മലപ്പുറം: ക്യാംപസിലെ സംഘർഷാവസ്ഥയെ തുടർന്ന് അടച്ചിട്ട കാലിക്കറ്റ് സർവകലാശാലയിൽ തിങ്കളാഴ്ച മുതൽ ഓൺലൈൻ ക്ലാസുകൾ ആരംഭിക്കും. സർവകലാശാലയിലെ പഠനവകുപ്പുകളിലാണ് ഓൺലൈൻ അധ്യയനം പുനരാരംഭിക്കുന്നത്. എന്നാൽ ക്യാംപസിൽ നേരിട്ടുള്ള ക്ലാസുകൾ തുടങ്ങുന്നതിനും ആൺകുട്ടികളുടെ ഹോസ്റ്റൽ തുറക്കുന്നതിനും നിലവിൽ തീരുമാനമായിട്ടില്ല.
കഴിഞ്ഞ മാസം നടന്ന യൂണിയൻ തെരഞ്ഞെടുപ്പിന് പിന്നാലെയുണ്ടായ സംഘർഷത്തെ തുടർന്നാണ് സർവകലാശാലാ ക്യാംപസ് അനിശ്ചിതകാലത്തേക്ക് അടച്ചത്. വീണ്ടും സംഘർഷമുണ്ടാകാനുള്ള സാധ്യത കണക്കിലെടുത്താണ് നേരിട്ടുള്ള അധ്യയനം തൽക്കാലം ഒഴിവാക്കിയത്.
ക്യാംപസിലെ തന്ത്രപ്രധാനമായ സ്ഥലങ്ങളിൽ തെരുവുവിളക്കുകൾ സ്ഥാപിക്കാനും ശുപാർശയുണ്ട്. സമാധാനാന്തരീക്ഷം പുനഃസ്ഥാപിക്കുന്നതുവരെ ക്യാംപസിൽ പൊലീസ് സാന്നിധ്യം തുടരാനും തീരുമാനിച്ചിട്ടുണ്ട്. പ്രശ്നപരിഹാരത്തിനായി തിങ്കളാഴ്ച മലപ്പുറം കലക്ടറേറ്റിൽ സമാധാനയോഗം ചേരും. ജനപ്രതിനിധികൾ, രാഷ്ട്രീയ പാർട്ടി നേതാക്കൾ, സർക്കാർ ഉദ്യോഗസ്ഥർ എന്നിവർ യോഗത്തിൽ പങ്കെടുക്കും.
അതേസമയം, വിദ്യാർഥി പ്രതിനിധികളുമായി ആലോചിക്കാതെയാണ് സർവകലാശാല തീരുമാനമെടുത്തതെന്ന് യൂണിയൻ ചെയർമാനും എസ്എഫ്ഐ നേതാവുമായ ദീപക് ആരോപിച്ചു. വിദ്യാർഥികൾ എത്രയും വേഗം ക്യാംപസിലേക്ക് മടങ്ങാനാണ് ആഗ്രഹിക്കുന്നതെന്നും തിങ്കളാഴ്ച മുതൽ സെമസ്റ്റർ പരീക്ഷകൾ ആരംഭിക്കേണ്ടതായിരുന്നുവെന്നും അദ്ദേഹം പറഞ്ഞു.
ഓൺലൈൻ ക്ലാസുകൾ നടത്താനുള്ള തീരുമാനത്തെ തുടർന്ന് പരീക്ഷകളും മാറ്റിവെച്ചിരിക്കുകയാണെന്ന് ദീപക് വ്യക്തമാക്കി. അഫിലിയേറ്റഡ് കോളജുകളിൽ തിങ്കളാഴ്ച മുതൽ പരീക്ഷകൾ നടക്കും. എന്നാൽ ക്യാംപസ് തുറന്നശേഷം പ്രത്യേക ചോദ്യപേപ്പർ തയ്യാറാക്കി പരീക്ഷ നടത്താനാണ് സർവകലാശാല ആലോചിക്കുന്നതെന്നും അദ്ദേഹം പറഞ്ഞു.
സംഘർഷസാധ്യത കണക്കിലെടുത്ത് ക്യാംപസ് തുറക്കാൻ സർവകലാശാല മടിക്കുകയാണെങ്കിൽ എസ്എഫ്ഐയുടെ ഭാഗത്തുനിന്ന് പ്രശ്നങ്ങളുണ്ടാകില്ലെന്ന് ഉറപ്പുനൽകാമെന്നും ദീപക് കൂട്ടിച്ചേർത്തു. എന്നാൽ എംഎസ്എഫ്, കെഎസ്‌യു നേതൃത്വങ്ങളുടെ നിലപാട് എന്തായിരിക്കുമെന്ന് ഉറപ്പില്ലെന്നും അദ്ദേഹം പ്രതികരിച്ചു.
ക്യാംപസിലെ സമാധാനാന്തരീക്ഷം പുനഃസ്ഥാപിച്ച് സാധാരണ അധ്യയനം എപ്പോൾ പുനരാരംഭിക്കാനാകുമെന്നതിലാണ് ഇനി ശ്രദ്ധ.
