റിയാദ്: റിയാദിലെ കിംഗ് ഖാലിദ് വിമാനത്താവളത്തിൽ ശനിയാഴ്ചയുണ്ടായ ആക്രമണത്തിൽ പരിക്കേറ്റ ഒരു ഇന്ത്യക്കാരൻ കൊല്ലപ്പെട്ടു. ആക്രമണത്തിൽ 10 ഇന്ത്യക്കാർക്ക് പരിക്ക് പറ്റിയതായി സൗദി അറേബ്യയിലെ ഇന്ത്യൻ എംബസി ഞായറാഴ്ച അറിയിച്ചു. എംബസിയുടെ പോസ്റ്റിൽ മരിച്ച ആളുടെ വ്യക്തിവിവരങ്ങൾ ഉടനടി നൽകിയിട്ടില്ല. എന്നാൽ, ദൗർഭാഗ്യകരമായ സംഭവം നടന്നുവെന്നും മരിച്ചയാളുടെ കുടുംബവുമായി ബന്ധപ്പെട്ടുവെന്നും തുടർ നടപടികൾ സ്വീകരിക്കുമെന്നും പറയുന്നുണ്ട്.
ശനിയാഴ്ച നടന്ന ആക്രമണത്തിൽ 12 പേർ കൊല്ലപ്പെടുകയും 300-ലധികം പേർക്ക് പരിക്കേൽക്കുകയും ചെയ്ത സംഭവവികാസങ്ങൾ എംബസി പിന്തുടരുന്നുണ്ടെന്ന് എക്സിലെ പോസ്റ്റിൽ അറിയിച്ചു. ഇവരുടെ ക്ഷേമവിവരങ്ങൾ അന്വേഷിക്കാൻ ഉദ്യോഗസ്ഥർ പ്രാദേശിക അധികാരികളെയും ആശുപത്രി അധികൃതരെയും ബന്ധപ്പെട്ടിട്ടുണ്ടെന്നും എംബസി കൂട്ടിച്ചേർത്തു. സംഭവത്തോടനുബന്ധിച്ച് ഇന്ത്യൻ എംബസി ആവശ്യമായ എല്ലാ നടപടികളും സ്വീകരിക്കുന്നുണ്ടെന്ന് വിദേശകാര്യ മന്ത്രി എസ്. ജയശങ്കർ പറഞ്ഞു.
യമനിലെ ഹൂതി വിഭാഗവും സൗദി അറേബ്യയും പ്രധാന വിമാനത്താവളങ്ങൾക്ക് നേരെ പരസ്പരം ആക്രമണം തുടരുന്നതിനിടയിലാണ് ഈ സംഭവം. ഞായറാഴ്ച പുലർച്ചെ പുറപ്പെടുവിച്ച പ്രസ്താവനയിൽ, മരിച്ചവരിൽ നാല് സൗദി പൗരന്മാരും എട്ട് വിദേശികളുമട ഉൾപ്പെടുന്നതായി സൗദി വ്യോമയാന അതോറിറ്റി വ്യക്തമാക്കിയിരുന്നു. വിദേശ പൗരന്മാരിൽ രണ്ട് ബംഗ്ലാദേശികളും യു.എസ്, ഈജിപ്ത്, ജോർദാൻ, സിറിയ, ഫലസ്തീൻ, സുഡാൻ എന്നിവിടങ്ങളിൽ നിന്നുള്ള ഓരോരുത്തരും ഉൾപ്പെടുന്നുവെന്ന് സിൻഹുവ വാർത്താ ഏജൻസി റിപ്പോർട്ട് ചെയ്തു. പരിക്കേറ്റവർ വിവിധ ആശുപത്രികളിൽ ചികിത്സയിലാണെന്നും ചിലരുടെ നില ഗുരുതരമാണെന്നും അധികൃതർ അറിയിച്ചു.
ശനിയാഴ്ചത്തെ ആക്രമണത്തിന് ശേഷം, മാനുഷിക ആവശ്യങ്ങൾക്കായി ഉപയോഗിക്കുന്ന വിമാനത്താവളങ്ങൾ, തുറമുഖങ്ങൾ, മറ്റ് സൗകര്യങ്ങൾ എന്നിവയെ സൈനിക ഏറ്റുമുട്ടലിൽ നിന്ന് ഒഴിവാക്കി നിർബന്ധിത സമാധാനം നിലനിർത്താൻ സൗദി അറേബ്യയുമായി ധാരണയിലെത്താൻ തയ്യാറാണെന്ന് ഹൂതി വിഭാഗം അറിയിച്ചു. അതേസമയം, ഹൂതികളുടെ നിയന്ത്രണത്തിലുള്ള യമൻ പ്രദേശങ്ങളിൽ സൗദി അറേബ്യ പുതിയ വ്യോമ-മിസൈൽ ആക്രമണ പരമ്പരകൾ നടത്തിയതായി ഹൂതികളുടെ നിയന്ത്രണത്തിലുള്ള അൽ-മസിറ ടിവി ശനിയാഴ്ച റിപ്പോർട്ട് ചെയ്തു.
