കൊച്ചി: കള്ളുഷാപ്പുകളിൽ സ്ത്രീകളെ ജോലിക്ക് നിയമിക്കുന്നത് വിലക്കിയ ചട്ടം റദ്ദാക്കി കേരള ഹൈക്കോടതി. കേരള അബ്കാരി ഷാപ്പ് ഡിസ്പോസൽ ചട്ടങ്ങളിലെ 7(37)-ാം വകുപ്പാണ് ഭരണഘടനാ വിരുദ്ധമെന്ന് ചൂണ്ടിക്കാട്ടി കോടതി റദ്ദാക്കിയത്. തൃശൂർ സ്വദേശിനി സോഫി സമർപ്പിച്ച ഹർജിയിലാണ് നടപടി.
2024ൽ കള്ളുഷാപ്പ് ജീവനക്കാരനായ ഭർത്താവ് മരിച്ചതിനെ തുടർന്ന് സോഫി ആശ്രിത നിയമനത്തിന് അപേക്ഷിച്ചെങ്കിലും ചട്ടം ചൂണ്ടിക്കാട്ടി ജോലി നിഷേധിക്കുകയായിരുന്നു. ഇതോടെയാണ് മുതിർന്ന അഭിഭാഷകൻ രഞ്ജിത്ത് തമ്പാൻ മുഖേന അവർ ഹൈക്കോടതിയെ സമീപിച്ചത്. സ്ത്രീകളെ ചൂഷണത്തിൽനിന്നും ജോലിസ്ഥലത്തെ ഉപദ്രവങ്ങളിൽനിന്നും സംരക്ഷിക്കാനാണ് വിലക്ക് ഏർപ്പെടുത്തിയതെന്നായിരുന്നു സർക്കാർ വാദം.
എന്നാൽ, ലിംഗവിവേചനം മൂലമുള്ള പ്രയാസങ്ങൾ ഇല്ലാതാക്കുകയും സ്ത്രീകൾക്ക് അവർ തിരഞ്ഞെടുക്കുന്ന മേഖലകളിൽ സുരക്ഷിതമായി ജോലി ചെയ്യാനുള്ള സാഹചര്യം ഒരുക്കുകയുമാണ് സർക്കാർ ചെയ്യേണ്ടതെന്ന് ഹൈക്കോടതി വ്യക്തമാക്കി. വിദേശമദ്യഷാപ്പുകളിൽ സ്ത്രീകളെ നിയമിക്കുന്നത് വിലക്കിയ ചട്ടവും നേരത്തേ കോടതി റദ്ദാക്കിയിരുന്നു. സ്ത്രീകൾക്ക് ഇഷ്ടമുള്ള മേഖലകളിൽ ജോലി ചെയ്യാനുള്ള സുരക്ഷ ഉറപ്പാക്കുകയാണ് വേണ്ടതെന്നും കോടതി നിരീക്ഷിച്ചു.
