വാഷിംഗ്ടൺ: യുഎസ് പ്രസിഡന്റ് ഡൊണാൾഡ് ട്രംപിനെതിരെ ബലാത്സംഗ ആരോപണവുമായി മുൻ മിസ് സ്വിറ്റ്സർലൻഡ് രംഗത്തെത്തിയെന്ന് ഡെമോക്രാറ്റിക് പാർട്ടി പുറത്തുവിട്ട റിപ്പോർട്ടിൽ പറയുന്നു. 1993 നവംബറിൽ റിപ്പബ്ലിക്കൻ നേതാവായ ട്രംപ് തന്നെ അപമാനിക്കാൻ ശ്രമിച്ചുവെന്ന് മുൻപ് ആരോപിച്ചിരുന്ന മോഡലായ ബിയാട്രിസ് ക്യൂൾ, ആ സംഭവത്തിനിടെ ട്രംപ് തന്നെ ബലാത്സംഗം ചെയ്യുകയായിരുന്നുവെന്ന് ഇപ്പോൾ വെളിപ്പെടുത്തിയിരിക്കുകയാണ്.
ലൈംഗിക കുറ്റകൃത്യങ്ങൾക്ക് ശിക്ഷിക്കപ്പെട്ട ജെഫ്രി എപ്‌സ്റ്റീനുമായി ട്രംപിനുള്ള ബന്ധത്തെക്കുറിച്ച് യുഎസ് ഹൗസ് ഡെമോക്രാറ്റുകൾ നടത്തുന്ന അന്വേഷണത്തിന്റെ വിവരങ്ങളും റിപ്പോർട്ടിൽ വിശദീകരിക്കുന്നുണ്ട്. എന്നാൽ റിപ്പോർട്ടിലെ ആരോപണങ്ങൾ വൈറ്റ് ഹൗസ് തള്ളി. "പ്രസിഡന്റ് ട്രംപിന്റെ ചരിത്രപരമായ നേട്ടങ്ങളിലൂടെ റിപ്പബ്ലിക്കൻ പാർട്ടി നേടുന്ന ജനപ്രീതിയിൽ നിന്ന് അമേരിക്കക്കാരുടെ ശ്രദ്ധ തിരിക്കാൻ അസ്വസ്ഥരായ ഡൊമോക്രാറ്റുകൾ നടത്തുന്ന നിരാശാജനകമായ ശ്രമം" എന്നാണ് വൈറ്റ് ഹൗസ് വക്താവ് ഇതിനെ വിശേഷിപ്പിച്ചത്.
പ്രായപൂർത്തിയാകാത്തവരെ ലൈംഗികമായി കടത്തിയ കേസിൽ വിചാരണ കാത്തുനിൽക്കവെ 2013-ൽ ഫെഡറൽ കസ്റ്റഡിയിൽ വെച്ച് ആത്മഹത്യ ചെയ്ത എപ്‌സ്റ്റീന്റെ അടുത്ത സുഹൃത്തായിരുന്നു ട്രംപ് എന്ന് ഡെമോക്രാറ്റുകളുടെ റിപ്പോർട്ടിൽ ചൂണ്ടിക്കാണിക്കുന്നു. ഡെമോക്രാറ്റുകളുമായി ക്യൂൾ നടത്തിയ അഭിമുഖങ്ങളുടെ പരമ്പര റിപ്പോർട്ടിൽ ഉൾപ്പെടുത്തിയിട്ടുണ്ട്. 1993-ൽ അറ്റ്ലാന്റിക് സിറ്റിയിലെ ട്രംപിന്റെ പ്ലാസ ഹോട്ടലിലെ ഒരു മുറിയിൽ വെച്ച്, എപ്‌സ്റ്റീനൊപ്പം സമയം ചെലവഴിച്ച ശേഷമാണ് ട്രംപ് തന്നെ "ക്രൂരമായി" ബലാത്സംഗം ചെയ്തതെന്ന് മോഡൽ ആരോപിക്കുന്നു. 24 വയസ്സിൽ ന്യൂയോർക്കിലെ പ്ലാസ ഹോട്ടലിൽ നടന്ന ഒരു സൗന്ദര്യമത്സര ചടങ്ങിൽ വെച്ചാണ് ക്യൂൾ ആദ്യമായി ട്രംപിനെ കാണുന്നത് (അന്ന് ആ ഹോട്ടൽ ട്രംപിന്റെ ഉടമസ്ഥതയിലായിരുന്നു).
തനിക്ക് വിസയും ന്യൂയോർക്ക് യൂണിവേഴ്സിറ്റിയിൽ പ്രവേശനവും ശരിയാക്കി നൽകാമെന്ന് ട്രംപ് വാഗ്ദാനം ചെയ്തിരുന്നതായി 'ദി ടെലിഗ്രാഫ്' പ്രസിദ്ധീകരിച്ച റിപ്പോർട്ടിൽ പറയുന്നു. താൻ "ഡോണിന്റെ ഏറ്റവും അടുത്ത സുഹൃത്താണ്" എന്ന് പറഞ്ഞ് എപ്‌സ്റ്റീൻ തന്നെ സമീപിക്കുകയും മാർ-എ-ലാഗോയിലെ ഒരു പാർട്ടിയിലേക്ക് ക്ഷണിക്കുകയും ചെയ്തതായി ക്യൂൾ ആരോപിക്കുന്നു. തുടർന്ന്, പ്ലാസ ഹോട്ടലിന്റെ മുകളിലത്തെ നിലയിൽ വെച്ച് ട്രംപിനെ കാണാൻ ഒരു പ്രതിനിധി വഴി ക്യൂളിന് ക്ഷണം ലഭിച്ചതായി ഡെമോക്രാറ്റുകളുടെ റിപ്പോർട്ട് ആരോപിക്കുന്നു.
"അകത്തു പ്രവേശിച്ചയുടൻ ട്രംപ് ക്യൂളിനെ പിന്നിൽ നിന്ന് പിടിച്ച് നിർബന്ധപൂർവ്വം ബലാത്സംഗം ചെയ്യുകയായിരുന്നു; ഈ പ്രക്രിയയിൽ ഇയാൾ അവരുടെ വസ്ത്രങ്ങൾ കീറുകയും ശരീരത്തിന്റെ വിവിധ ഭാഗങ്ങളിൽ മുറിവുകളും രക്തസ്രാവവും ഉണ്ടാക്കുകയും ചെയ്തു," റിപ്പോർട്ട് അവകാശപ്പെടുന്നു. സംഭവം വളരെ 'ക്രൂരമായിരുന്നു' എന്ന് ക്യൂൾ വിശേഷിപ്പിച്ചു." അതിക്രമത്തിന് ശേഷം ട്രംപ് "തന്നെ കട്ടിലിന്റെ അരികിൽ ഇരുത്തുകയും വിസയും ന്യൂയോർക്ക് യൂണിവേഴ്സിറ്റി പ്രവേശനവും ശരിയാക്കി നൽകാമെന്ന വാഗ്ദാനം ആവർത്തിക്കുകയും ചെയ്തു. കൂടാതെ 'ദ ഷോ മസ്റ്റ് ഗോ ഓൺ' എന്ന് പറഞ്ഞ് സംഭവം പുറത്തുപറയില്ലെന്ന് തന്നിൽ നിന്ന് ഉറപ്പു വാങ്ങുകയും ചെയ്തു," റിപ്പോർട്ടിൽ പറയുന്നു.
അതേസമയം, എപ്‌സ്റ്റീൻ ഏതെങ്കിലും തരത്തിലുള്ള കുറ്റകൃത്യങ്ങളിൽ ഏർപ്പെട്ടിട്ടുണ്ടെന്ന് സംശയിക്കുന്നതിന് എത്രയോ മുമ്പ് തന്നെ താൻ അയാളുമായുള്ള സൗഹൃദം അവസാനിപ്പിച്ചിരുന്നുവെന്നാണ് ട്രംപ് അവകാശപ്പെടുന്നത്.
ട്രംപിനെതിരെ നേരത്തെ പരസ്യമായ മറ്റു പല ലൈംഗികാതിക്രമ ആരോപണങ്ങളോടും ക്യൂളിന്റെ വെളിപ്പെടുത്തൽ സമാനമാണെന്ന് ഡെമോക്രാറ്റുകൾ പറഞ്ഞു. അമേരിക്കയിലെ ഏറ്റവും കുപ്രസിദ്ധനായ ലൈംഗിക കുറ്റവാളിയുമായുള്ള സൗഹൃദ കാലയളവിൽ ട്രംപ് പിന്തുടർന്ന ഒരു സ്ഥിരം രീതിയാണിതെന്നും അവർ വിശേഷിപ്പിച്ചു.
