ന്യൂയോർക്ക്: നിർമിത ബുദ്ധിയുടെ അതിവേഗ വികസനത്തിൽ മുന്നറിയിപ്പുമായി എഐ കമ്പനികളുടെ മേധാവികൾ. എഐയെ സൂക്ഷ്മതയോടെ കൈകാര്യം ചെയ്യാൻ അന്താരാഷ്ട്ര സുരക്ഷാ മാനദണ്ഡങ്ങൾ വേണമെന്ന് ഓപ്പൺഎഐ സിഇഒ സാം ഓൾട്ട്മാനും ആന്ത്രോപിക് സിഇഒ ഡാരിയോ അമോഡെയും യുഎൻ രക്ഷാസമിതിയിൽ ആവശ്യപ്പെട്ടു.
എഐ വ്യവസായത്തെ നിയന്ത്രിക്കുന്നതിന് അന്താരാഷ്ട്ര മാനദണ്ഡങ്ങൾ രൂപീകരിക്കണമെന്നും രാജ്യങ്ങൾ തമ്മിലുള്ള സഹകരണം ഉറപ്പാക്കണമെന്നും ഇരുവരും ആവശ്യപ്പെട്ടു. നിയന്ത്രണമില്ലാതെ എഐ വികസിക്കാൻ അനുവദിക്കുന്നത് ആഗോള സുരക്ഷയ്ക്ക് ഭീഷണിയാകുമെന്ന ആശങ്കയും അവർ പങ്കുവച്ചു.
എഐയുടെ ശേഷികൾ വിലയിരുത്തുന്നതിനും വിവിധ ദൗത്യങ്ങൾ നൽകുന്നതിനും സാധ്യതയുള്ള ഭീഷണികൾ കുറയ്ക്കുന്നതിനും സുരക്ഷാ മുൻകരുതലുകൾ ശക്തമാക്കുന്നതിനും അന്താരാഷ്ട്രതലത്തിൽ അംഗീകരിക്കപ്പെട്ട മാനദണ്ഡങ്ങൾ ആവശ്യമാണെന്ന് സാം ഓൾട്ട്മാൻ പറഞ്ഞു.
അതേസമയം, എഐയുടെ വികസനം നിയന്ത്രിച്ചില്ലെങ്കിൽ 2030നുള്ളിൽ മനുഷ്യരാശി ഇല്ലാതാകാൻ സാധ്യതയുണ്ടെന്ന ഡാരിയോ അമോഡെയുടെ നേരത്തെയുള്ള മുന്നറിയിപ്പ് വലിയ ചർച്ചകൾക്ക് വഴിവെച്ചിരുന്നു. ഇലോൺ മസ്ക് അമോഡെയുടെ അഭിപ്രായങ്ങളെ പിന്തുണച്ച് രംഗത്തെത്തിയപ്പോൾ, ഡെമിസ് ഹസാബിസ് എഐ കമ്പനികൾ സ്വതന്ത്ര മൂല്യനിർണയത്തിനും വിശകലനത്തിനും സഹകരിക്കുന്നത് നല്ല ആശയമാണെന്ന് അഭിപ്രായപ്പെട്ടു. എന്നാൽ അമോഡെയുടെ ചില വാദങ്ങളെ ഒരു വിഭാഗം സംശയത്തോടെയാണ് കാണുന്നത്.
