുമതിയുടെ സുരക്ഷയെക്കുറിച്ച് ആശങ്ക വര്‍ദ്ധിപ്പിച്ചിട്ടുണ്ട്. ഷിപ്പിംഗ് ഡാറ്റ പ്രകാരം ഗള്‍ഫ് എണ്ണ കയറ്റുമതി രാജ്യങ്ങള്‍ സെപ്റ്റംബറിലെ പകുതിയോളം കാലയളവില്‍ യുദ്ധത്തിനു മുന്‍പുള്ള നിലവാരത്തേക്കാള്‍ കയറ്റുമതി വര്‍ദ്ധിപ്പിച്ചിരുന്നു, എന്നാല്‍ തുടര്‍ച്ചയായ ആക്രമണങ്ങളും ലോജിസ്റ്റിക് പ്രതിസന്ധികളും ഈ നിലവാരം തുടരാന്‍ കഴിയുമോ എന്ന സംശയത്തിന് ഇടയാക്കിയിട്ടുണ്ട്.
ഒമാന്‍ തീരത്തിന് സമീപം ഹോര്‍മുസ് കടലിടുക്കിലൂടെ സഞ്ചരിക്കുകയായിരുന്ന പനാമ പതാകയേന്തിയ എം.ടി. ഓണ്‍ പീസ് ടാങ്കറിന് നേരെ അജ്ഞാത പ്രൊജക്‌റ്റൈല്‍ ആക്രമണം ഉണ്ടായതിന് പിന്നാലെയാണ് ഈ പുതിയ സംഭവം. കപ്പലിലുണ്ടായിരുന്ന 19 പേരില്‍ 17 പേരും ഇന്ത്യക്കാരാണെന്നും, ഇതില്‍ 11 ഇന്ത്യന്‍ പൗരന്മാര്‍ ഉള്‍പ്പെടെ 12 ജീവനക്കാര്‍ക്ക് പരിക്കേറ്റതായും ഇന്ത്യയുടെ വിദേശകാര്യ മന്ത്രാലയം അറിയിച്ചു. ഒമാനി അധികാരികളുടെ സഹായത്തോടെ പരിക്കേറ്റ ജീവനക്കാരെ ഒഴിപ്പിക്കുകയും ഒമാനിലെ ഖാസബില്‍ വൈദ്യസഹായം ലഭ്യമാക്കുകയും ചെയ്തു.
