ആലപ്പുഴ: ഹരിപ്പാട്ട് പ്ലസ് വൺ വിദ്യാർഥിയെ ക്ലാസ് മുറിയിൽ പൂട്ടിയിട്ട് സഹപാഠികൾ കൂട്ടത്തോടെ മർദിച്ച സംഭവത്തിൽ പ്രണയം നിരസിച്ചതിലുള്ള വൈരാഗ്യവും ക്വട്ടേഷനും കാരണമായെന്ന് ആരോപണം. സഹപാഠിയായ പെൺകുട്ടിയും 19കാരനും നൽകിയ നിർദേശപ്രകാരമാണ് ആക്രമണം നടന്നതെന്ന് പരിക്കേറ്റ വിദ്യാർഥിയുടെ അമ്മ ആരോപിച്ചു.
ഒക്ടോബർ 15നാണ് സംഭവം നടന്നത്. പെൺകുട്ടിയും 19കാരനും നൽകിയ നിർദേശപ്രകാരം 16ഓളം വിദ്യാർഥികൾ ചേർന്ന് 17കാരനെ ക്ലാസ് മുറിയിൽ പൂട്ടിയിട്ട് മർദിച്ചെന്നാണ് ആരോപണം. തലയിലും മുഖത്തും ശരീരത്തിന്റെ വിവിധ ഭാഗങ്ങളിലും മകന് ഗുരുതരമായി പരിക്കേറ്റതായി അമ്മ പറഞ്ഞു. പെൺകുട്ടിയുടെ പ്രണയാഭ്യർഥന നിരസിച്ചതാണ് ആക്രമണത്തിന് പിന്നിലെന്നും അമ്മ ആരോപിച്ചു.
സംഭവത്തിൽ പങ്കെടുത്ത വിദ്യാർഥികളെ സ്കൂൾ അധികൃതർ ഒരു മാസത്തേക്ക് സസ്പെൻഡ് ചെയ്തിരുന്നു. ആക്രമണത്തിന് പിന്നിലെ ക്വട്ടേഷൻ വിവരങ്ങൾ സംഘത്തിലുണ്ടായിരുന്ന ഒരു വിദ്യാർഥിയിൽനിന്ന് കഴിഞ്ഞ ദിവസമാണ് മാതാപിതാക്കൾക്ക് ലഭിച്ചതെന്നാണ് റിപ്പോർട്ട്. സംഭവത്തിൽ പൊലീസും സ്കൂൾ അധികൃതരും അന്വേഷണം വ്യാപിപ്പിച്ചിട്ടുണ്ട്. ആരോപണങ്ങൾ അന്വേഷണത്തിലൂടെ സ്ഥിരീകരിക്കേണ്ടതുണ്ട്.
