വെല്ലിങ്ടണ്: ന്യൂസീലന്ഡ് ക്രിക്കറ്റിലെ ഇതിഹാസ താരം കെയിന് വില്യംസണ് അന്താരാഷ്ട്ര ക്രിക്കറ്റില്നിന്ന് വിരമിച്ചു. 16 വര്ഷം നീണ്ടുനിന്ന കരിയറില് മൂന്ന് ഫോര്മാറ്റുകളിലായി 378 മത്സരങ്ങളില് പാഡണിഞ്ഞ ശേഷമാണ് താരം കളിമൈതാനങ്ങളോട് വിടപറയുന്നത്. ലോക ക്രിക്കറ്റിലെതന്നെ ഏറ്റവും മികച്ച ബാറ്റര്മാരിലൊരാളാണ് അദ്ദേഹം.
നിലവില് ന്യൂസീലന്ഡ് ടീം ഇംഗ്ലണ്ടില് നടത്തുന്ന ടെസ്റ്റ് പരമ്പരയ്ക്കിടയിലാണ് വില്യംസന്റെ ഈ അപ്രതീക്ഷിത തീരുമാനം. പരമ്പരയിലെ ആദ്യ മത്സരത്തില് പരാജയപ്പെട്ട ന്യൂസീലന്ഡ് ഇപ്പോള് 1-0ന് പിന്നിലാണ്. ലോര്ഡ്സില് നടന്ന ആദ്യ ടെസ്റ്റാണ് കരിയറിലെ തന്റെ അവസാന അന്താരാഷ്ട്ര മത്സരമെന്ന് വ്യക്തമാക്കിയ താരം, പരമ്പരയിലെ ബാക്കി മത്സരങ്ങളില് കളിക്കില്ലെന്നും അറിയിച്ചു.
പൂര്ണമായ സമര്പ്പണത്തോടെയല്ലാതെ കളിയില് തുടരുന്നത് ശരിയല്ലെന്ന് തോന്നിയതായി താരം പറഞ്ഞു. സ്വന്തം ഇഷ്ടപ്രകാരം, അഭിമാനത്തോടെ കളി നിര്ത്താന് സാധിച്ചതില് ഏറെ ഭാഗ്യവാനാണെന്നും അദ്ദേഹം കൂട്ടിച്ചേര്ത്തു.
2010-ല് ന്യൂസീലന്ഡിനായി ഇന്ത്യക്കെതിരേ അരങ്ങേറ്റം കുറിച്ച വില്യംസണ്, 19,346 റണ്സ് നേടി ന്യൂസീലന്ഡിന്റെ ഏറ്റവും കൂടുതല് റണ്സ് നേടിയ കളിക്കാരനായാണ് വിരമിക്കുന്നത്. 48 സെഞ്ചുറികളും നേടിയിട്ടുണ്ട്. 110 ടെസ്റ്റുകളില്നിന്ന് 9,515 റണ്സും 175 ഏകദിനങ്ങളില്നിന്ന് 7,256 റണ്സുമാണ് സമ്പാദ്യം. കഴിഞ്ഞ നവംബറില് അന്താരാഷ്ട്ര ടി20-യില്നിന്ന് വിരമിച്ചിരുന്നു. 2,575 റണ്സുമായി ഫോര്മാറ്റില് ന്യൂസീലന്ഡിന്റെ രണ്ടാമത്തെ ഏറ്റവും ഉയര്ന്ന റണ്സ് നേടിയ താരവും അദ്ദേഹമാണ്. ടെസ്റ്റില് 33 സെഞ്ചുറികളും 38 അര്ധ സെഞ്ചുറികളും നേടിയിട്ടുണ്ട്. ആറ് ഇരട്ട സെഞ്ചുറികളും വില്യംസണിന്റെ പേരിലുണ്ട്.
40 ടെസ്റ്റുകള്, 91 ഏകദിനങ്ങള്, 75 ടി20-കള് എന്നിവയില് ന്യൂസീലന്ഡിനെ നയിച്ചത് അദ്ദേഹമാണ്. 2012-2024 കാലയളവിലാണ് ഈ 206 മത്സരങ്ങളിലായി ന്യൂസീലന്ഡിനെ നയിച്ചത്. 2019-ല് ഏകദിന ലോകകപ്പ് ഫൈനലിലും 2021-ല് ടി20 ലോകകപ്പ് ഫൈനലിലുമെത്തിച്ചു. 2021-ല് നടന്ന ലോക ടെസ്റ്റ് ചാമ്പ്യന്ഷിപ്പ് ഫൈനലില് ഇന്ത്യയെ പരാജയപ്പെടുത്തി ഐ.സി.സി. കിരീടം നേടി.
വിരാട് കോലി, ജോ റൂട്ട്, സ്റ്റീവ് സ്മിത്ത് തുടങ്ങിയവര് ഉള്പ്പെട്ട ആധുനിക ക്രിക്കറ്റിലെ ഫാബ് ഫോറില് ഒരാളായിരുന്നു അദ്ദേഹം. ഇതില് കോലി ടെസ്റ്റില്നിന്നും ടി20-യില്നിന്നും വിരമിച്ചിട്ടുണ്ട്. ഈ നാലുപേരില് മൂന്ന് ഫോര്മാറ്റില്നിന്നും വിരമിക്കുന്ന ആദ്യ താരമാണ് വില്യംസണ്.
