എറണാകുളം: മഹാരാജാസ് കോളേജിലെ ബിരുദദാന ചടങ്ങിനിടെയുണ്ടായ എസ്.എഫ്.ഐ പ്രതിഷേധത്തിൽ ഉന്നത വിദ്യാഭ്യാസ മന്ത്രി റോജി എം. ജോൺ നടത്തിയ വിമർശനങ്ങൾക്ക് മറുപടിയുമായി സി.പി.എം എറണാകുളം ജില്ലാ സെക്രട്ടറി എസ്. സതീഷ്. വിദ്യാർത്ഥികളുടെ ഭാവി തകർക്കുന്ന മന്ത്രിയായി റോജി എം. ജോൺ മാറുകയാണെന്നും കേരളത്തിലെ ഉന്നത വിദ്യാഭ്യാസ മന്ത്രി നാടകത്തെപ്പോലും ഭയപ്പെടുന്നയാളായി മാറിയെന്നും അദ്ദേഹം കുറ്റപ്പെടുത്തി.
സർക്കാർ ഉത്തരവുകൾ കാണൂ
കേടായ ലൈറ്റുകൾ നന്നാക്കണമെന്ന് ആവശ്യപ്പെട്ട് വിദ്യാർത്ഥികൾ നടത്തിയ സർഗാത്മകവും പ്രതീകാത്മകവുമായ നാടകാവതരണത്തെ ആർ.എസ്.എസ് പ്രവർത്തകനായ പി.ആർ.ഒ വളച്ചൊടിക്കുകയായിരുന്നുവെന്ന് എസ്. സതീഷ് ആരോപിച്ചു. നാടകത്തിന്റെ യാഥാർഥ്യം നേരത്തെ തന്നെ സമൂഹത്തിന് ബോധ്യപ്പെട്ടതാണ്. എന്നാൽ വിദ്യാർത്ഥികളെ സസ്പെൻഡ് ചെയ്ത നടപടിയെ മന്ത്രി ന്യായീകരിക്കുകയാണെന്നും അദ്ദേഹം വിമർശിച്ചു.
സസ്പെൻഷനിലായ വിദ്യാർത്ഥികൾക്ക് പരീക്ഷയെഴുതാൻ ഹൈക്കോടതി അനുമതി നൽകിയിട്ടും പരീക്ഷാഫീസ് അടയ്ക്കാൻ ക്യാമ്പസിലെത്തിയ വിദ്യാർത്ഥികളെ അകത്തേക്ക് പ്രവേശിപ്പിക്കാൻ അധികൃതർ തയ്യാറായില്ലെന്ന് എസ്. സതീഷ് പറഞ്ഞു. വിദ്യാർത്ഥികളുടെ പ്രതിഷേധം അപരിഷ്കൃതമായ സമരമായി മന്ത്രിക്ക് തോന്നുന്നത് കഷ്ടമാണെന്നും അദ്ദേഹം കൂട്ടിച്ചേർത്തു.
ജനാധിപത്യപരമായ ചോദ്യങ്ങൾ ഉന്നയിക്കുന്ന വിദ്യാർത്ഥികളെ റോജി എം. ജോൺ അടിച്ചമർത്തുകയാണെന്നും പ്രതിഷേധങ്ങളെ അസ്വസ്ഥമായ മനോഭാവത്തോടെയാണ് മന്ത്രി കാണുന്നതെന്നും അദ്ദേഹം ആരോപിച്ചു. വിദ്യാർത്ഥികൾക്കെതിരെ ജാമ്യമില്ലാ വകുപ്പുകൾ ചുമത്തുമെന്ന പ്രസ്താവനയും വിമർശനത്തിന് ഇടയാക്കിയിട്ടുണ്ട്. പ്രിൻസിപ്പലിന്റെ മൊഴി പോലും തിരുത്തിച്ചുവെന്നും എസ്. സതീഷ് ആരോപിച്ചു.
സർക്കാർ ഉത്തരവുകൾ കാണൂ
രാഷ്ട്രീയ പകപോക്കലിന് മന്ത്രി തയ്യാറാകരുതെന്നും എസ്. സതീഷ് ആവശ്യപ്പെട്ടു. വി.ഡി. സതീഷനെയും പ്രധാനമന്ത്രി നരേന്ദ്ര മോദിയെയും പരാമർശിച്ചുകൊണ്ട് വിദ്യാർത്ഥി വേട്ടയുടെ കാര്യത്തിൽ ഇരുവരുടെയും സമീപനം ഒരുപോലെയാണെന്ന് അദ്ദേഹം വിമർശിച്ചു. യുവമോർച്ച, ആർ.എസ്.എസ് പ്രവർത്തകർ മന്ത്രിമാരെ വഴിയിൽ തടഞ്ഞപ്പോൾ അവരോട് ക്ഷമിച്ചുവെന്ന് പറഞ്ഞ യു.ഡി.എഫ് മന്ത്രിമാർ, പഠിക്കാനും പരീക്ഷയെഴുതാനുമുള്ള ആവശ്യങ്ങൾ ഉന്നയിക്കുന്ന വിദ്യാർത്ഥികളുടെ സമരത്തെ അപരിഷ്കൃതമെന്ന് വിശേഷിപ്പിക്കുകയാണെന്നും അദ്ദേഹം പറഞ്ഞു. വിദ്യാർത്ഥികൾക്ക് പറയാനുള്ളത് കേൾക്കാൻ മന്ത്രി തയ്യാറാകണമായിരുന്നുവെന്നും എസ്. സതീഷ് കൂട്ടിച്ചേർത്തു.
