ഡൽഹിയിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് നടന്ന യുവജന പ്രതിഷേധത്തിനിടെ വ്യാപകമായി അറസ്റ്റ് ചെയ്തതിനെക്കുറിച്ചുള്ള ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണർ ഓഫീസിന്റെ പ്രസ്താവന തള്ളി ഇന്ത്യ. രാജ്യത്തിന്റെ ആഭ്യന്തര കാര്യങ്ങളിൽ അനാവശ്യമായി ഇടപെടരുതെന്ന് ഇന്ത്യ ആവശ്യപ്പെട്ടു. ഇന്ത്യ ജനാധിപത്യ രാജ്യമാണെന്നും പൗരന്മാർക്ക് പ്രതിഷേധിക്കാനുള്ള അവകാശമുണ്ടെന്നും വ്യക്തമാക്കിയ ഇന്ത്യ, ക്രമസമാധാനം നിലനിർത്തുന്നതിനായി മറ്റു രാജ്യങ്ങളിലേതുപോലെ ന്യായമായ നിയന്ത്രണങ്ങൾ മാത്രമാണ് ഏർപ്പെടുത്തിയതെന്നും വിശദീകരിച്ചു.
ഡൽഹിയിലെ സംഭവങ്ങളിൽ ഭരണകൂടത്തിന്റെയും പോലീസിന്റെയും നടപടികളിൽ ആശങ്ക രേഖപ്പെടുത്തിയാണ് യുഎൻ മനുഷ്യാവകാശ ഹൈക്കമ്മീഷണറുടെ ഓഫീസ് പ്രസ്താവന പുറത്തിറക്കിയത്. സമാധാനപരമായി ഒത്തുചേരാനും പ്രതിഷേധിക്കാനുമുള്ള അവസരം ഇന്ത്യ ഉറപ്പാക്കണമെന്നും അന്യായമായി തടവിലാക്കിയവരുണ്ടെങ്കിൽ അവരെ വിട്ടയയ്ക്കണമെന്നും പ്രസ്താവനയിൽ ആവശ്യപ്പെട്ടിരുന്നു. എന്നാൽ, ബന്ധപ്പെട്ട അധികൃതർ നിയമപരമായ നടപടികൾ മാത്രമാണ് സ്വീകരിച്ചതെന്നാണ് ഇന്ത്യയുടെ വിശദീകരണം.
ഐക്യരാഷ്ട്രസഭയുടെ മനുഷ്യാവകാശ വക്താവ് തമീം അൽ-ഖീത്താന്റെ പേരിൽ പുറത്തിറക്കിയ പ്രസ്താവനയിൽ യുവാക്കൾ, രാഷ്ട്രീയ നേതാക്കൾ, ജനപ്രതിനിധികൾ, സിവിൽ സൊസൈറ്റി സംഘടനകളിലെ അംഗങ്ങൾ, അഭിഭാഷകർ, മാധ്യമപ്രവർത്തകർ എന്നിവരെ തടവിലാക്കിയതിൽ ഗൗരവമായ ആശങ്കയും രേഖപ്പെടുത്തിയിരുന്നു. പ്രതിഷേധങ്ങളെ അടിച്ചമർത്തുന്നതുമായി ബന്ധപ്പെട്ട ആരോപണങ്ങൾ ഉന്നയിച്ചുള്ള ഈ പ്രസ്താവനയ്ക്കാണ് ഇന്ത്യ മറുപടി നൽകിയത്. രാജ്യത്തെ ക്രമസമാധാനം ഉറപ്പാക്കുന്നതിനുള്ള നടപടികളിൽ നിയമപരമായ പരിധികൾ മാത്രമാണ് പാലിച്ചതെന്ന് ഇന്ത്യ വ്യക്തമാക്കി.
