പത്തനംതിട്ട: വീടുനിർമാണത്തിനായി മണ്ണെടുക്കുന്നതിന് കൈക്കൂലി ആവശ്യപ്പെട്ടെന്ന ആരോപണത്തെ തുടർന്ന് പത്തനംതിട്ടയിൽ 25 കുടുംബങ്ങൾ സിപിഎം വിട്ട് ബിജെപിയിൽ ചേർന്നു. ഇലന്തൂർ പരിയാരം സിപിഎം ലോക്കൽ കമ്മിറ്റി നേതാക്കൾക്കെതിരെയാണ് ഗുരുതര ആരോപണം ഉയർന്നിരിക്കുന്നത്.
ഇലന്തൂർ വരട്ടുചിറയിൽ വീട് നിർമിക്കുന്നതിനായി മണ്ണെടുക്കാൻ 25,000 രൂപ കൈക്കൂലിയായി നൽകണമെന്ന് സിപിഎം പ്രവർത്തകർ ആവശ്യപ്പെട്ടെന്നാണ് പരാതി. ഇതിൽ പ്രതിഷേധിച്ചാണ് പരിയാരം, വരട്ടുചിറ മേഖലകളിലെ 25 കുടുംബങ്ങൾ പാർട്ടി വിട്ടതെന്നാണ് റിപ്പോർട്ട്.
വർഷങ്ങളായി സിപിഎമ്മുമായി സഹകരിച്ച് പ്രവർത്തിച്ചിരുന്ന കുടുംബങ്ങളാണ് ബിജെപിയിൽ ചേർന്നത്. സിപിഎം പ്രവർത്തകൻ ബാബുവിന്റെ കുടുംബവും പാർട്ടി വിട്ടവരിൽ ഉൾപ്പെടുന്നു.
പാർട്ടി വിട്ടെത്തിയ കുടുംബങ്ങൾക്ക് ബിജെപി ജില്ലാ പ്രസിഡന്റ് വി.എ. സൂരജിന്റെ നേതൃത്വത്തിൽ സ്വീകരണം നൽകി. ഇവരുടെ നേതൃത്വത്തിൽ പ്രദേശത്ത് പുതിയ ബിജെപി യൂണിറ്റും രൂപീകരിച്ചു.
അതേസമയം, ഉയർന്നുവന്ന ആരോപണങ്ങളിൽ സമഗ്രമായ അന്വേഷണം നടത്തുമെന്ന് സിപിഎം പ്രാദേശിക നേതൃത്വം അറിയിച്ചു. കൈക്കൂലി ആവശ്യപ്പെട്ടെന്ന ആരോപണത്തിൽ കൂടുതൽ വ്യക്തത വരേണ്ടതുണ്ട്.
