ലോകകപ്പ് കിരീടം വീണ്ടും ഇന്ത്യയിലെത്തിക്കണം,​ എന്താണ് വേണ്ടതെന്ന് ഗില്ലിന് അറിയാം; രോഹിത് ശർമ്മ

ഗോഹട്ടി: 2027ലെ ഏകദിന ലോകകപ്പിൽ ഇന്ത്യയ്ക്കായി വീണ്ടും കിരീടം നേടുകയാണ് ലക്ഷ്യമെന്ന് മുൻ ഇന്ത്യൻ നായകനും ഓപ്പണറുമായ രോഹിത് ശർമ്മ. ലോകകപ്പ് വിജയത്തിന്റെ ആവേശം ഒരിക്കൽക്കൂടി അനുഭവിക്കണമെന്ന ആഗ്രഹവും രോഹിത് തുറന്നുപറഞ്ഞു. വെസ്റ്റ് ഇൻഡീസിനെതിരായ മൂന്നാം ഏകദിനത്തിന് മുന്നോടിയായി ജിയോസ്റ്റാറിന് നൽകിയ അഭിമുഖത്തിലാണ് രോഹിത് ഇക്കാര്യം വ്യക്തമാക്കിയത്.

'വരാനിരിക്കുന്ന ഏകദിന ലോകകപ്പ് ജയിക്കുന്നത് വലിയ കാര്യമായിരിക്കും. ഇപ്പോൾ അത്രയേ ഞാൻ പറയുന്നുള്ളൂ. 'പൂർണവൃത്തം' ഇപ്പോൾ ചിന്തിക്കുന്നില്ല. ഇന്ത്യയ്ക്കായി ലോകകപ്പ് നേടുന്നത് പ്രത്യേക അനുഭവമാണ്. ട്വന്റി-20 ഫോർമാറ്റിൽ രണ്ടുതവണ ആ അനുഭവം എനിക്കുണ്ടായിട്ടുണ്ട്,' രോഹിത് പറഞ്ഞു.

2007ൽ ട്വന്റി-20 ലോകകപ്പ് നേടിയ ഇന്ത്യൻ ടീമിന്റെ ഭാഗമായിരുന്നപ്പോൾ തനിക്ക് 20 വയസ് മാത്രമായിരുന്നുവെന്നും രോഹിത് ഓർമിച്ചു. 2013ലെ ചാമ്പ്യൻസ് ട്രോഫി വിജയത്തിന് ശേഷം ഐ.സി.സി കിരീടത്തിനായി ഇന്ത്യയ്ക്ക് 11 വർഷത്തോളം കാത്തിരിക്കേണ്ടിവന്നതും അദ്ദേഹം ചൂണ്ടിക്കാട്ടി. 2024ലെ ട്വന്റി-20 ലോകകപ്പ് വിജയത്തിന്റെ പ്രാധാന്യം അതുകൊണ്ടുതന്നെ വലുതായിരുന്നുവെന്നും രോഹിത് പറഞ്ഞു.

'ലോകകപ്പ് ജയിക്കുന്നത് എങ്ങനെയാണെന്ന് എനിക്ക് അറിയാം. ആ അനുഭവം ഇപ്പോഴും മനസിലുണ്ട്. അതുകൊണ്ടാണ് ആ വികാരം ഒരിക്കൽക്കൂടി അനുഭവിക്കാൻ ആഗ്രഹിക്കുന്നത്. അന്ന് ഞങ്ങൾ അനുഭവിച്ച സന്തോഷം വാക്കുകളിൽ വിവരിക്കാനാകില്ല. അതിന് പകരംവയ്ക്കാൻ മറ്റൊന്നിനും കഴിയില്ല,' രോഹിത് വ്യക്തമാക്കി.

അതേസമയം,​ ഇന്ത്യയുടെ ഏകദിന ടെസ്റ്റ് നായകൻ ശുഭ്മാൻ ഗില്ലിന്റെ നേതൃത്വത്തെയും അദ്ദേഹം പ്രശംസിച്ചു. ഏകദേശം ഒരു വർഷമായി ഗിൽ നായകസ്ഥാനത്തുണ്ടെന്നും ഇത്ര നേരത്തെ തന്നെ അദ്ദേഹത്തെ നായകനെന്ന നിലയിൽ വിലയിരുത്തുന്നത് ശരിയല്ലെന്നും രോഹിത് പറഞ്ഞു.

'ഗില്ലിന് ബുദ്ധിയുണ്ട്. നായകനെന്ന നിലയിൽ അദ്ദേഹം വ്യക്തതയുള്ളയാളാണ്. ഒരു ക്യാപ്‌ടന് ഏറ്റവും പ്രധാനമായി വേണ്ടതും അതുതന്നെയാണ്. നായകന് കാര്യങ്ങളിൽ വ്യക്തതയുണ്ടെങ്കിൽ ചുറ്റുമുള്ള താരങ്ങൾക്കും കാര്യങ്ങൾ വ്യക്തമായിരിക്കും. ഗില്ലിൽ ഞാൻ കാണുന്നതും അതാണ്. എന്താണ് വേണ്ടതെന്ന് അദ്ദേഹത്തിന് വ്യക്തമായി അറിയാം. ശരിയായ ദിശയിലാണ് അദ്ദേഹം മുന്നോട്ടുപോകുന്നത്,' രോഹിത് പറഞ്ഞു. നായകന് ടീമംഗങ്ങളുടെയും പരിശീലക സംഘത്തിന്റെയും പിന്തുണ അനിവാര്യമാണെന്നും ഗില്ലിനെ തനിക്ക് കഴിയുന്ന രീതിയിലെല്ലാം പിന്തുണയ്ക്കുമെന്നും രോഹിത് വ്യക്തമാക്കി.

'ഗിൽ നായകനായതുകൊണ്ട് അദ്ദേഹത്തിൽനിന്ന് അകന്നുനിൽക്കണമെന്നോ കുറച്ച് മാത്രം സംസാരിക്കണമെന്നോ ഇല്ല. അരങ്ങേറ്റം മുതൽ ഞങ്ങൾ ഒരേ ദിശയിലാണ് മുന്നോട്ടുപോകുന്നത്. അതിൽ മാറ്റമുണ്ടാകേണ്ട കാര്യമില്ല. ടീമിലെ എല്ലാവരും ഒരുമിച്ചാണെന്ന ആത്മവിശ്വാസം ഗില്ലിന് ലഭിക്കണം. അദ്ദേഹത്തെ പിന്തുണച്ച് ടീമിനെ മുന്നോട്ടുകൊണ്ടുപോകുകയാണ് ഞങ്ങളുടെ ജോലി,'- രോഹിത് പറഞ്ഞു.

വെസ്റ്റ് ഇൻഡീസിനെതിരായ രണ്ടാം ഏകദിനത്തിൽ രോഹിത്–ഗിൽ സഖ്യം റെക്കാഡ് പ്രകടനമാണ് പുറത്തെടുത്തത്. 406 റൺസ് വിജയലക്ഷ്യം പിന്തുടർന്ന ഇന്ത്യയ്ക്കായി ഇരുവരും ചേർന്ന് 255 റൺസിന്റെ ഓപ്പണിംഗ് കൂട്ടുകെട്ട് പടുത്തുയർത്തി. ഇന്ത്യയുടെ ഏകദിന ചരിത്രത്തിലെ രണ്ടാമത്തെ ഉയർന്ന ഓപ്പണിംഗ് കൂട്ടുകെട്ടാണിത്. 75 പന്തിൽ 101 റൺസെടുത്താണ് രോഹിത് പുറത്തായത്. 10 ഫോറും ആറ് സിക്സും ഉൾപ്പെട്ട ഇന്നിംഗ്സിൽ 134.67 ആയിരുന്നു സ്‌ട്രൈക്ക് റേറ്റ്. പരമ്പരയിലെ മൂന്നാം മത്സരം ഒക്ടോബർ 3 ശനിയാഴ്ച ഉച്ചയ്ക്ക് രണ്ടിന് ആരംഭിക്കും.

Leave a Reply

Your email address will not be published. Required fields are marked *