ന്യൂഡൽഹി: രാജ്യത്തിന്റെ പ്രതിരോധ ശേഷിയിൽ മറ്റൊരു നാഴികക്കല്ല് കുറിച്ചുകൊണ്ട്, തദ്ദേശീയമായി വികസിപ്പിച്ച ക്വാസി-ബാലിസ്റ്റിക് മിസൈലായ 'പ്രളയ്' ഇന്ത്യ വ്യാഴാഴ്ച ഒഡീഷ തീരത്തുള്ള ഡോ. എപിജെ അബ്ദുൾ കലാം ദ്വീപിൽ നിന്ന് വിജയകരമായി പരീക്ഷിച്ചു. വഹിക്കുന്ന ഭാരത്തിന് അനുസൃതമായി 150 മുതൽ 500 കിലോമീറ്റർ വരെയാണ് പ്രഹര ശേഷി.
വിജയകരമായ ഫ്ലൈറ്റ്-ടെസ്റ്റിൽ ഡിആർഡിഒ, പ്രതിരോധ സേനകൾ, വ്യവസായ പങ്കാളികൾ എന്നിവരെ പ്രതിരോധമന്ത്രി രാജ്നാഥ് സിംഗ് അഭിനന്ദിച്ചു. അത്യാധുനിക സാങ്കേതികവിദ്യകൾ സജ്ജീകരിച്ചിട്ടുള്ള ഈ മിസൈൽ, സൈന്യത്തിന്റെ സാങ്കേതിക ശേഷിയും ഉയർന്നുവരുന്ന ഭീഷണികൾക്കെതിരായ പ്രവർത്തന സജ്ജീകരണവും കൂടുതൽ ശക്തിപ്പെടുത്തുമെന്ന് അദ്ദേഹം പറഞ്ഞു.
ഡിഫൻസ് റിസർച്ച് ആൻഡ് ഡെവലപ്‌മെന്റ് ഓർഗനൈസേഷൻ (ഡിആർഡിഒ) വികസിപ്പിച്ച ഈ ഹ്രസ്വദൂര ഭൂതല-ഭൂതല മിസൈലിന് പരമ്പരാഗത പോർമുനകൾ വഹിക്കാൻ കഴിയുമെന്ന് പ്രതിരോധ മന്ത്രാലയം പ്രസ്താവനയിൽ പറഞ്ഞു. പ്രളയ് മിസൈലിന് 500-1,000 കിലോഗ്രാം പേലോഡ് ശേഷിയുണ്ട്. വിജയകരമായ പരീക്ഷണത്തെത്തുടർന്ന്, മിസൈൽ സായുധ സേനയുടെ ഭാഗമാക്കുന്നത് ഉടൻ ഉണ്ടാകുമെന്ന് മന്ത്രാലയം അറിയിച്ചു.
ചന്ദിപൂരിലെ ഇന്റഗ്രേറ്റഡ് ടെസ്റ്റ് റേഞ്ച് (ഐടിആർ) സ്ഥാപിച്ച വിവിധ റേഞ്ച് ഇൻസ്ട്രുമെന്റുകൾ രേഖപ്പെടുത്തിയ ഡാറ്റ സ്ഥിരീകരിച്ചത് അനുസരിച്ച്, പരീക്ഷണ ലക്ഷ്യങ്ങളെല്ലാം പൂർണ്ണമായും കൈവരിച്ചതായി പ്രതിരോധ മന്ത്രാലയം അറിയിച്ചു. ഹൈദരാബാദിലെ റിസർച്ച് സെന്റർ ഇമറാത്ത് (ആർസിഐ), മറ്റ് ഡിആർഡിഒ ലബോറട്ടറികളുമായി ചേർന്നാണ് ഈ മിസൈൽ തദ്ദേശീയമായി വികസിപ്പിച്ചതെന്ന് മന്ത്രാലയം അറിയിച്ചു. വികസന-ഉൽപ്പാദന പങ്കാളികളിലൊന്നായ ഭാരത് ഡൈനാമിക്സ് ലിമിറ്റഡ് (ബിഡി‌എൽ) ആണ് ഈ സംവിധാനം നിർമ്മിച്ചിരിക്കുന്നത്.
