ഏത് പാലാണ് കൂടുതൽ പ്രോട്ടീൻ സമ്പന്നം

പ്രോട്ടീൻ സമ്പന്നമായ പാനീയം എന്ന് ചിന്തിക്കുമ്പോൾ ഭൂരിഭാഗം ആളുകളുടെയും മനസ്സിലേക്ക് ആദ്യം എത്തുന്നത് പശുവിൻ പാലാണ്. എന്നാൽ, നാം നിത്യേന കാണുന്ന പശുവിൻ പാലിനേക്കാൾ ഉയർന്ന അളവിൽ സ്വാഭാവിക പ്രോട്ടീൻ അടങ്ങിയ മറ്റ് ചില പാൽ ഇനങ്ങളുമുണ്ട്. മൃഗങ്ങളിൽ നിന്നും സസ്യങ്ങളിൽ നിന്നും ലഭ്യമാകുന്ന പ്രധാനപ്പെട്ട 7 തരം പാലും അവയിലെ പ്രോട്ടീൻ അളവും ഏതൊക്കെയെന്ന് പരിചയപ്പെടാം.

ചെമ്മരിയാട്ടിൻ പാൽ

പ്രോട്ടീൻ അളവിൽ ഒന്നാം സ്ഥാനത്ത് നിൽക്കുന്നത് ചെമ്മരിയാട്ടിൻ പാലാണ്. 100 മില്ലിയിൽ 5 മുതൽ 6 ഗ്രാം വരെ പ്രോട്ടീൻ ഇതിലുണ്ട്. സ്വാഭാവികമായും ഉയർന്ന കൊഴുപ്പും പോഷക സാന്ദ്രതയുമുള്ള ഈ പാൽ കൂടുതൽ ക്രീമിയും കട്ടിയുള്ളതുമാണ്. നേരിട്ട് കുടിക്കുന്നതിനേക്കാൾ ചീസ്, തൈര് എന്നിവയുടെ നിർമാണത്തിനാണ് ഇത് വ്യാപകമായി ഉപയോഗിക്കുന്നത്.

എരുമപ്പാൽ

ഇന്ത്യൻ വീടുകളിലെ ഏറെ പ്രിയപ്പെട്ട എരുമപ്പാലിൽ 100 മില്ലിയിൽ 3.7 മുതൽ 4.5 ഗ്രാം വരെ പ്രോട്ടീൻ അടങ്ങിയിട്ടുണ്ട്. ഉയർന്ന കൊഴുപ്പും കട്ടിയുള്ള ഘടനയും ഉള്ളതിനാൽ പനീർ, ഖോവ, നെയ്യ്, കട്ടിയുള്ള തൈര് എന്നിവയുണ്ടാക്കാൻ ഇത് ഉത്തമമാണ്. പ്രോട്ടീനൊപ്പം കൂടുതൽ കലോറിയും ഇത് നല്‍കുന്നു.

പശുവിൻ പാൽ

ലഭ്യതയിലും ദൈനംദിന ഉപയോഗത്തിലും മുന്നിൽ നിൽക്കുന്ന പശുവിൻ പാൽ 100 മില്ലിയിൽ 3.2 മുതൽ 3.5 ഗ്രാം വരെ പ്രോട്ടീൻ നൽകുന്നു. ഒരു 250 മില്ലി ഗ്ലാസിൽ ഏകദേശം 8 ഗ്രാം പ്രോട്ടീനുണ്ട്. ചായ, കാപ്പി, സ്മൂത്തികൾ എന്നിവയ്ക്കൊപ്പം എളുപ്പത്തിൽ ഉപയോഗിക്കാമെന്നതാണ് ഇതിന്റെ ജനപ്രിയതയ്ക്ക് കാരണം.

ആട്ടിൻ പാൽ

പശുവിൻ പാലിന് സമാനമായ പോഷക ഘടനയുള്ള ആട്ടിൻ പാലിൽ 100 മില്ലിയിൽ 3 മുതൽ 3.5 ഗ്രാം വരെ പ്രോട്ടീൻ അടങ്ങിയിരിക്കുന്നു. കാൽസ്യം, മറ്റ് സൂക്ഷ്മ പോഷകങ്ങൾ എന്നിവയാൽ സമ്പന്നമായ ഈ പാൽ പലർക്കും ദഹിക്കാൻ എളുപ്പമാണെങ്കിലും, പശുവിൻ പാൽ അലർജിയുള്ളവർക്ക് ഇത് പൂർണമായും സുരക്ഷിതമാകണമെന്നില്ല.

ഒട്ടകപ്പാൽ

മിഡിൽ ഈസ്റ്റ്, വടക്കേ ആഫ്രിക്കൻ രാജ്യങ്ങളിൽ നൂറ്റാണ്ടുകളായി ഉപയോഗിക്കുന്ന ഒട്ടകപ്പാലിൽ 100 മില്ലിയിൽ 3 മുതൽ 3.5 ഗ്രാം വരെ പ്രോട്ടീൻ ഉണ്ട്. നേരിയ ഉപ്പുരസമുള്ള ഈ പാലിൽ വൈറ്റമിൻ സി, ഇരുമ്പ് എന്നിവയോടൊപ്പം വ്യത്യസ്തമായ ഒരു അമിനോ ആസിഡ് ഘടനയുമുണ്ട്.

സോയ പാൽ

സസ്യാധിഷ്ഠിത പാലുകളിൽ പ്രോട്ടീൻ കാര്യത്തിൽ മുന്നിൽ നിൽക്കുന്നത് സോയ പാലാണ്. 100 മില്ലിയിൽ 3 മുതൽ 4 ഗ്രാം വരെ പ്രോട്ടീൻ ഇതിലുണ്ട്. ഒൻപത് അവശ്യ അമിനോ ആസിഡുകളും അടങ്ങിയ സമ്പൂർണ പ്രോട്ടീൻ സ്രോതസ്സായതിനാൽ, സസ്യാഹാരികൾക്ക് പശുവിൻ പാലിന് മികച്ച ബദലാണിത്.

ബദാം പാൽ

ആരോഗ്യകരമായ ബദൽ എന്ന നിലയിൽ ജനപ്രിയമാണെങ്കിലും പ്രോട്ടീന്റെ കാര്യത്തിൽ ബദാം പാൽ വളരെ പിന്നിലാണ് (100 മില്ലിയിൽ 0.5 – 1 ഗ്രാം). വാണിജ്യപരമായി നിർമിക്കുന്ന ബദാം പാലിൽ ജലാംശം കൂടുതലായതിനാൽ പ്രോട്ടീൻ ആവശ്യങ്ങൾക്കായി മാത്രം ഇതിനെ ആശ്രയിക്കരുത്.