കൊച്ചി: പറവൂർ താലൂക്ക് ആശുപത്രി മോർച്ചറിയിൽ സൂക്ഷിച്ച മൃതദേഹം അഴുകിയ നിലയിൽ കണ്ടെത്തിയ സംഭവത്തിൽ ആരോഗ്യമന്ത്രി കെ. മുരളീധരൻ ഇടപെട്ടു. ആശുപത്രിയിലേക്ക് ആറ് പുതിയ ഫ്രീസറുകൾ ഉടൻ എത്തിക്കാൻ ജില്ലാ മെഡിക്കൽ ഓഫീസർക്ക് മന്ത്രി നിർദേശം നൽകി.
പറവൂർ പരുവതുരുത്ത് സ്വദേശിനി ജെസ്സി പൈലിയുടെ മൃതദേഹമാണ് മോർച്ചറിയിൽ 16 മണിക്കൂർ സൂക്ഷിച്ച ശേഷം അഴുകിയ നിലയിൽ കണ്ടെത്തിയത്. പോസ്റ്റ്‌മോർട്ടത്തിനായി മൃതദേഹം പുറത്തെടുത്തപ്പോഴാണ് അഴുകിയതായി ശ്രദ്ധയിൽപ്പെട്ടത്. തുടർന്ന് ജെസ്സിയുടെ മകൻ പരാതിയുമായി രംഗത്തെത്തി.
സംഭവത്തിൽ ഡി.എം.ഒ റിപ്പോർട്ട് തേടിയിട്ടുണ്ട്. അതേസമയം, മൃതദേഹം സൂക്ഷിക്കുന്നതിൽ വീഴ്ചയുണ്ടായിട്ടില്ലെന്നാണ് ആശുപത്രി അധികൃതരുടെ വിശദീകരണം.
താലൂക്ക് ആശുപത്രിയിലെ നിലവിലെ ഫ്രീസറുകൾക്ക് കാലപ്പഴക്കമുണ്ടെന്ന വിവരവും ആരോഗ്യമന്ത്രിക്ക് ലഭിച്ചിട്ടുണ്ട്. എന്നാൽ ജെസ്സിയുടെ മൃതദേഹം തകരാറുകളില്ലാത്ത മൊബൈൽ ഫ്രീസറിലാണ് സൂക്ഷിച്ചതെന്നും പോസ്റ്റ്‌മോർട്ടത്തിനായി പുറത്തെടുക്കുമ്പോൾ ഫ്രീസറിലെ താപനില -3 ഡിഗ്രി സെൽഷ്യസ് ആയിരുന്നെന്നും ആശുപത്രി അധികൃതർ വ്യക്തമാക്കി.
