മുസാഫറാബാദ്: പാകിസ്താന് അധിനിവേശ കശ്മീരിലെ മുസാഫറാബാദിന് സമീപം പാകിസ്താന് സൈന്യത്തിന്റെ എം.ഐ-17 (Mi-17) ഹെലികോപ്റ്റര് തകര്ന്നുവീണു. അപകടത്തില് 21 പാക് സൈനികര് കൊല്ലപ്പെട്ടു.
നീലം വാലി സെക്ടറിലേക്ക് സൈനികരെ എത്തിക്കുന്നതിനുള്ള ദൗത്യത്തിനിടെ ഹെലികോപ്റ്ററിനുണ്ടായ സാങ്കേതിക തകരാറാണ് അപകടത്തിന് കാരണമെന്ന് പാകിസ്താന് സൈന്യത്തിന്റെ മാധ്യമ വിഭാഗമായ ഐ.എസ്.പി.ആര് അറിയിച്ചു. പൈലറ്റുമാര് അടിയന്തര ലാന്ഡിങ്ങിന് ശ്രമിച്ചെങ്കിലും പരാജയപ്പെടുകയായിരുന്നെന്നും ഹെലികോപ്റ്ററില് ഉണ്ടായിരുന്ന 21 പേരും മരിച്ചതായും സൈന്യം സ്ഥിരീകരിച്ചു. കൊല്ലപ്പെട്ടവരുടെ വിവരങ്ങള് ഇതുവരെ വെളിപ്പെടുത്തിയിട്ടില്ല.
സംഭവത്തില് പാകിസ്താന് സൈനിക മേധാവി ഫീല്ഡ് മാര്ഷല് അസിം മുനീര് അനുശോചനം രേഖപ്പെടുത്തി. അപകടത്തിന്റെ കൃത്യമായ സാങ്കേതിക കാരണം കണ്ടെത്താനായി ഉന്നതതല അന്വേഷണത്തിന് ഉത്തരവിട്ടതായി അദ്ദേഹം അറിയിച്ചു. പാകിസ്താനില് അടുത്ത കാലത്തായി തുടര്ച്ചയായുണ്ടാകുന്ന സൈനിക വിമാന അപകടങ്ങള് വ്യോമയാന സുരക്ഷയെക്കുറിച്ച് ചോദ്യങ്ങള് ഉയര്ത്തുന്നുണ്ട്. 2025 സെപ്റ്റംബറില് ഗില്ഗിത്-ബാള്ട്ടിസ്ഥാനിലെ ഡയാമര് ജില്ലയില് ഉണ്ടായ ഹെലികോപ്റ്റര് അപകടത്തില് അഞ്ച് സൈനികര് കൊല്ലപ്പെട്ടിരുന്നു. ഓഗസ്റ്റില് മൊഹ്മന്ദ് ജില്ലയിലുണ്ടായ മറ്റൊരു അപകടത്തില് രണ്ട് പൈലറ്റുമാരും മൂന്ന് ജീവനക്കാരും മരിച്ചിരുന്നു.
