ലോകമെമ്പാടുമുള്ള സിനിമാപ്രേമികൾ കാത്തിരുന്ന പ്രഖ്യാപനം എത്തി. ഇനി വെള്ളിത്തിരയിൽ ചാരദൗത്യങ്ങളുമായി എത്തുന്നത് റോബർട്ട് പാറ്റിൻസൺ. വിഖ്യാത കഥാപാത്രമായ ജെയിംസ് ബോണ്ടിന്റെ പുതിയമുഖമായി റോബർട്ട് പാറ്റിൻസണെ ഔദ്യോഗികമായി പ്രഖ്യാപിച്ചു. 'ദ ബാറ്റ്മാൻ', 'ദ ഒഡീസി' തുടങ്ങിയ ചിത്രങ്ങളിലൂടെ ശ്രദ്ധേയനായ താരമാണ് റോബർട്ട് പാറ്റിൻസൺ. മാസങ്ങൾ നീണ്ട അഭ്യൂഹങ്ങൾക്കാണ് ഇതോടെ വിരാമമായത്.
അഞ്ച് ചിത്രങ്ങളിൽ ജെയിംസ് ബോണ്ടായി ആരാധകരുടെ കൈയടി നേടിയ ഡാനിയൽ ക്രെയ്ഗിന് ശേഷമാണ് പാറ്റിൻസൺ എത്തുന്നത്. 2006ൽ പുറത്തിറങ്ങിയ 'കാസിനോ റോയൽ' എന്ന ചിത്രത്തിലൂടെയാണ് ക്രെയ്ഗ് ജെയിംസ് ബോണ്ടായി അരങ്ങേറ്റം കുറിച്ചത്. 2021ൽ പുറത്തിറങ്ങിയ 'നോ ടൈം ടു ഡൈ' എന്ന ചിത്രത്തോടെ അദ്ദേഹം ജെയിംസ് ബോണ്ട് വേഷത്തോട് വിടപറഞ്ഞു.
ജെയിംസ് ബോണ്ടിന്റെ ഔദ്യോഗിക സിനിമാ പരമ്പരയിൽ ഇതുവരെ ആറ് താരങ്ങളാണ് 007ന്റെ വേഷത്തിലെത്തിയത്. ഷോൺ കോണറായിരുന്നു ആദ്യത്തെ ജെയിംസ് ബോണ്ട്. പിന്നീട് ജോർജ് ലേസൻബി, റോജർ മൂർ, തിമോത്തി ഡാൽട്ടൺ, പിയേഴ്സ് ബ്രോസ്നൻ, ഡാനിയൽ ക്രെയ്ഗ് എന്നിവർ ആ പദവിയിലെത്തി.
പുതിയ ബോണ്ടിനെ കണ്ടെത്താനുള്ള ചർച്ചകൾക്കിടെ നിരവധി താരങ്ങളുടെ പേരുകൾ ഉയർന്നുവന്നിരുന്നു. 'യൂഫോറിയ' താരം ജേക്കബ് എലോർഡി, 'സ്ലോ ഹോഴ്സ്' താരം ജാക്ക് ലോഡൻ, കാലം ടർണർ എന്നിവരൊക്കെ സാദ്ധ്യതാപട്ടികയിൽ ഇടംപിടിച്ചവരാണ്. എന്നാൽ, ഒടുവിൽ നറുക്ക് വീണത് റോബർട്ട് പാറ്റിൻസണാണ്. ബാറ്റ്മാനായി ആരാധകരെ കൈയിലെടുത്ത പാറ്റിൻസൺ ലോകത്തിലെ ഏറ്റവും പ്രശസ്തനായ ചാരന്റെ വേഷത്തിൽ എങ്ങനെ തിളങ്ങുമെന്ന ആകാംക്ഷയിലാണ് സിനിമാലോകം.