തിരുവനന്തപുരം: സംസ്ഥാനത്തെ കോളേജ് വിദ്യാര്ത്ഥിനികള്ക്കായി പ്രഖ്യാപിച്ച ഇന്ദിരാ ഗ്യാരന്റി പദ്ധതി ഈ അധ്യയന വര്ഷത്തില് തന്നെ നടപ്പിലാക്കുമെന്ന് ഉന്നത വിദ്യാഭ്യാസ മന്ത്രി റോജി എം ജോണ്. പെണ്കുട്ടികള്ക്ക് പ്രതിമാസം 1000 രൂപ നല്കുന്ന പദ്ധതിയുടെ പ്രാഥമിക നടപടികള് വകുപ്പിന്റെ നേതൃത്വത്തില് ആരംഭിച്ചതായും മന്ത്രി വ്യക്തമാക്കി.തിരഞ്ഞെടുപ്പ് വേളയില് പ്രഖ്യാപിച്ച അഞ്ച് ഗ്യാരണ്ടികളും നടപ്പിലാക്കുന്നതില് സര്ക്കാര് പ്രതിജ്ഞാബദ്ധമാണെന്ന് മന്ത്രി പറഞ്ഞു. ഇതിന്റെ ഭാഗമായാണ് ഉന്നത വിദ്യാഭ്യാസ വകുപ്പിന് കീഴില് പെണ്കുട്ടികള്ക്ക് സാമ്പത്തിക സഹായം നല്കുന്ന പദ്ധതിക്ക് തുടക്കമിടുന്നത്.
സംസ്ഥാനത്ത് നാലുവര്ഷ ബിരുദ കോഴ്സുകള് നടപ്പിലാക്കിയതില് പാളിച്ചകള് സംഭവിച്ചിട്ടുണ്ടെന്ന് മന്ത്രി പറഞ്ഞു. കൃത്യമായ തയ്യാറെടുപ്പുകള് കൂടാതെയാണ് പദ്ധതി നടപ്പിലാക്കിയത് എന്ന തരത്തിലുള്ള ആക്ഷേപങ്ങള് നിലനില്ക്കുന്നുണ്ടെന്നും ഇത് സര്വ്വകലാശാലകളെയും അധ്യാപകരെയും വിദ്യാര്ത്ഥികളെയും ഒരുപോലെ പ്രയാസത്തിലാക്കിയിട്ടുണ്ടെന്നും മന്ത്രി പറഞ്ഞു.
ഈ സാഹചര്യത്തില് നാലുവര്ഷ ബിരുദ കോഴ്സിനെക്കുറിച്ച് പഠിക്കാന് പ്രത്യേക സമിതിയെ നിയോഗിക്കുമെന്ന് മന്ത്രി അറിയിച്ചു. സമിതി നല്കുന്ന നിര്ദ്ദേശങ്ങള് സ്വീകരിച്ച് കോഴ്സില് ആവശ്യമായ മാറ്റങ്ങള് വരുത്താനാണ് സര്ക്കാര് ലക്ഷ്യമിടുന്നത്.
