കോട്ടയം: കോണ്ഗ്രസ് അധ്യക്ഷന് രാഹുല് ഗാന്ധി പാലായില് അന്തരിച്ച കേരള കോണ്ഗ്രസ് പാര്ട്ടി ചെയര്മാന് കെ.എം മാണിയുടെ വസതിയില് സന്ദര്ശനം നടത്തും. ചൊവ്വാഴ്ച ഉച്ചയ്ക്ക് പത്തനംതിട്ടയിലെ തിരഞ്ഞെടുപ്പ് പ്രചാരണ പ്രവര്ത്തനങ്ങള്ക്ക് ശേഷമാണ് രാഹുല് ഗാന്ധി പാലായില് എത്തുക. പാലാ സെന്റ് തോമസ് കോളേജ് ഗ്രൗണ്ടില് ഹെലികോപ്റ്ററില് ഇറങ്ങിയ ശേഷം കാര് മാര്ഗമാണ് അദ്ദേഹം വീട്ടിലെത്തുക.
നാളെ കേരളത്തിലെത്തുന്ന രാഹുല് വയനാടിന് പുറമെ മറ്റ് ഏഴു ജില്ലകളിലും പര്യടനം നടത്തും. ചൊവ്വാഴ്ച വയനാട് ലോകസഭ മണ്ഡലത്തിലെ മൂന്ന് പൊതുയോഗങ്ങളില് കോണ്ഗ്രസ് അധ്യക്ഷന് പങ്കെടുക്കും.
ചൊവ്വാഴ്ച പത്തനംതിട്ട, ആലപ്പുഴ, തിരുവനന്തപുരം, കണ്ണൂര് ജില്ലകളില് പര്യടനം നടത്തും. ബുധനാഴ്ച വയനാട് മണ്ഡലത്തിന് മാത്രമായി രാഹുല് മാറ്റിവെച്ചിരിക്കുകയാണ്. തിരുനെല്ലി ക്ഷേത്രവും സന്ദര്ശിക്കും. രാജീവ് ഗാന്ധിയുടെ ചിതാഭസ്മം നിമഞ്ജനം ചെയ്ത തിരുനെല്ലിയിലെ പാപനാശിനിയും രാഹുല് സന്ദര്ശിക്കും. വയനാട്ടിലെ പൊതുയോഗം സുല്ത്താന് ബത്തേരിയിലാണ്. വയനാട് മണ്ഡലത്തിന്റെ ഭാഗമായ കോഴിക്കോട് ജില്ലയിലെ തിരുവമ്പാടിയിലും മലപ്പുറത്തെ നിലമ്പൂരിലും രാഹുല് പ്രസംഗിക്കും.
മാവോയിസ്റ്റ് ഭീഷണി ഉള്പ്പടെ സുരക്ഷ പ്രശ്നങ്ങള് ഉള്ളതിനാല് രാഹുലിന്റെ പരിപാടികളില് അവസാന നിമിഷം വരെ മാറ്റം ഉണ്ടായേക്കാം. മാനന്തവാടിയില് നിന്ന് തിരുനെല്ലിയിലേക്കുള്ള യാത്ര വനത്തിലൂടെ ആയതിനാല് ഇതു സംബന്ധിച്ച് അന്തിമ തീരുമാനം എസ്.പി.ജിയുടെതാവും.
