തിരുവനന്തപുരം: ഇ ഡി ആക്രമണക്കേസില് പ്രതിക്കായി അനുകൂല നിലപാടെടുത്ത പ്രോസിക്യൂട്ടര്ക്കെതിരെ അസാധാരണ നടപടിയുമായി സര്ക്കാര്. പ്രോസിക്യൂട്ടര് ഗീനാകുമാരിക്കെതിരെയാണ് സര്ക്കാര് നീക്കം. ജാമ്യത്തിനെതിരെയുള്ള അപ്പീലില് എതിര് കക്ഷിയാക്കാനാണ് തീരുമാനം. നാളെ ഹൈക്കോടതിയിലാണ് അപ്പീല് നല്കുന്നത്. 9ാം പ്രതി ഹരീഷ്കുമാറിനെ കസ്റ്റഡിയില് വേണ്ടെന്നാണ് ഗീനാകുമാരി കോടതിയില് വാദിച്ചത്. ജാമ്യത്തിനെതിരെയുള്ള പൊലീസ് റിപ്പോര്ട്ടിന് വിരുദ്ധമായാണ് ഇങ്ങനെ വാദിച്ചത്. ഒരു പ്രോസിക്യൂട്ടര്ക്കെതിരെ സര്ക്കാര് കോടതിയിലെത്തുന്നത് അപൂര്വമാണ്.
അതേസമയം, ഇ ഡി കേസില് സ്പെഷ്യല് പ്രോസിക്യൂട്ടറെ നിയോഗിക്കും. നാളെ സെഷന്സ് കോടതിയില് ഹാജരാകുന്നത് സ്പെഷ്യല് പ്രോസിക്യൂട്ടറാണ്. ഗീന കുമാരിയെ മാറ്റി ഇന്നു വൈകിട്ട് ഉത്തരവ് ഇറങ്ങും. കൊച്ചിയില്, ഡിജിപി ആസഫലി വിളിച്ച യോഗത്തിലാണ് തീരുമാനം ഉണ്ടായത്. ഗീന കുമാരിയെ ഉടന് നീക്കുമെന്ന് ആഭ്യന്തര മന്ത്രി രമേശ് ചെന്നിത്തല പ്രതികരിച്ചു. രണ്ട് മണിക്കൂറിനുള്ളില് ഉത്തരവ് ഇറങ്ങും. പുതിയ സ്പെഷ്യല് പബ്ലിക് പ്രോസിക്യൂട്ടര് നാളെ കേസിനു ഹാജരാകും. പ്രതികളെ രക്ഷിക്കാന് കൂട്ടുനിന്ന പ്രോസിക്യൂട്ടറെ മാറ്റും. ഇഡിയെ ആക്രമിച്ച കേസ് വളരെ ഗൗരവമുള്ളതാണെന്നും ചെന്നിത്തല പറഞ്ഞു.
