ടെഹ്‌റാൻ: വാഷിംഗ്ടണിലെ അധികാര സമവാക്യങ്ങൾ ഒറ്റരാത്രികൊണ്ട് മാറിമറിഞ്ഞപ്പോൾ, ഏറ്റവും ശക്തമായ പ്രതികരണങ്ങളിലൊന്ന് ടെഹ്‌റാനിൽ നിന്നാണ് ഉയർന്നുവന്നത്. ജനപ്രതിനിധി സഭയുടെയും സെനറ്റിന്റെയും നിയന്ത്രണം ഡെമോക്രാറ്റുകൾ പിടിച്ചെടുത്തതോടെ, ഈ തിരഞ്ഞെടുപ്പ് ഫലം ഇറാനോടുള്ള യു.എസ് നയം മൃദുവാകുമെന്നതിന്റെ സൂചനയായി കരുതരുതെന്ന് ഇറാന്റെ പരമോന്നത നേതാവ് മൊജ്തബ ഖമനേയി ജനങ്ങളോട് ആഹ്വാനം ചെയ്തു.
"ഈ വർഷം നവംബർ 4-ന്, കുറ്റവാളികളായ യുഎസിനോടുള്ള തങ്ങളുടെ നിലപാട് ഇറാനികൾ മുൻപെങ്ങുമില്ലാത്തവിധം വ്യക്തമായും വ്യക്തതയോടെയും മനസ്സിലാക്കുന്നു. എന്നിരുന്നാലും, യുഎസിന്റെ ശത്രുതയുടെ കാരണങ്ങളും അതിനെതിരെയുള്ള ഇറാനിയൻ ജനതയുടെ ഉറച്ച പ്രതിരോധവും പുനഃപരിശോധിക്കുന്നത് മുന്നോട്ടുള്ള പാതയിൽ ഒരു വഴികാട്ടിയായി വർത്തിക്കും," ഖമനേയി എക്സിൽ കുറിച്ചു.
അമേരിക്ക ഇറാനെതിരായ ആക്രമണങ്ങൾ ആവർത്തിച്ചാൽ പശ്ചിമേഷ്യൻ യുദ്ധം കൂടുതൽ വ്യാപിക്കുമെന്ന് ഇറാന്റെ പരമോന്നത നേതാവ് മുന്നറിയിപ്പ് നൽകി. "ഇത്തരം ആക്രമണങ്ങൾ ആവർത്തിച്ചാൽ, യുദ്ധത്തിന്റെ വ്യാപ്തി വളരെ വലുതായിരിക്കും," അദ്ദേഹം പറഞ്ഞു.
യുഎസ് ഇടക്കാല തിരഞ്ഞെടുപ്പിൽ ട്രംപിനു കടിഞ്ഞാണിട്ടുകൊണ്ട് തികഞ്ഞ അട്ടിമറി വിജയത്തിലൂടെ ഡെമോക്രാറ്റുകൾ ജനപ്രതിനിധി സഭയുടെയും സെനറ്റിന്റെയും നിയന്ത്രണം തിരിച്ചുപിടിച്ചു. ഡൊണാൾഡ് ട്രംപിന്റെ ജനപ്രീതിയില്ലായ്മ മുതലാക്കിയ പാർട്ടി, ഭരണത്തിന്റെ അവസാന രണ്ട് വർഷങ്ങളിൽ അദ്ദേഹത്തെ നിയന്ത്രിക്കാനുള്ള ഒരുക്കത്തിലാണ്.
