കോട്ടയം: കോതമംഗലത്ത് പെരുമ്പാവൂർ സ്വദേശിയായ ഹൃദ്രോഗിക്ക് ചികിത്സ വൈകിയ സംഭവത്തിൽ പ്രതികരണവുമായി മുൻ ആരോഗ്യമന്ത്രി കെ.കെ. ശൈലജ. ആരോഗ്യരംഗത്ത് നിരന്തരമായി ചികിത്സാനിഷേധവും അലംഭാവവും ഉണ്ടാകുന്നുവെന്ന് അവർ ആരോപിച്ചു. ഇടതുസർക്കാരിന്റെ കാലത്തെ ചെറിയ പ്രശ്നങ്ങൾ പോലും പർവതീകരിച്ച് കാണിച്ചവർ ഇപ്പോൾ കേരളം ഭരിക്കുകയാണെന്നും ശൈലജ വിമർശിച്ചു.
ആരോഗ്യമേഖലയെ തകർക്കുന്ന നടപടികളാണ് ഇപ്പോൾ നടക്കുന്നതെന്ന് കെ.കെ. ശൈലജ ആരോപിച്ചു. കിഫ്ബിയെ കുറ്റപ്പെടുത്തി ആശുപത്രികൾക്ക് അനുവദിച്ചിരുന്ന തുക തടഞ്ഞുവെന്നും പൊതുജനാരോഗ്യ മേഖലയെ തകർത്ത് സ്വകാര്യ മേഖലയെ വളർത്താനാണ് ടാസ്‌ക് ഫോഴ്‌സിന്റെ നീക്കമെന്നും അവർ പറഞ്ഞു. ചികിത്സാ അലംഭാവം അവസാനിപ്പിക്കാൻ സർക്കാർ ഇടപെടണമെന്നും ഫീസ് അടയ്ക്കുന്നതിനുള്ള സൗകര്യങ്ങൾ ഒരുക്കണമെന്നും ആവശ്യപ്പെട്ടു.
സർക്കാർ ആശുപത്രികളിൽ ആവശ്യമായ സൗകര്യങ്ങളും സാഹചര്യങ്ങളുമുണ്ടെന്നും അവ വേണ്ടവിധം പ്രവർത്തിപ്പിക്കുകയാണ് വേണ്ടതെന്നും ശൈലജ വ്യക്തമാക്കി. പി.എസ്.സി. സമരക്കാരുടെ പ്രശ്നങ്ങൾ പരിഹരിക്കാൻ സർക്കാർ തയ്യാറാകണമെന്നും അവർ ആവശ്യപ്പെട്ടു. ഇടതുസർക്കാരിന്റെ കാലത്ത് സമരപ്പന്തലിലെത്തിയവർ ഇപ്പോൾ സമരക്കാരെ തിരിഞ്ഞുനോക്കുന്നില്ലെന്നും പി.എസ്.സി. വഴി ഏറ്റവും കൂടുതൽ നിയമനങ്ങൾ നടന്നത് ഇടതുഭരണകാലത്താണെന്നും അവർ അവകാശപ്പെട്ടു.
