വാഷിങ്ടണ്‍: അമേരിക്കയും ഇറാനും തമ്മിലുള്ള സംഘര്‍ഷം യുദ്ധത്തിലേക്ക് നീങ്ങുന്നതായി സൂചനകള്‍. ഇറാനെതിരെ കൂടുതല്‍ ശക്തമായ വ്യോമാക്രമണങ്ങള്‍ക്ക് അമേരിക്ക തയാറെടുക്കുന്നതായി റിപ്പോര്‍ട്ടുകള്‍ക്ക് പിന്നാലെ തിരിച്ചടിക്കുമെന്ന ഇറാന്റെ ഭീഷണിയും വന്നു കഴിഞ്ഞു. അടിസ്ഥാന സൗകര്യങ്ങള്‍ തകര്‍ത്ത് അവശ്യവസ്തുക്കളുടെ വിതരണം പൂര്‍ണ്ണമായി തടയുക എന്നതാണ് അമേരിക്ക ലക്ഷ്യമിടുമ്പോള്‍ അമേരിക്കയ്ക്ക് മേല്‍ തീമഴ പെയ്യിക്കുമെന്ന ഭീഷണി ഇറാനും മുഴക്കിയതോടെ യുദ്ധത്തിനുള്ള സാധ്യത തെളിയുകയാണ്.
ഇറാനിലേക്കുള്ള കരമാര്‍ഗ്ഗമുള്ള അവശ്യവസ്തുക്കളുടെ വിതരണം പൂര്‍ണ്ണമായി തടയുക എന്ന ലക്ഷ്യത്തോടെ 'അയണ്‍ ഗേറ്റ്' എന്ന പേരില്‍ പുതിയ ഉപരോധം പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചു. ഇറാന്റെ അടിസ്ഥാന സൗകര്യങ്ങളായ പാലങ്ങള്‍, വൈദ്യുത നിലയങ്ങള്‍ എന്നിവ ലക്ഷ്യമിട്ടായിരിക്കും പുതിയ ആക്രമണങ്ങള്‍ എന്നാണ് റിപ്പോര്‍ട്ടുകള്‍. ഇക്കാര്യം യു.എസ്. ഭരണകൂടം ഇസ്രായേലിനെ അറിയിച്ചിട്ടുണ്ട്. തിരഞ്ഞെടുപ്പ് തിരിച്ചടിക്ക് ശേഷവും ഇറാനെതിരെയുള്ള സൈനിക നടപടി തള്ളിക്കളയാന്‍ പ്രസിഡന്റ് ഡൊണാള്‍ഡ് ട്രംപ് തയ്യാറായിട്ടില്ല. പുതിയ ആക്രമണത്തിന് സാധ്യതയുണ്ടോ എന്ന മാധ്യമപ്രവര്‍ത്തകരുടെ ചോദ്യത്തിന് എന്തും സംഭവിക്കാം എന്നായിരുന്നു അദ്ദേഹത്തിന്റെ മറുപടി.
നയതന്ത്ര ചര്‍ച്ചകള്‍ ഒരു കരാറിലെത്തുകയാണെങ്കില്‍ സൈനിക ആക്രമണത്തിനുള്ള സാധ്യത കുറവാണെന്ന് ട്രംപ് നേരത്തേ പ്രതികരിച്ചിരുന്നു. ഇറാന് കരാര്‍ ഒപ്പിടാന്‍ തയ്യാറായില്ലെങ്കില്‍ കൂടുതല്‍ ശക്തമായ സൈനിക നടപടിയെടുക്കാന്‍ യു.എസ്. സൈന്യം സജ്ജമാണെന്നുമാണ് വ്യക്തമാക്കിയിരിക്കുന്നത്. യു.എസിന്റെ ആക്രമണ ഭീഷണിക്കെതിരെ അതിരൂക്ഷമായ ഭാഷയിലാണ് ഇറാന് വിദേശകാര്യമന്ത്രി സയ്യിദ് അബ്ബാസ് അരാഗ്ചി പ്രതികരിച്ചത്. മുന്‍പ് മുന്നോട്ടുവെച്ച രണ്ടുദിവസത്തെ സമാധാന നിര്‍ദ്ദേശം സ്വീകരിക്കാന്‍ വാഷിങ്ടണ്‍ തയ്യാറാകണമെന്ന് അദ്ദേഹം ആവശ്യപ്പെട്ടു. യുദ്ധം അവസാനിപ്പിക്കാനുള്ള ഞങ്ങളുടെ വ്യവസ്ഥകള്‍ അംഗീകരിക്കുക; അല്ലെങ്കില്‍ ശക്തമായ തിരിച്ചടി നേരിടുക. സദാ സജ്ജരായ ഞങ്ങളുടെ പോരാളികള്‍ അമേരിക്കയ്ക്ക് മേല്‍ തീമഴ പെയ്യിക്കും.' എക്‌സിലെ കുറിപ്പില്‍ സയ്യിദ് അബ്ബാസ് അരാഗ്ചി പറഞ്ഞു.
വ്യവസ്ഥകള്‍ പാലിച്ചാല്‍ ചര്‍ച്ചകള്‍ക്ക് ഇപ്പോഴും സന്നദ്ധമാണെന്നും, എന്നാല്‍ വീണ്ടുമൊരു ആക്രമണമുണ്ടായാല്‍ അത് ഭൂമിശാസ്ത്രപരമായ അതിരുകളില്ലാത്ത കടുത്ത തിരിച്ചടിക്ക് വഴിവെക്കും എന്നും ഇറാന് മുന്നറിയിപ്പ് നല്‍കി. യു.എസില്‍ അടുത്തിടെ സമാപിച്ച ഇടക്കാല തിരഞ്ഞെടുപ്പില്‍ ഭരണകക്ഷിയായ റിപ്പബ്ലിക്കന്‍ പാര്‍ട്ടി നേരിട്ട തിരിച്ചടിക്ക് പ്രധാന കാരണം ഇറാനുമായുള്ള യുദ്ധമാണെന്ന് മുതിര്‍ന്ന നേതാക്കള്‍ സമ്മതിക്കുന്നു. 'ഞങ്ങള്‍ തോറ്റതിന്റെ പ്രധാന കാരണം ഈ യുദ്ധമാണ്' എന്ന് യു.എസ്. വൈസ് പ്രസിഡന്റ് ജെ.ഡി. വാന്‍സ് പരസ്യമായി പ്രതികരിച്ചിരുന്നു.
യു.എസ്. ആക്രമണം ആരംഭിച്ചതുമുതല്‍ തന്ത്രപ്രധാനമായ ഹോര്‍മൂസ് കടലിടുക്ക് ഇറാന് ഉപരോധിച്ചിരിക്കുകയാണ്. ഇത് ആഗോളതലത്തില്‍ ക്രൂഡ് ഓയില്‍ വിതരണത്തെ ബാധിക്കുകയും അമേരിക്കയില്‍ കടുത്ത ഇന്ധനവിലക്കയറ്റത്തിനും ജീവിതച്ചെലവ് വര്‍ദ്ധനവിനും കാരണമാവുകയും ചെയ്തു. ഇതാണ് തിരഞ്ഞെടുപ്പില്‍ ജനവികാരം റിപ്പബ്ലിക്കന്‍ പാര്‍ട്ടിക്ക് എതിരാകാന്‍ ഇടയാക്കിയത്.
